Heng deg fast, her går det unna!

Det er ikkje så mykje blogging på meg for tida og det skuldast fleire ting. Som dokke kanskje veit så flytta vi til Valestrandsfossen for 4 veker sidan. Der vi flytta inn var det utriveleg av fleire årsaker og etter tre veker fant vi oss ein annan stad som vi no vert verande ei stund framover. Det har med andre ord vore eit kaos i ein månad no med kassar overalt og provisoriske løysingar for å få kvardagen til å fungere. Midt opp i flyttinga vart vi sjuke og vi har ikkje fått pakka ut slik vi har ønska, men det kjem seg snart tenkjer eg. I tillegg til at eg har fått ny jobb og Malin har byrja i barnehage, har eg også hatt nødt til å omstille meg frå å bu i by til å bu på landet. Eg ser nesten berre postivt på å ha flytta sjølv om den lokale butikken er dyr og har dårleg utval. Å vere avhengig av ferje er også nytt for meg, men det har sin sjarm...
Den store nyheten derimot er at vi har fått dispansasjon for frådeling av tomt på garden som Espen er oppvokse på. Vi har venta på svar i 10 mnd, og det er uendeleg rart at det no er avgjort. Vi veit no kvar vi skal busetje oss for all framtid (mest sannsynleg) og vi kan byrje å planlegge framover. Eg har dessverre ikkje internett for tida slik at eg kan vise dokke bilete frå tomtefeltet, men sjå for dokke masse tre og skog. Då har dokke tomta vår :-) Ønskjer alle ei god helg!

Den siste pust av sommar

Vi gjekk søndagstur idag i det utruleg vakre vèret vi har. 2008 har vore eit fantastisk år for for alle som likar seg ute, og idag fant eg nok eit bevis på det. Langs gjerdet ved eit hus sto ein stor flokk med lilla blomar og viste seg frå si beste side i sola. Og ikkje nok med det, men blomane hadde lokka til seg mange, mange sommarfuglar som var så utruleg vakre at eg måtte berre ta bilete av det heile.

Hei sveis!

Det er inga ukjent sak for dei som kjenner Malin at ho er veldig glad i hår. Malin elskar å kose med håret sitt og sovnar gjerne med ein lokk i handa. Ho kosar mykje med mitt hår også, og det er slik ho roer seg og har det trygt. Håret hennar har no byrja å vekse for fullt, og det står som regel rett opp. Tenkte å vise dokke bileta som vart tatt av henne idag. Bøtta som dokke ser på biletet er ho forresten veldig glad i saman med ein penn og to legoklossar. Då er alt topp.

Barnehagejenta vår

Igår byrja Malin i barnehage. Første dagane er ho i tilvenning og både eg og Espen fylgde henne første dagen. Ho fant seg fort til rette og kom i "prat" med dei andre ungane. Dei snusar litt på kvarandre, tar litt på kvarandre og seier nokre forunderlege lydar. Akkurat som dyra...
Denne bilen likte Malin og skulle ivrig prøve den ut. Skal tru om ho har arva noko av morfaren si bilinteresse?

Alle leiker må undersøkjast sjølvsagt. Etter ein og ein halv time, var Malin trøtt og ville berre vere med mamma. Men ein og ein halv time er no bra synest vi, og gleder oss til fleire dagar kor ho får vere saman med born og vaksne i barnehagen.

Om ikkje barnehagen var nok, tok vi ho med oss på ein trilletur i eit flott turområde. Malin koste seg då også og sitt så fint i vogna si medan ho kikar på alt rundt seg. Alle var samde om at det hadde vore ein fin dag.

Malin fyller eitt år idag

Veslejenta vår har idag fylt sitt første år. Eg tenkjer tilbake på dette året som har gått så fort, og eg er einig med meg sjølv at det vert kjekkare og kjekkare for kvar dag som går. Livet har fått ei større meining etter at Malin kom til verda. Sjølv om det er travelt og vi er slitne, gløymer vi det så lett når ho smiler eller søv så søtt.
Dagen idag starta friskt for gebursdagsbarnet. Mor i huset skulle på jobb, og Malin og pappa måtte køyre henne då pappa trengte bilen. På bilete her ser dokke henne klar til å gå om enn litt trøytt i trynet...
I ettermiddag har vi hatt selskap. Tilsammen var det 5 born frå 1-4 år. Eirik hjelper til med å opne gåvene då Malin ikkje heilt har forstått poenget med akkurat det.
Dette er vel ein typisk situasjon i eit barneselskap. Borna fyk alle vegar, det er rotete og kaotisk sjølv om mor i huset nettopp har strigla huset, og foreldre som prøvar å halde ei viss oversikt. På biletetet frå venstre ser dokke Malin på vei ut av stova, Trude, Julie ved bordet for å ete av restar på fat og i glas, Elias med ein bolle i ei bøtte (bollen skulle kokast, sa han), Bjørg, samt Ole Christopher på veg ut verandaen.
Malin kosar seg blant born og leiker. Det er topp å vere gebursdagsbarn.

Blid og strålande nøgd med dagen. No er ikkje Malin nokon baby lenger, og om ei veke startar ho i barnehage. Livet vert meir og meir spennande, så heng med om du kan.

Husmora vår i full sving

Det er ikkje alltid lett å vere liten og nyskjerrig på alt som skjer rundt seg. Malin skal alltid vere der eg er og allerhelst undersøkje det eg held på med. Oppvaskmaskina, klesvasken, matlaginga, støvsuginga, vaskinga og ryddinga. Alt må prøvast og undersøkjast. Eg håpar sjølvsagt at viljen til å hjelpe mor si vil forsette også langt inn i tenåra. Om ho vert som mor si på det område, har eg ikkje så mykje å vente i åra som kjem. Derfor er det berre å nyte bileta og leve i trua.

Bryllaupsfest i Bergen

Igår gifta Siv og Erlend seg. Siv er frå same stad som meg og eg har kjent ho gjennom skule og fotball sidan vi var sju år gamle. Ikkje visste vi i 1988 når vi gjekk ilag frå skulen første førskuledag, at mor mi og far hennar skulle gifte seg 18 år seinare... No når vi er i familie, var eg ein av dei heldige som fekk med meg vigsel i Årstad kyrkje og fest ved Kjøttbasaren i Bergen. Det var storfest i byen grunna Tall Ship Racing, og liv var det også i bryllaupslokala. Nydeleg brud, flotte talar, god musikk og fin stemning.

.........

PS: Beklagar lite innlegg for tida, men alt mitt kreative rot er pakka ned grunna visningar. Vi flyttar om tre veker, og alt er berre kaos. Lovar å kome sterkare tilbake når alt styret er over.

Lavendel

Lavendel er utruleg vakre og duftar godt. Vi var på besøk hjå onkelen til Espen på Burkeland som har lavendel i bedet sitt. No når sola har forsvunne passar det med litt stemning i bloggen. Imorgon byrjar eg å jobbe igjen, og mykje tyder no på at sommaren er på hell.