søndag 16. desember 2012

Italiensk ribbe

Eg er ingen blodfan av norsk juleribbe. Eg synest det er smaklaust og feitt. Espen derimot er veldig glad i svineribbe slik som veldig mange er. Sidan det ikkje er jul, men vi har litt høgtid ilag med svigermor denne helga, tenkte eg at eg skulle lage ei litt annleis ribbe. På Gilde si nettside fant eg oppskrifta på Italiensk ribbe. Og det måtte eg prøve, berre litt på min egen måte. 
Først må eg seie at det tek 3,5 time å førebu og steike denne retten. Om du synest det er verdt det med tanke på at vi sitt berre 15 minutt ved bordet får vere opp til deg. Eg er ikkje så opptatt av sjølve måltidet, men det som skjer undervegs i matlaginga. Her er ingredienslista først:

2,6 kg tynnribbe (du kan både ha meir og mindre)
4 hakka kvitlauksfedd
2 ss grovmalt pepar
10 knuste einebær
1 neve fersk salvie
2 ss tørka timian
1/3 potte frisk rosmarin
3-4 ss salt

Som tilbehør har eg ovnssteikte poteter og grønnsaker i form. Av grønnsaker nytta eg gulrot, squash, gul løk, purre og paprika. Eg la mange, heile fedd med kvitlauk i forma ilag med nokre kvastar rosmarin, båtar av ein sitron, litt salt og olje. 
Det første eg gjorde var å ta ut beina av ribba. Det var litt vanskeleg synest eg. Ribba var romtemperert slik som det sto i oppskrifta, men det var litt styrete å ta dei ut.
Så ruta eg ribba med ein skarp kniv.
Deretter blanda eg øvrige ingrediensar med stavmiksar, fordelte det utover ribba, før vi rulla ribba saman. Det er greit å vere to for den eine rullar medan den andre snurrar hyssing rundt. Eg kan ikkje binde steik og liknande så det vart ganske mykje tråd.
Ribba vart lagt på ei rist med aluminiumsfolie godt pakka over.Under rista la eg ei langpanne med vatn. Ribba steikast på 220 grader i 1.5 time.
Etter 1,5 time tek du av aluminiumsfolien, legg inn grønnsakene og steiker vidare i 1,5 time til. Undervegs snur du ribba slik at svoren vert sprø på alle kantar. Dersom ribba er sprø og klar utanpå før tida har gått ut, legg du på aluminiumsfolie igjen.
Etter tre timar tek du ut ribba og let den kvile. Medan du ventar kan du dekke på bordet og ta ein sang. Klipp opp hyssingen og del opp ribba i skiver. Server ilag med det tilbehøret du ønskjer.

Du kan heilt sikkert variere fyllet inni alt etter kva du ønskjer å servere det ilag med. Eg synest dette var ein fin variant av den klassiske juleribba, men eg trur ikkje du skal forsøke å erstatte den. Å tulle med tradisjonar har iallefall ikkje eg tenkt å gjere.

3 kommentarer:

Inger Marie sa...

Dette var en flott variant av den tradisjonelle ribba...og med krydder som timian og rosmarin blir det jo supert:)
Hyggelig og god middag:)

Elisabeth sa...

Wow! Dette så smaskens ut. Kunne jeg virkelig tenkt meg å forsøke.
Takk skal du ha :-)

Tove Kristin sa...

Åååå det såg skikkelig godt ut, har virkelig lyst til å prøve.

Legger meg til så jeg finner tilbake til deg.

Hilsen Tove Kristin