torsdag 6. desember 2007

Pepperkakebaking

Eg og Bjørg har baka idag. Det første brettet vart utsjånaden på kakene eit resultat av for lite mjøl og såg ikkje bra ut.Litt tilsetjing av mjøl samt at deigen fekk stå i kjøleskapet, gjorde susen og i kveld baka eg ut resten av kakene.

mandag 12. november 2007

Betre seint enn aldri

For snart to år tilbake strikka eg denne veska som dokke ser her. Veska er frå Gerd Fjellanger si bok "Strikk og Tov" og er strikka i Pt2-garn og Rauma Finull.
Så ville eg ha vottar i same ull og fargar og byrja å strikke vottane like etter at veska var ferdig. Oppskrifta er frå ei vottebok eg ikkje huskar navnet på og eg har brukt pinne nr 5. Eg vart nesten ferdig, berre tommelane igjen, og så la eg vekk vottane fordi eg var dritlei. No har eg tatt fram vottane igjen og fullført strikket. Og resultat før toving var slik:
Ein vask i maskina på 40 grader ga eit resultat som vart slik:

Resultatet vart mjuke og gode vottar som varmar i vinterkulda.

lørdag 10. november 2007

Søknaden er sendt!

Som eg sikkert har sagt tidlegare, vi drøymer om å bygge hus på Valestrand kor Espen kjem frå. Bestefaren til Espen har gjeve oss moglegheit til å byggje på garden hans, men området vi ønskjer å byggje i er regulert til LNF-område. LNF står for Landbruk, Natur og Friluft. Vi må derfor sende ein søknad om dispensasjon til frådeling av tomt til kommunen. Denne søknaden har tatt tid, både fordi vi sjølve er treige av oss og fordi det er så mykje papir som må fyllast ut. Vi har ikkje tilgang til offentleg vatn og kloakk og har derfor nokre ekstra papir å fylle ut. Men idag sendte vi søknaden og eg vil markere det med å vise dokke huset vi ønskjer å bygge:

onsdag 31. oktober 2007

Skjerf i Eskimo

Endeleg er eg ferdig med noko. Det går seint med meg for tida. Dette er eit skjerf strikka i Eskimo-garn. Fargen på skjerfet er ikkje heilt identisk med den verkelege fargen grunna dårleg lys. Oppskrifta er frå Drops-heftet nr 98, oppskrift nr 28. Eg har brukt 3 nøster sjølv om det i oppskrifta står 4. Kor langt skjerf ein ønskjer er jo ein smaksak, men fornøgd er eg iallefall. Håpar eg fortsetter å vere litt produktiv framover og kan avslutte nokon av prosjekta eg har byrja på.

onsdag 24. oktober 2007

Malin fyller 2 månader

Imorgon fyller Malin to månader. Dagen feirar vi med eit bilde av ei blid og smilande jente.

"Smil og vær glad for hver dag som går, så får du se hvor mange venner du får. Selv om du glemmer at en og en er to, så må du aldri glemme å være snill og god".

Eg har så flotte venner

Gåvene til Malin kjem framleis i postkassa. Denne gongen er det mi tidlegare klassevenninne Nina som har hekla. Biletet er tatt i hurten og sturten med lite lys. Håper dokke ser kva det er likevel. Tusen takk for den flotte gåva Nina.

lørdag 29. september 2007

Kvinna sin stad er ved kjøkkenbenken

Nei eg har ikkje vendt tilbake til 1950-talet. Kvinna det er meg. Her i huset er vi svært tradisjonelle når det gjeld ansvarsfordeling og matlaging. Det er eg som lagar 100% av maten i huset, og den avtalen inngjekk vi når vi flytta saman for over 4 år sidan. Espen kan rett og slett ikkje lage mat, han interesserar seg heller ikkje. Og eg er motsatt. Det er mange eg har måtta forsvart ansvarsfordelinga overfor, men eg og Espen er nøgde med slik vi har det og det er vel det viktigaste, eller kva? Sjølv om vi lever i 2007, treng vi vel ikkje ha lik ansvarsfordeling på alle oppgåver.
Idag har eg stått ved kjøkkenbenken i fleire timar. Resultatet er pizza, kake og oppvask. Diverre fekk eg ikkje til å laste opp bilete av pizzaen, men til opplysning så var det mexicansk pizza. Eg personleg er ikkje så glad i pizza, men eg lagar det likevel fordi Espen blir så glad. "Den største gleda ein kan ha, er å gjere andre glad"...
Valnøttkake. Eit bidrag til mitt nye prosjekt "kake kvar helg". Oppskrifta kan absolutt forbetrast, men den var god nok til at eg skal ta den med til Osterøy imorgon.

mandag 24. september 2007

Heimestrikka kjole og sokkar til Malin

Ei venninne av meg, Marianne, har vore så snill å strikka ein søt, liten kjole samt sokkar til Malin. Slike gåver sett eg stor pris på. Tusen takk Marianne!

søndag 23. september 2007

Den første julegåva er ferdig.

I år trur eg at eg satsar på å gi tjukkelestar til jul. Det er enkelt, går fort og alle har bruk for det. Desse sokkane er strikka i str 3 år i babyull.

Svissrull/rullekake

Kvar helg lagar eg kake. Det er noko nytt eg har byrja med då eg har tru på at heimelaga kake er "sunnare" enn potetgull og godteri med eit hopetal e-stoff i seg. Litt nostalgisk er det også. Denne helga laga eg rullekake, eller svissrull som eg seier. Ikkje det vakraste biletet, men det gir likevel vatn i munnen.

Oppskrift: 4 egg, 125 gram sukker, 90 gram kveitemjøl og 1 ts bakepulver. I ovn ved 225 grader i ca 7 minutt. Fyllet består av krem og bringebærsyltetøy.

fredag 14. september 2007

Fleire strikka klede til Malin

Mamma har igjen vore i ilden og strikka eit par sokkar og ei kjempefin hue. Ho fortjener litt ros på bloggen min, for dette er ting eg set stor pris på. Eg har eit inntrykk av at mange som strikka før i tida og som har slutta å strikke, byrjar igjen når dei vert bestemødre. Eg håpar det gjeld mor mi også, for det er verkeleg fint det ho har laga så langt til Malin.

torsdag 13. september 2007

Jakke i alpaca

Denne jakka er strikka etter BabyDROPS nr 14-29. Str er 6/9 mnd, så det vert enno ei stund til Malin kan bruke denne jakka. Akkurat no gleder vi oss berre til at ho skal fylle ut str 50... Jakka på biletet har ikkje blitt vaska eller fått knappar, men det tar alltid lang tid før eg får gjort akkurat det.

torsdag 30. august 2007

Vi har fått ei lita tulle

Kven skulle tru at ho kom så fort? Ikkje lenge etter at eg hadde skrive forrige innlegg, reiste vi på Haukeland. Ho kom laurdag 25.august kl 07.49. Ei lita tulle på 2320 gram og 45 cm. Den vesle prinsessa skal heite Malin. Vi kom heim idag og alle tre i familien har det bra.

mandag 20. august 2007

Aud-Marte og Ola har gifta seg

Det har vore bryllaup i helga, og eg har vore forlovar. Vigselen var i Volda kyrkje og festen på Nordfjordeid folkehøgskule. Det var ein flott seremoni og ein hyggeleg fest. Brudeparet reiser imorgon til Thailand på bryllupsreise i to veker. Ein velfortjent tur.

Været var ikkje på topp denne dagen. Det regna og blåste, og det gjekk ikkje an å vere ute. Det seiast at det betyr lykke å få regn i sløret, så dette ekteskapet lovar bra.


Vi måtte køyre eit stykke for å kome til festen etter vigselen, men når bilen er ein flott gamal Citroën, så gjer vel ikkje det noko??
Eit bilete av forlovar, brud og Bjørg. Vi tre var som erteris på heile ungdomsskulen og gymnaset og er gode venninner framleis. Eg har litt problemer med å legge ut bilete av meg sjølv i den tilstanden eg er i, men denne dagen var eg pynta til fest slik at det ikkje viser like godt kor sliten eg eigentleg er. For dokke som lurer så er det under 4 veker til termin.

tirsdag 14. august 2007

Heimelaga brød

No er vi i Volda, heimstaden min, og det har vorte produsert brød på kjøkkenet hennar mor. Eg lagar ikkje brød så ofte, men eg har ein tanke om at det skal verte rutine no når eg har vorte heimeværande. Oppskrifta på brøda er veldig enkel, og du finn den under biletet.
24 dl kveitemjøl, 4 dl sammalt grovkveite, 2 pk tørrgjær, 1 ts salt, 2 raspa gulrøter og 1 liter lunka vatn og olje (ca 0,5 dl). Bland først det tørre, hell deretter i det våte. Elt deigen. La deigen heve i 1 time, elt ut tre brød og ha dei i form med bakepapir eller margarin i. La det etterheve i 45 minutt. Brøda steikast på 180 grader i 45-50 minutt.

onsdag 8. august 2007

Nokre gåver til veslejenta som vi har fått

I mangel på noko anna meiningsfullt å skrive om, viser eg her tre heimelaga gåver vi til no har fått til veslejenta. Jakka har mamma strikka og er ei oppskrift frå Sandnes Garn. Dei naturkvite sokkane har min hemmelege ven frå april strikka i alpakka garn. Dei rosa sokkane har studenten eg var veiledar for på jobben strikka. Veldig flotte gåver alle saman. Eg kjem til å legge ut bilete av alle heimelaga gåver eg får. Det synest eg dei flinke tausene fortjener.

søndag 29. juli 2007

Vognteppe i alpaca

Dette vognteppet har tatt tid. Det har for det meste ligge i ei korg då eg har nytta kveldane til oppussing, men no kan eg endeleg seie eg har strikka det ferdig. Det einaste som manglar er ein vask og blokking. Nokre få trådar må også festast. Oppskrifta er frå Drops-hefte 14, modell nr 22 (babystrikk).

torsdag 26. juli 2007

Sjå kva eg fann i hagen!

Dette er Triumphator i bladliljefamilien. Den duftar kjempegodt og ser utruleg vakker ut. Det er så mange skattar i hagen, men ingen viser interesse for dei dessverre. Denne planta er definitivt ein kandidat til min framtidige hage.

Ein ettermiddag på Burkeland

I samband med at pappa, Lene og Jonas var på besøk, tok vi oss ein tur på Osterøy. Espen er oppvaksen på Valestrandsfossen, nærare bestemt på Burkeland. Sidan mor til Espen samt søster og nevø var på besøk hjå bestefaren, passa det godt med eit besøk slik at familiane får treffe kvarandre. Det er også kjekt å vise pappa kvar eg ønskjer å bu i framtida. Bestefaren til Espen bur på ein fredfull nedlagt gard omkransa av frodig natur på alle kantar.

Vårt største ønskje er å få bygge hus på garden. Her er vi på synfaring på draumetomta som ligg på toppen av garden. Det veks og gror meir og meir, så vi ser nesten ikkje den vakre utsikta lenger. Det tek tid å gjere ein søknad om byggjing når området er regulert for landbruk, men om ikkje lenge håpar vi at vi er eitt steg nærare draumen om eige hus på Burkeland.

På biletet ser dokke huset til bestefaren til Espen til høgre, huset til onkelen i midten og den gamle fjøsen til venstre. Garden er idyllisk og stille, men er prega av at den har vore nedlagt ei stund. Skogen kjem nærare husa for kvart år som går. Det er likevel alltid godt å kome hit når byen vert for krevande.

mandag 9. juli 2007

Resultat av 2 liter jordbær

Eg kjøpte 3 korger jordbær og har laga rørt jordbærsylte. Sidan det er ganske vassent, sila eg av noko av safta. Tanken er å ha varm jordbærsaus på is. Eg er ikkje ein person som nyttar sylte på skiva, men det kan no vere godt å ha dersom tanken på vafler skulle dukke opp. Eg har ikkje laga så mykje, men jordbærsesongen er ikkje over enda...

lørdag 2. juni 2007

Nokre bileter frå Kjøpehavnsturen i pinsa

Før eg reiste til Kjøpenhavn sa alle at eg måtte innom Nyhavn. Nyhavn var ein koseleg stad med gamle treskuter og eit godt utval i restaurantar.

Vi hadde ein fin dag i dyrehagen. Denne maurslukaren synest eg var eit artig lite vesen.

Løva måtte vi sjølvsagt besøke.

Årsaken til at vi var i Kjøpenhavn var at vi skulle i bryllaup og Espen skulle vere forlovar. Ein vellykka dag med vigsel i Den norske sjømannskirke og fest ved St.Gjertrudskloster. Restauranten anbefalast på det sterkaste.

Vi tok ein tur med kanalbåten og fekk då sjå den vesle havfrua. Den var litt mindre enn eg hadde førestelt meg...

Ein tur innom Tivoliet er obligatorisk dersom ein er i Kjøpenhavn. Sjølv om eg ikkje fekk ta karusellar, er det alltid gøy å sjå på.

Espen og Eilin foran ein av uante mange restaurantar i Tivoliet.

Litt av det eg har strikka til veslejenta

Sparkedressen har eigentleg bein, men etter anbefaling frå erfarne mødre på jobben lot eg vere å strikke bein på dressen. Dressen er valgt ut i Liverpool sine fargar slik at veslejenta har noko å ha på seg når det er kamp. Oppskrifta kjem frå eit gammalt Mamsell-hefte som mamma hadde når eg var liten.

Ullsokkar for små bein er alltid kjekt å ha. Oppskrifta er sett saman av fleire samt frå eige hovud.

Ullbuksa er strikka i str 6 mnd. Godt å ha når ein skal lære golvet å kjenne om vinteren. Oppskrifta kjem frå Sandnes Garn 0506-7.


Oppskrifta er frå Sandnes Garn, strikka i mandarin petit. Denne dressen er ikkje spesielt fin, men historia er det. Eg strikka den til veslebroren min, men vart aldri ferdig. Eg monterte den ferdig i vinter og strikkeferdigheitene hadde forbetra seg kraftig sidan den gong. Den vert nok ikkje gitt vekk. Til opplysning kan eg seie at veslebror min fyller 7 år om nokre veker....


Buksedress str 6 mnd. Oppskrift og garn frå Mor Aase. Fin å ha i vogn.


Babyjakke str 6-9 mnd. Oppskrift frå DROPS baby nr 11-7 .


Babyjakke str 3 mnd. Oppskrift frå Gjestal.

onsdag 23. mai 2007

Noko av det eg har hekla

Eg har lenge hatt ønskje om å få eit digitalt kamera. Når eg ser andre sine bloggar og deira hobbyprosjekt, vert eg misunneleg og ønskjer å gjere det same. Eg har gitt vekk det meste, men her noko av det eg har hekla. Eg må advare om at det er første gong eg legg ut bilder nokon gong...

Dette teppet hekla eg i vinter til denne vesle jenta som dokke ser på biletet.








Denne bikinien er hekla i Muskat. Oppskrifta er frå Sandnes Garn.









Dette sjalet er ikkje det som eg er mest stolt av. Oppskrifta er funne på internett og mange andre hobbyentusiastar har hekla dette. Garnet er frå Gjestal.