Leikeland i Haugesund

Vi har vore i Haugesund i helga på besøk til farmora til Malin. Der har dei fått seg eit stort leikeland midt i kjøpesenterområdet på Raglamyr. Det var masse ungar og lydnivået deretter. Sjølv om Malin er berre 17 mnd, var besøket ein suksess. Ho var heilt vill og begeistra.
Den vesle sklia klarte ho aleine, og gjett om det var kjekt! Ho lo og lo.

Å bade i ballar var også veldig gøy, men å ta bilete av ein unge som ikkje sit stille ein brøkdel av eit sekund var derimot veldig vanskeleg.

Jo Vegard tok Malin med i den store sklia. Ho skulle opp og skli om og om igjen. Det var ei anna sklie der også som Malin likte godt. Ho flira med heile seg.

Adrian er to år eldre enn Malin. Dei er søskenbarn og leika godt ilag når ein tek aldersskilnaden i betraktning. Han passar på ho og tek ho gjerne med på ein sykkeltur. Etter eit par timar var Malin heilt utslått og ho sov i 15 timar den natta...

Litt om meg, ei utfordring frå Fivrel

Å vere ein bloggar inneber også det å besøkje andre bloggar og legge att kommentarar i bloggane når ein kjenner for å seie noko. Det florerer med utmerkingar (award) med ulik tyding bak "diplomet". Eg verken publiserer dei eg har fått eller gir utmerkingar til nokon. Eg vil ikkje vere forskjellsbehandlar og passar heller på å skryte av bloggarane personleg i bloggen. Likevel takkar eg for dei som har gitt meg utmerking så langt.

Fivrel er ei artig taus med mange interesser lik som mine og ho har eit fantastisk språk. Ho har gitt meg ei utfordring som eg sjølvsagt er med på. Eg bytter ut 4 med 5 punkt :-)

5 jobbar eg har hatt:

Reinhaldar i Volda kommune. Mamma arbeider i kommunen og eg har vore mykje på rådhuset opp igjennom åra. Eg kjenner mange som jobbar der, og har på den måten fått sommarjobb og vikarjobb i høgtidene der det måtte trengast av vasking. Eg har vaska legekontor, helsestasjon, heile rådhuset, doa ved badeplassen, musikkskule osv. Dette var fram til eg var 20 år.

Grønn sektor i Volda kommune. Plenklipping i park, rabattar og gravplassar. Litt luking og søppeltømming og. Veldig kjekt å vere ute heile sommaren.

Miljøarbeidar. Eg er den fødte kommunearbeidaren, kanskje er det arveleg, kven veit... Arbeid med psykisk utviklingshemma var ein del av sommaren i studietida og sommaren etter endt utdanning. Eg har jobba i Volda, Skedsmo og Osterøy kommune. Alle typar funksjonshemmingar.

Barnehage. Første året etter endt studie jobba eg eit år i barnehage. Det var ei uteavdeling med base i skogen. Vi hadde eigen lavvo og utedo. Veldig kjekt og tida der har lært meg mykje. Dette var i Lørenskog. Nok ei kommune...

Sosialarbeidar. Dei siste åra har eg vore ansatt i Bergen kommune som sosialkurator.



5 filmar eg aldri vert lei:

Den fabelaktige Amelie frå Montemartre. Ei orginal dame i fantastiske Paris.

Kopps. Svensk film om bygdepolitiet som må heve kriminalitetsstatistikken for å ikkje misse jobben. Utruleg morosam film.

Istid. Animasjonsfilm om tre ulike dyr som vert tvungen til å flykte ilag. Dei norske stemmene er prikken over i'en.

Under solen. Skodespelaren Rolf Lassgård eig filmen eine aleine. Fantastisk mann. Ein av dei få filmane tårene trillar littegrann.

Den grønne mil. Alle filmar med Tom Hanks er bra, men denne filmen er ein av dei beste. Ein fengselsbetjent med hjarte sjølv for den mest forhatte.


5 stadar eg har budd:

Volda. Her er eg fødd og oppvaksen. Flytta derifrå når eg var 19 år.

Bergen. Har aldri likt byen, men har budd her likevel i 4 år påvente av noko betre.

Sogndal. Studenttida mi vart tilbrakt her i 3 år.

Lørenskog. Budde der i eitt år. Mi einaste tid utanfor vestsida av Noreg.

Osterøy. Har budd her berre i 5 mnd, men skal sannsynligvis tilbringe mesteparten av livet mitt her.


5 tv-seriar eg likar:

Der ingen skulle tru at nokon kunne bu. Eg elskar den serien rett og slett. Eg har sett alle episoder og alle eg kjenner veit at eg berre MÅ sjå dette programmet.

Himmelblå. Koseleg familieserie i storslått natur.

Åndenes makt. Spøkelsar eller ikkje, historiene er spennande.

Grønn glede. Sesongprogram om ei av mine store interesser: Hage.

Matprogram. Elskar å lage mat, elskar å ete mat, elskar å sjå andre lage mat.


5 stadar eg har vore på ferie:

Paris. September 2006 var eg ei veke i Paris hjå ei venninne. Ein praktfull by!

Vesterålen. Juni 1998. Kan nesten ikkje skildrast med ord. Majestetiske fjell, azurblåe fjordar, sol og varme, og sjøsprøyt i ansiktet. Eg har ei fortid i Heimevernsungdommen (!). Dette var ei landssamling med 4 ungdommar frå kvart fylke. Vi var på sjøen kvar dag, vi fekk vere med i helikopter og vi fekk sjå Noreg slå Brasil i VM.

Sverige. Med Sverige meiner eg området Stockholm-Uppsala. Har familie der og har mange av mine barndomsferiar der. Nydelig stad å vere.

Estland. Klassetur september 2002.

Berlin. Klassetur februar 2000.


5 nettstadar eg er innom kvar dag (ofte):

Norske interiørbloggar-NIB

Hotmail

Bloggar

Hobbyboden.com

Facebook


5 stadar eg ville ha vore no:

I ein pengebinge.

På sjøen i ein båt kor det er sommar og varme grader.

På fjellet på Sunnmøre.

I eigen hage.

Lofoten.

Marengsreir med eggekrem og bær

Eg har vore heime idag og igår fordi Malin har vore sjuk. Eg er veldig rastlaus av meg og må ha noko å gjere heile tida. Det er ikkje mangel på husarbeid, men no når eg har vore heime så unner meg litt anna og. Baking er noko eg synest er kjempekjekt, men dessverre medfører det eit auka kaloriforbruk og det vert derfor ikkje så ofte at det skjer. Idag måtte eg berre lage noko, og eg laga ut av det eg hadde.

Marengsreir er laga av 2 eggekviter og 100 gram sukker. Visp eggekviten først, deretter tilsett sukkeret litt og litt til det er oppløyst. Bruk ei kakesprøyte og lag ringar på eit bakepapir. Lag to ringar oppå kvarandre. Sørg for å dekke botnen med litt marengs. Steik reira på 150 grader i 35 minutt. La marengsen avkjølast inni ovnen med open dør.

Lag eggekrem av 2 eggeplommer og 60 gram sukker. Visp saman og tilset 1/2 ss maisenna. Varm 1,25 dl melk i ei panne, kok opp og avkjøl. Tilset melka i egga og visp. Ha alt tilbake i panna og kok opp. La det koke i 3-5 minutt på svak varme til blandinga vert krem.

Ha eggekremen i marengsegga. Ha varma bær oppå. Eg hadde berre jordbær tilgjengeleg, men det kan verte litt søtt. Bringebær, rabarbara, eple o.l er godt. Til eple er kanel i eggekremen godt. Til rabarbara er litt ingefær godt i eggekremen. Du tilsett krydderet når du kokar opp melka.

Sparkepose i lilla

Denne posen er ei utbetra utgåve av den forrige posen eg sydde for ikkje lenge sidan. No har eg lagt til ekstra stoff til glidelåsen og utringinga er større. Halvvegs fant eg ut at eg mangla glidelås og kantband, og eg enda opp med lyslilla som passa fint til stoffet. Lilla er ein ganske uvanleg farge for meg, men opprinneleg er stoffet tiltenkt ein advendtsduk. Malin har akkurat slutta med sparkepose, så det vert vel til at eg gir den vekk.

På ønskjelista: Ny symaskin som ikkje bråkar og ristar, og som syr fine saumar utan krøll og lause løkkjer...

Prikken over i'en

Litt spøk og litt alvor er det når eg har bestilt navneband til å merke ting som eg har laga. Spøk fordi det er litt komisk at vesle meg finn på noko slikt. Eg er verken designar eller har tankar om å selgje noko. Alvor er det at eg ønskjer at plagga mine som eg har brukt mykje tid på, skal ha spor etter seg om kven som har laga dei. For å gjere det litt ekstra personleg, har eg skreve det på dialekt. Eg er ein utvandra sunnmøring, men synest det er viktig å vise kvar eg kjem frå.

Har du lyst på dine eigne navneband, kan du bestille på http://www.minanamnband.se/. Her kan du velgje mellom mange fargar, skrifttypar og logo.

Det første resultatet frå den langtidssjukemelde symaskina mi

Eg har ei symaskin som ikkje er av den beste kvaliteten. Eg er ingen storsyar sjølv og er nøgd med at eg i det heile tatt har noko å sy med. Flink har eg ikkje vore med å bruke den, men innimellom har eg tatt meg saman og leitt den fram. Helst når eg skulle legge opp bukser og sant. Maskina har vore skranglete og upresis, og derfor har den vorte lagt vekk ei lang stund no. Eg smørte ho litt og fekk vekk litt støv, og så var eg klar til dyst. Resultatet vart ein sparkepose!
Stoffet er noko eg har hatt liggande og mønsteret er frå eige hovud. Eg ser på denne posen som ein prøvemodell kor eg har funne ut forbetringar og feil eg ikkje må gjere på nytt. Eg har tatt mal frå ein pose som Malin brukar, og det gjekk veldig greitt å sy den. Men saumane vert ikkje fine. Undertråden flokar seg av og til, og sikk sakk-saum liknar ikkje i det heile på seg sjølv. Vert eg overbevist nok om at eg vil fortsette å sy litt ofte, må eg vurdere eit nytt kjøp.

Eg måtte ta bileta ute idag, det vert no aldri lyst nok inne for tida. Ein av forbetringane mine er å lage større utringing framme og ha ekstra stoff til glidelåsen. Ikkje same mal framme og bak med andre ord.

Malin skulle vere modell og låg i sofaen og sprella med beina inne i posen. Eg var litt for opptatt med å ta bilete for plutseleg hadde Malin ramla på golvet. Så derfor er modellen på biletet litt lei seg og har tårer i auget. Men ho synst det var stas å få prøve den nye posen. No er eg i gang med ein ny...

Vi er to små fine damer

Espen og Trond har vore vener sidan 6 års klubben i 1979, og har fulgt kvarandre sidan meir eller mindre. 28 år seinare fekk begge to jenter; Stina født i mars og Malin født i august. Dei skal gå skule ilag og kanskje følgje kvarandre på same måte som fedrene har gjort. Idag leika dei for fyrste gong. 5,5 månad alderskilnad er mykje når ein er eitt år, men dei fann tonen.
Tenk alle eventyr og morosame ting som kan skje i eit telt. I dette teltet såg det iallefall koseleg ut, er dei ikkje søte desse to små jentene?

Det er nok ikkje siste gongen desse to leikar ilag...

Velkommen inn i det nye året 2009

Nytt år, nye moglegheiter. Å ha masse nyttårsfortsett er berre tull. Eg heldt dei sjeldan likevel, men så kan eg ikkje gi opp heller. Så dette har eg som mål for 2009:

1. Spise sunt og halde meg til laurdagssnop
2. Verte ein moderat mosjonist
3. Strikke, hekle, sy og scrappe meir
4. Komme i gang med å byggje hus
5. Slutte å bite negler, nok ein gong...
6. Besøke venner oftare
7. Få solgt leiligheten på Landås

Var dette uoverkommeleg? Eg har lite tid til disposisjon etter at jobb, husarbeid og tid med Malin er unnagjort, men eg skal likevel prøve å strekke meg litt til.

Til slutt ei lita oppsummering for året som har gått:

1. Vi har lagt golv i stova og gangen i leiligheta på Landås, mala soverommet og gangen, og gjorde ferdig listarbeid og anna småplukk. Vi la den ut for salg, men måtte leie den ut istaden.
2. Vi har flytta til Osterøy og leier no ein knøttliten leilighet
3. Vi har fått disposisjon til å få byggje på garden til bestefaren til Espen
4. Malin har starta i barnehage
5. Eg har fått ny jobb
6. Espen har fått stordilla på sykling og trener til Bergen-Voss i juni
7. Vi har vore på vår første ordentlege ferietur, til Danmark
8. Eg har ikkje trent eller vore sunn, heller ikkje slutta å bite negler.

To bileter av Malin. Eitt frå januar og eitt frå desember. Jammen er det mykje som har skjedd på eitt år!
Frå å liggje på golvet til å gjere husarbeid, på under eitt år! Godt jobba, Torill!