Golv i garasja

Det er lenge sidan eg har vore innom bloggen no, men her er eg plutseleg. Det er kjekt å blogge om store ting som skjer. Å tidfeste og vise bileter synest eg er givande. I helga oppfylte vi ein etterlengta draum. I garasja har vi fått golv av betong!

Først  var planen at vi skulle støype sjølv, men kvaliteten ville verte dårlegare og prisen høgare, samt mykje meir arbeid. Då er det ikkje noko å stusse på så då fekk i betongbil på tunet laurdagsmorgon.

På førehand hadde Espen og Steffen lagt plastdekke og armeringsjern. Emil fylgde spent med på det som skjedde.

Det er godt å ha ei hand og halde i når bilane er store og ting er litt ukjent.

Vi har venta på å få golv lenge. No når golvet er på plass kan vi endeleg sette i garasjeportane og listene. Vi kan og få singel på tunet, og vi kan lage hyller og arbeidsbenk i garasja. Og det igjen fører til utrydding av eit stappfullt vaskerom. Kjedereaksjonar!

Det er utruleg kva ein klarer å stappe inn i ei garasje. Trudde garasja var til bilane eg, men begge står på tunet.... Og sjå den flotte veden inni boda, den har eg satt i sekkar. Må no skryte av det vesle eg gjer, det er mest Espen som regjerer ute.

Betongbil i sandkassa. Også den yngre garde bygg garasje.

Sjå danseplattingen! Ein god porsjon innsats og ein halv Sydentur resulterer i dette flotte golvet.

Uteboda er ferdig!

Samarbeid og byggesett gjekk hand i hand denne gongen og det tok ikkje lange tida før uteboda var ferdig. Espen og Steffen har jobba godt siste dagane og no har vi altså eit lite hus som rommar verktøy, syklar, sag og anna. 

Pompel og Pilt. Dei jobbar godt ilag og er like nøyen på korleis ting skal gjerast. Impulsive er dei kanskje ikkje, alt er godt gjennomtenkt. Gjerne mange gongar.

Vi har byrja å setje ting inn. Alt skal ut att seinare, sjølvsagt. Eg har ikkje for vane å la boder stå urørt over tid. Vi treng hyller og boda skal malast. Den skal verte raud med kvite lister og dører.

Vi har flytta ting ut av garasja. Den eine delen rommar "kvitebilen" eller "Jolly Roger" om du vil. Ungane har sett litt for mykje barne-tv og har kalt opp bilane våre etter sjørøverskutene på Jake og Sjørøverene. "Sølvbilen" og "Bucky" kallar dei stasjonsvogna. Espen kallar den limousinen. Kjært barn har mange navn. Uansett, no rotar eg meg ut på viddene. Det skal støypast golv her, deretter skal portane settast i. Etter at dette er gjort vil alt få sin faste plass enten i garasja eller i uteboda.

Ikkje mykje idyll og harmoni rundt oss. Stigar, plater og boss kjenneteikner området vårt stort sett alltid. Vi har takshingel ståandes i gangen i påvente av tørt vèr. Den skal på taket på uteboda, men boda er tett så det hastar ikkje sjølv om takshingel er vel ikkje noko ønskeleg møbel i gangen.

Emil kosar seg med siste snøen. Vi hadde eit lite snøfall igår som resulterte i ei borg. Resten av snøen er vekke og forhåpentlegvis forsvinn denne og. Vi har så mykje arbeid framfor oss i år. Eg sukkar berre eg ser på desse bileta. Både garasje og utebod skal malast raud samt gjerast ferdig slik som eg nevnte over. Huset skal malast eit strøk, meir plen og helst legge eit lag med singel utanfor huset. Godt vi ikkje har bestilt tur til Syden. Midt i alt kaoset såg eg dei første snøklokkene i bedet idag. Masse arbeid, men endå meir glede!

Utebod under arbeid

Så er tredje bygning på tomta snart ein realitet. Eg trur på ingen måte dette er den siste. Espen har planar om mange småhus av tre og stein i åra som kjem, men denne gongen er det ferdigkutta materiale og ei oppskrift som skal følgast. Uteboda som no er på veg til å verte ferdig vart kjøpt hjå Coop Obs Bygg ifjor då den var på tilbod. Den er på 9,1 kvm og har ei dør og eitt vindauge.

Fundamentet vart støypt i haust og vi har venta på at det skulle vere stabilt mildvèr før monteringa kunne starte.

Vår kjære nabo, onkel og gode hjelpar Steffen er her denne gongen og. Han er jammen kjekk å ha som nabo.

Slik står det no. Det er mykje som skal inn her. Garasja er stappfull, det same er vaskerommet. Uteboda skal verte raud med kvite lister og til høgre har eg sjølvsagt planar om eit blomebed.

Garasjenytt

Siste nytt om garasja er at vi har hatt elektrikar på besøk og har no straum til lys og kontakter. Vi er litt fattigare, men nokre lys rikare. Og garasja har tre veggar ferdigmalt. Bakveggen manglar både grunning og maling, men dette vèret gjer det ikkje lett for oss.

Og inn i garasja skimtar dokke garasjeportar til tørk. Espen har grunna begge sider og skal snart i gang med maling. Det nærmar seg vinter så vi håpar at portane snart er oppe.

Garasjetaket er ferdig

Garasjetaket er ferdig, endeleg! Og det gjekk overraskande fort. På to dagar var taket lagt, og som vanleg var det god hjelp å få.

Espen er ute i regnvèret idag og gjer ferdig kiste og kledning. Vi har og kjøpt grunning og dekkbeis som skal på når vèret tillet det. Stillaset er tatt vekk og igår rydda eg og Espen rundt garasja. Espen køyrde eit lass med boss og det vart så fint utanfor.

Det skal feirast skikkeleg når vi endeleg er ferdig med garasja. Det har tatt så lang tid med byggesøknadar (13.5 mnd) og anna dill at det er ei større bragd at den er ferdig enn då huset var klart til innflytting. Det kjennes iallefall slik ut no. Det er vel noko med at eg har gløymt alt styret rundt husbygginga. Og det er vel like greitt.

Litt nytt om garasja

Det har vore veldig dårleg vèr dei siste  vekene, men no ser det ut til at det snur. Det har vore ein fin utedag idag for store og små. Medan eg har kost meg ilag med borna og fine venner, har Espen hatt dugnad på garasja. Eg har diverre ikkje bilete frå arbeidslaget, men Espen har fått hjelp av fem mannfolk idag. Veldig kjekt!

Med hjelp av sterke mannfolk og ein solid traktor fekk dei opp taksteinane på taket idag. Jobben var gjort på to timar.

Espen og Steffen gjorde ferdig gavlborda etter at laget hadde gått, og så gjenstår montering av takrennener før steinen skal på.

Legg merke til den fine hagen vår til venstre i bilete... No når takststeinane er oppe kan vi rydde boss, flytte resten av taksteinen vekk og få tilkøyrd jord. Det skal lagast både det eine og det andre her.

Litt kledning gjenstår og vindauge og dør. Likevel er vi kome langt. Veldig kjekt. Tenk korleis det hadde vore om vi ikkje hadde fått alle den gode hjelpa vi har fått til no? Utruleg kjekt med gode venner og familie som stiller opp. Det er då det er kjekt å hjelpe tilbake.

Oppdatering frå garasja

Eit lite innlegg frå garasja. Espen og Steffen er nesten ferdig med å legge lekter på taket. Vi kjem oss ikkje så veldig mykje lenger før vi har møneplast og bordtakbeslag. Dette mangla i leveransen. Vi har henvendt oss til leverandøren som seier at dei tenkte vi skulle bruke murstrimmel i staden for møneplast. Etter å ha snakka med andre uavhengige i bransjen vil dei ikkje anbefale dette fordi det ikkje vert tett. Så dette må vi skaffe sjølve. Gratis garasje er altså ikkje gratis når leverandøren vel å gjere det slik...

Ikkje nok med det. Leverandøren påstår at dei har levert bordtakbeslag. Desse er 2,5 meter lange og er ikkje så vanskeleg å få auge på. Vi har tidlegare fått feil takstein så eg er ikkje forundra over at fleire feil dukkar opp. Ho som eg korrensponderar med har ikkje noko med sjølve leveringa å gjere, men ho påstår likevel heilt sikkert at det er levert(!). I ein mail seier ho "Da tror jeg du bare må skaffe disse selv.Vi kan ikke levere evt. manko som ikke er påvist ved levering så lenge etter opprinnelig leveranse." Meiner ho at vi skulle gått igjennom samtlege punkt ved leveransetidspunkt for at vi skulle få det vi hadde rett på? Hallo, kven er det som pakkar opp tonnevis av materiale og tilbehør lenge før ein har tenkt å bruke det? Gratis er altså ikkje gratis.

Sjølv om enkelte er gagnlause er vi iallefall glad for at vi har Steffen. Han har hjulpe oss masse. Kjempekjekt for Espen som slepp å gjere alt aleine.

Garasjebygging i påskesol

Når det er fint vèr må ein kaste frå seg alt som må gjerast inne og gå ut. For dette kan vare kort. Vi fekk snø dalande ned frå himmelen på mandag og temperaturen sank. Snøen forsvann like fort som den kom heldigvis. Natt til tysdag var det stjerneklart og ein vakker måne som lyste opp himmelen. Det var skikkeleg kaldt ute, men det betyr at sola er framme om dagen.  Det var eit herleg vèr utan ei sky å sjå.

Sjølv om vi måtte vente litt før vi kunne gå ut var vi ute i mange timar. Espen og Steffen kledde begge gavlane igår. Eg og ungane holdt på med vårt rundt huset.

Godt samarbeid gir resultat.

Så fort sola er framme vankar det is. Sjølv om det er kaldt hindrar det ikkje ungane å få i seg litt is.

Vinterkledd med is i handa, kva skal dette bety...?

Bilete frå dagen idag. Det første Espen gjorde idag var å reinskjære kantane langs taket. Espen og Steffen har etter dette lagt feder på taket.

På baksida er det ferdig, det er fint å tenke på. Synest det går fort fram no og eg ser at materiale forsvinn litt og litt under presenningen.

Etter dagen idag er det no klart for å feste lekter på taket slik at taksteinen kan leggast. Det har vore sur vind ute i ettermiddag og det skya etterkvart til. Imorgon er det meldt regn så då får vi bruke oss sjølve til noko anna.

Ha ei god påske alle saman. Forhåpentligvis vert det ikkje heilt stille her i høgtidsdagane.

Fantastisk dugnadshelg på garasja

For nokre flotte folk vi kjenner! Når våren kjem med si første solhelg og tid ved solveggen er fristande, så stiller folk opp for å hjelpe oss med garasja. Det er så utruleg kjekt å gi desse mannane kaffi, kaker, pølse og øl når vèret er nydeleg og lysta til å arbeide er stor. Alle har vore i godt humør og gjort ein glimrande innsats.

Laurdag byrja dagen med å lage stillas. Sola var på himmelen frå den sto opp og det vart ein fin start på dagen. Onklane til Espen, Jostein og Steffen, hjalp til saman med kompisen Ole André.

Arbeidsoppgåvene vart fordelt med Espen og Steffen på taket medan Ole André og Jostein kappa og bar det som trengtes.

 Sjekk den blå himmelen, er det ikkje herleg?

Dette bilete fekk eg nostalgisk kjensle av. Noko med lyset og gamle bileter trur eg. Iløpet av laurdagen fekk dei lagt sultak på heile taket. Hipp hurra, no er taket tett!

Eg viser til forrige innlegg om garasja og konsekvensane av å ha material liggande under presenning i nesten to år. Garasjeportane er svarte av sopp og vi har ein stor jobb framfor oss med dei. Sola fekk tørka dei og no ligg dei i garasja under tak.

Kommunen bryr seg ikkje når ein seier at det hastar med å bygge garasja fordi materialet held på å verte øydelagt. Men om du tilfeldigvis skulle ha ein jobb kor du behandlar slike saker, tenk om att. Dette er sopp som har lagt seg på trykkimpregnert materiale. Ikkje vakkert og arbeidet med å behandle garasja vert desto meir.

 Dei fire karane kosar seg i sola med kald øl etter ein lang dag med flott innsats.

Det er søndag og karane er klar klokka halv elleve om morgonen. Onklane og Stian, søskenbarnet til Espen, stiller opp med varme jakker denne kalde morgonen.

Dagen tok seg opp i eitt-tida då sola kom fram frå skodda. Igår gjorde dei ferdig gavlane og la asfaltplater.

Og slik står garasja no. Espen har tatt ut syklar og sykkelvogn som sto i gangen, inngangspartiet er tømt og no byrjar vi å sjå plassen som kanskje andre tek som sjølvsagt. Herleg!

På sida av garasja har Espen planlagt ei bod, men akkurat no er eg berre nøgd det går framover med garasja. Neste plan er å kle gavlane før dei fortsett med taket. Etter ei slik helg var Espen ganske sliten og trøytt, men veldig nøgd. Og det med god grunn.

Endeleg kan eg fortelje om garasja

Dette innlegget har eg venta lenge på å få skrive. Historia om garasja byrja for snart tre år sidan. Vi underteikna husbyggekontrakt med byggherre i finanskrisetider og lokketilboda sto i kø. Vi fekk tilbod om gratis material til dobbel garasje dersom vi underteikna før ein viss dato. Dette gjorde vi av fleire grunnar, men bygginga av huset tok til medan garasja venta vi med. Vi flytta inn vinteren 2010 og vi hadde mykje som skulle gjerast. Vi hadde ikkje tenkt å prioritere garasja den første sommaren, men byggherren insisterte på å levere materiala allereie juli 2010 fordi dei ville gjere opp kundekontoen. Og slik vart det. Materiala har sidan då ligge under presenningar til alle vèr og årstider. Ikkje særleg gunstig i lengda så 25.mai 2011 søkte vi om byggeløyve på garasja og håpte å få bygd garasja iløpet av sommaren same året. 

Brevet om byggeløyve lot vente på seg. Vi bur i eit landsbruks-, natur- og friluftsområde og det er derfor ikkje saksbehandlingstid på byggjesaker i desse områda. Vi ringte fem-seks gongar iløpet av sommaren til kommunen kor vi fekk signal på at det ikkje var noko problem med søknaden, og at saksbehandlar skulle sjå på saka snarast. Når ein høyrer dette så mange gongar utan at det skjer noko, så vert ein lei. Vi var bekymra for materialet som låg under presenningane og vi byrja utan løyve i slutten av august.

20.august hadde vi muren på plass og fire flinke mannfolk gjorde jobben i ein fei. Fordi det ikkje var heilt lovleg å byggje enno, kunne eg sjølvsagt ikkje blogge om det i tilfelle rottefelle.

 Bilen fekk prøvestå i garasja.

Iløpet av hausten skjedde det framleis ingenting med søknaden. Først i slutten av oktober, fem månadar etter søknadsdato, fekk vi eit mangelbrev. Eg er sjølv saksbehandlar innanfor kommunesystemet og kjenner forvaltningsreglane. Dette er langt over streken av kva som er akseptabelt. Er det manglar i søknaden, ja så skal ein ha beskjed kort tid etter at søknaden er mottatt. Det høyrer til historia at vi eig ikkje grunnen vi bygg på fordi målebrevet hadde feil koordinatar. Så naboen måtte søke dispensasjon slik at vi fekk bygge. Naboen var i kontakt med saksbehandlar fleire gongar etter at dette var levert, og han sa at alt såg greit ut og at det snart ville kome svar.

Så 19.november fortsette byggjinga av garasja. Fem mann var i arbeid denne dagen. Sjølv om vi ikkje hadde fått svar på søknaden måtte vi berre fortsette fordi materialet byrja verkeleg og verte dårleg.

Før jul hadde Espen festa asfaltplater på veggane, men i vinter har det ikkje skjedd noko. I februar var eg lei og sendte mail til saksbehandlar. Eg hadde bestemt meg for at no skulle all kommunikasjon skje skriftleg og om han ikkje gjorde jobben sin snarast ville eg ta kontakt med rådmannen. I slutten av februar i år fekk eg svar på mail om at søknaden ville verte behandla innan to veke. Og veit dokke kva, han holdt ord! Etter 9,5 månad med lovnadar og løgn fekk vi endeleg svar. 10 linjer med ord var alt som skulle til, men orda satt tydelegvis langt inne.

Så no er vi i gang igjen og det hastar verkeleg for materialet har det ikkje godt under presenningen. Vi må soppbehandle heile garasja og vere grundige med vasking, tørking og maling, men vi kryssar fingrane for at det går. I helga reiste fire mannfolk opp takstolane og Espen har planen klar på kva som skal gjerast framover. Dette må berre prioriterast og idag har Espen fortsatt litt for seg sjølv.

Slik ser det ut idag. Fleire står klar for å hjelpe Espen med å få ferdig dette vesle byggverket. Inne i huset vårt er det fullt i syklar og anna som skal vere i garasja, så eg gler meg veldig til taket og veggane er tette. Det er med stor glede at eg kan publisere dette innlegget, no håpar eg berre vi snart ser ein ende i historia.