Blomster og bier

Ein solrik januardag

2012-01-22T19:55:00.000+01:00

Det var vel på tide å blogge om noko anna enn hage. Det er trass alt ikkje den tida av året vi er inne i, men det har vore så mørkt og dystert i fleire veker no at det passa med litt å sjå fram mot. Idag hadde vi ein flott dag med sol og kvitdekt bakke. Det er ikkje mykje kvitt som er utanfor, men nok til at det lysar opp.

Malin tok på seg skisko og tok skia ut. Det vart ikkje heilt slik som planlagt for snøen var hard som glas. Det er likevel alltid godt med litt frisk luft og sol i fjeset.

Emil hadde store problemer med å halde seg på beina fordi det var så glatt.

Med litt hjelp så gjekk det bra, iallefall litt betre.

Emil koste seg ut sjølv om det vart litt vanskeleg for han. Vi måtte til slutt bere han noko som forkortar utetida drastisk.

Pappa og Malin skuar nedover dalen. Eg trur nok Malin håpar på litt mjukare snø ganske snart for ho er veldig ivrig etter å få prøve dei fine, rosa skia sine. Emil og Malin likar godt å vere ute og leike, så vi får håpe at vi får litt betre leikeføre. Det har vore ein flott solskinnsdag idag og det er godt å vite at vi er mot lysare tider.

Så har eg gjort det igjen

2012-01-18T21:31:00.000+01:00

Eg har vore ute med VISA-kortet igjen. Impecta har fått seg ein ny kunde i meg, dei har så utruleg mykje fint og til ein rimeleg penge. Denne gongen var det stauder i den lilla hagen som skulle kjøpast. Eg har fått i hus dei blå og skal i gang med å så fleire av sortane. Det som er litt vanskeleg er å skilje kva som er blått og kva som er lilla. Dei skriv gjerne at det er blå, men på bilete viser det tydeleg at planta er lilla. Så det kan hende eg må ommøblere litt i beda etterkvart som dei blømer.

Moses brennande busk 'Dictamnus Albus'. Det dramatiske navnet er jo nesten verdt heile planta. Denne vert 80 cm og blømer frå juni til august.

Sommerasters 'Callistephus Chinensis Silvery Blue'. Sommarblome. Den vert 70 cm, passar flott til snitt og blømer frå juli til oktober.

Höstvädd (svensk) 'Scabiosa Caucasica Isaac House' . Vert 60 cm og blømer juli til oktober.

Engklokke 'Campanula Patula'. Denne vert 40 cm og blømer i juni til august. Såg diverre ikkje at den var toårig før eg hadde bestilt, men det får våge seg.

Porselensanemone 'Anemonopsis Macrophylla'. Den er så vakker at eg nesten får lyst til å gjerde den inn. Det er ikkje sikkert at denne blømer første året, men den er verdt å vente på. Den vert 75 cm og blømer frå juni til august.

Nordamerikansk ridderspore 'Delphinium Exaltatum'. Denne vert 40/ 120 cm (står begge deler på omtalen) og blømer juli til september.

Fleire av desse har få frø i pakken i motsetning til veldig mange av dei frøa eg bestilte sist. Det er uansett rimelegare enn dei frøa ein får i Noreg. Eg var på det lokale hagesenteret idag, og eg synest utvalet er ganske keisamt. Utvalet ber preg av at det er grønnsaker og sommarblomar som det er mest av, men det er kanskje det folk vil ha?

No skal eg ikkje bestille fleire frø, eg skal no ha plass til alle såpottene og. Eg manglar litt blomar som spring ut i april og mai, men då får eg kanskje kjøpe tulipanlaukar, krokus og anna til hausten. Neste plan er å bestille roser og klematis og etterkvart liljer. Arbeid har eg iallefall fått meg, men for meg er det berre kos og balsam for sjela. Spørs om Espen meiner det same. Fint skal vi iallefall få det.

Oversikt over dei finaste rosene i rosa, kvit og lilla

2012-01-16T11:08:00.000+01:00

For ei veke sidan hadde vi eit kraftig tordenvèr over oss og internett slutta sjølvsagt å fungere. No har nytt modem kome i hus og eg kan fortsette hageplanlegginga. Eg har kartlagt kva roser eg synest har dei beste kvalitetane og som kan vere aktuell å plante i hagen. Eg har som sagt ein blå og ein lilla hage under planlegging, men den rosa hagen har eksistert i ein sesong allereie. Det manglar litt i den framleis og derfor har eg funne ein del rosa roser som passar godt her. I den blå hagen vert det kvite roser sidan blå roser ikkje finnast.

Stilkrose 'Blue Moon'. Kjærleik ved første blikk og den einaste lilla rosa eg fann som eg synest er fin. Høgde 60-80 cm, klimasone H4 (Vestplant as).

Klatrerose 'Coral Dawn'. Rørande vakker. Høgde 2,5-3 meter, klimasone H4 (Vestplant as).

Klatrerose 'Climbing Snow Princess'. Høgde 2,5 meter, klimasone H4 (Plantasjen).

Klaserose 'Astrid Lindgren'. Høgde 0,8- 1 meter, klimasone H6 (Vestplant as).

Stilkrose 'Karen Blixen'. Høgde 50- 80 cm, klimasone H4 (Vestplant as).

Klaserose 'Schneewitchen'. Høgde 1,1 meter, klimasone H5 (Vestplant as).

Klatrerose 'Constance Spry'. Høgde 3 meter, klimasone H4-H5. Kraftig duft, Austinrose. Ikkje så lang blometid, men denne er til å ete opp. Sjå kor vakker den er! (BoGrønt Rom)

Klaserose 'Mary Rose'. Høgde 120 cm, klimasone H5. Austinrose. Kraftig duft, remonterer godt heile sesongen (Vestplant AS).

Buskrose 'Louise Odier'. Høgde 1-1,2 meter, klimasone H6. Austinrose. Kraftig duft, blømer fleire gongar (Vestplant AS).

Har du nokre gode forslag til roser som helst er fylte og store i lilla? Eller ei anna rose som eg har gått glipp av? Roser er utruleg vakre, men fordi dei ikkje blømer frå vår til haust så kjem eg ikkje til å ha eit eige rosebed. Eg treng ein del klatreroser som saman med klematis vil fylle buer og espalier. I tillegg vil stilkroser og klaseroser vere innimellom stauder og liljer. Tenk om dette vert sant, tenk om det faktisk vil verte slik som eg har tenkt? Sukk.. kjenner eg kan lett verte veldig lukkeleg.

Meir hageplanlegging; Den lilla teltplassen

2012-01-09T16:00:00.000+01:00

Eg er verkeleg i siget og har teikna ein ny del av hagen som eg har planlagt skal gjerast noko med i år. Det er ikkje nye tankar, ideen fekk eg i sommar. Det eg gløymde å vise dokke i innlegget om den blå delen av hagen var korleis det ser ut der idag. Så det har eg gjort noko med no. I tillegg viser eg dokke den lilla delen og skissa av den.

Den blå hagen med kun to epletre idag.

Den lilla teltplassen. Vi har byrja å plante buksbom langs kanten av terrassa. Eit par haustfloks har og fått plass i jorda ved hjørnet av husveggen. Elles er det fritt fram for nytt liv. Det er her vi har satt teltet når ungane skal leike, derav navnet. Det er desse to delane eg har tenkt å gjere noko med i år i tillegg til at vi må anlegg meir plen. Eg håpar at dersom eg har ein god nok plan, skal det verte mindre vanskeleg å ta fatt og fullføre mykje av den.

Skissene teiknar eg i paint, eg gjer ikkje det vanskelegare enn eg må. Det er ikkje store flekken, men eg trur det kan verte ganske koseleg med camping i dette området. Litt av poenget er å gjere det til eit lite eventyr når vi overnattar i teltet (som vi enno ikkje har gjort).

Lilla og kvite stauder, lilla klematis, lilla og kvite roser og så vidare. Nyansene er mange, det vert spennande om vi får det til slik som eg har tenkt det.

Frøbestilling frå Sverige

2012-01-08T09:41:00.000+01:00

Den første bestillinga av frø er gjort. Det er blått og noko kvitt som er bestilt denne gongen. Eg har tenkt å ha dei same staudene fleire stadar i bedet, så dette vert flott trur eg. Frøa kjem frå Sverige og firmaet Impecta. Dei har eit godt utval og prisar som ikkje kan samanliknast med dei du får i Noreg. Skal du få mykje for pengane bør du bestille frø frå utlandet. Pass berre på å bestille for under 200 kroner for å unngå toll.

Nokre få sommarblomar vart også bestilt, blant anna pionvalmue.

Dette er Cikoria. Nydelig lysblå farge.

Dersom dokke er interessert i å sjå kva planter eg har kjøpt har eg laga liste under. Synest det er greit å ha blogg når eg skal halde orden på ting. Eg har ein tendens til å ha mykje lappar og lister rundt meg som eg til slutt mistar.

Frøliste:
Blåklokke- Campanula rotundifolia
Polarblågull- Polemonium Boreale 'Bilbo'
Kinesisk ridderspore- Delphinium Grandiflorum 'Dwarf Blue Butterfly'
Alpeakeleie- Aquilegia Alpina
Ekte stormhatt- Aconitum Napellus
Blå kuletistel- Echinops Bannaticus
Blå valmuesøster- Meconopsis Betonicifolia
Moskuskattost- Malva Moschata 'Alba'
Cikoria- Cicheroium Intybus
Kornblom- Centaurea Cyanus 'Classic Fantastic'
Romersk ridderspore- Consolida Ajactis 'White King'
Pionvalmue- Papaver Somniferum 'White Cloud'

Dei tre siste er eittårige, dei andre er stauder. Alt saman kostar under 200 kroner. Slikt gjer meg glad.

Skisse over den blå hagen

2012-01-06T21:38:00.000+01:00

Eg har alltid tid til å tenke på hage. Og tankar har gått til handling i den form at eg har laga eit førsteutkast over den vestlege delen av huset. Det er den delen som vender seg mot vår einaste nabo. Her kjem sola først om ettermiddagen då sola går ned på denne sida. Eg har ikkje gjort det enkelt for meg sjølv når eg har delt inn hagen i fargesoner. I tillegg skal det bløme frå april til oktober og høgdene må passe inn med omgivelsane. Denne delen skal vere i blåtonar med kvitt og kanskje noko sølv. Hagen er omlag 13 meter lang, 9 meter ved epletrea og 4,5 meter ved rosebua.

Vi har to epletre på denne sida idag, og dei har eg flytta ein gong allereie. Det ser ut til at eg (les Espen) må flytte dei ein til gong då eg ikkje fekk dagens plassering til å stemme. Eg har tanke om at det ein gong skal vere mogleg å ligge i hengekøye mellom desse. I tillegg er det ganske fint med ein sitjeplass ved epletrea som gir utsikt over eit vakkert blomebed. Som bonus vert det også utsikt mot solnedgangen.

Rosebua som eg har merka med lilla skiljer denne hagen og neste hage som eg har valt å kalle "Den lilla teltplass". Den får eg ta i neste omgang. Det lysegrå feltet øverst er huset vårt, det grå feltet ved sidan av er ein lav tørrmur. Eg har tenkt at det hadde vore fint med ein vegg her med klatreplanter. No må eg i gang med planteliste for området. Eg skal ha roser, klematis, stauder og sommarblomar. For å gjere det rimelig skal eg bestille frø og så sjølv. Noko må eg sjølvsagt kjøpe. Bedet nærast husveggen har halvskugge så det er mykje eg må tenke på. Godt å vere i gang iallefall.

Ein roleg start på året

2012-01-05T13:43:00.001+01:00

Det meste av jula er rydda ut og det er på tide å tenke framover. Dagane er framleis mørke, men det går likevel mot lysare tider og det er godt å tenke på. Eg starta året slik som eg slutta det gamle med å vere sjuk. Det skjer derfor ikkje så mykje akkurat no, men hovudet mitt har fått tid til å kverne på frø, stauder, roser, klematis... ja det meste som har med hage og gjere. Eg håpar eg får vist dokke litt av planane mine.

Januar og februar er to månader det er fargelaust både ute og inne. Den raude julepynten er plutseleg borte og alt ser heilt tomt ut. Så ventar ein berre på våren og alt som skal skje ute at ein gløymer det som er midt i mellom. Eg har ikkje så mykje pynt i stova då Emil likar å røre alt han ser, det er berre sjenken som står i fred. Det er vel litt av grunnen til at dokke aldri får sjå noko meir enn det...

Legg merke til sølvfatet som er på bilete over. Eg har pussa sølv idag og det vart så fint og blankt. Det var på tide, hendene mine og kluten var heilt svart. Sølvkoppen og noko sølvtøy fekk også ein omgang med kluten, at eg ikkje har gjort den enkle jobben før. Ikkje mykje som skjer altså sidan heile Noreg no har tilgang til å vite at eg har brukt dagen på å pusse sølv.

Ikkje tid til å vente

2011-12-31T20:24:00.002+01:00

Berre nokre timar frå det nye året snik eg med eit hageinnlegg. Ein kald, rask tur ut i hagen igår kunne fortelje at det har vore mildt så langt i vinter, og laukane eg planta tidleg i haust har no søkt opp til dagsljoset. Eg dekka dei til med greiner av eine og håpar på det beste.

Det er godt det er fleire enn meg som lengtar etter vår, men dette var litt tidlig synest eg. Eg håpar i det lengste at vi ikkje skal oppleve den vinteren vi hadde ifjor med barfrost og lang kuldeperiode som øydelegg vakre blomar og planter. Så kjære vakre tulipan og påskelilje, vert i jorda litt til.

Ønskjer alle ei fin nyttårsfeiring.

Tankar om blått i hagen

2011-12-28T17:38:00.003+01:00

Sjølv om det framleis er jul og vinteren er lenge enno, kjem eg ikkje bort ifrå å tenke litt på hage. Eg er for tida sjuk og har god tid til å tenke på kjekke ting. Idag har eg byrja å tenke blått i hagen. Tanken er at eg skal ha ei sone med blått, ei sone med lilla og ei sone med rosa rundt huset. Noko raud/rosa må eg vel få til og. Dette skal ikkje gjennomførast på ein dag, men over tid. Eg må berre ha planane klare, iallefall ein ide om kva eg ønskjer. Eg har ein tendens til å skifte meining ganske ofte, men eg må vel lande til slutt?

Den første planta er kosakkveronika som eg allereie har. Det er alltid spennande å sjå om dei overlever desse plantene, men eg hadde denne planta før i år iallefall. Nydelig lysblå farge.

Blåklokker veks vilt, men eg vil gjerne ha dei i hagen og. Eg klarer ikkje å sjå kva som er blåklokke dersom eg berre ser blada, og blomar skal ein ikkje spa opp når dei blømer har eg høyrt, ja så då må eg vel kanskje så sjølv?

Forglemmegei planta eg og ein stad på tomta, men er litt usikker på om dei har overlevd. Fine er dei iallefall og er obligatorisk i gamle staudehagar.

Agapathus heiter denne, veit ikkje om det finnast noko norsk navn. Eg listar opp planter eg synest er fine og som er blå, men det er ikkje sikkert at eg får tak i dei eller har tenkt å kjøpe dei.

Clematis macropetala lagoon. Eg har tenkt å ha ein klematis på det blå området. Det er viktig at den ikkje vert lilla, men faktisk er blå.

Iris. Ein klassikar og ei vanleg staude. Fin er den og. Eg tenker at området skal ha ei blanding av lyseblått og mørkeblått og sannsynlegvis kvitt for å bryte opp alt det blå. Epletrea står i denne sona og blomane der er jo kvite.

Perleblomst. Bilete er tatt av meg då eg har denne i hagen. Dei fleste bileta i dette innlegget er tjuvlånt. Eg anar ikkje kor dei kjem ifrå, eg har berre googla.

Ridderspore. Dette bilete er også mitt. Eg vart freista til å dele og flytte riddersporen på seinsommaren, spent på om det kjem opp noko til våren. Dersom den ikkje lever, har eg lært at eg ikkje skal gjere det igjen. Eg har tatt frø av denne og skal plante nye til våren, men eg har lest at det er ikkje sikkert dei nye plantene får same farge som den planta som frøa kjem ifrå.

Alpeklematis Francis Rivis. Klematis kan vere så mykje meir enn mørklilla. Kjempefin!

Klematis Mrs Cholmondele. Dette må vere den finaste av dei tre blå klematisane eg har funne. Eg elskar lyseblått og denne var heilt nydeleg! Skal tru om den er slik som på bilete?

Blåveis. Ein skjønn, vakker liten blome.

Har du erfaring med blå stauder som ikkje bryt mot det lilla? Eller ein ide om ei staude eg ikkje har fått med på lista her? Eg vil iallefall høyre om det. Kanskje eg ikkje er aleine om å tenke hage 28.desember?

Oppdatering 31.12.2011:

Eg har fått så mange gode tips frå Ellen med bloggen Roser og Patina at eg vel å oppdatere blogginnlegget. Denne lista med blå planter kjem eg til å ha nytte av fleire gongar og det er meir ryddig å ha ei fullstendig liste her enn å ha nedskrivne navn på masse små lappar som forsvinn i alt rotet. Eg håpar og at oversikta kan ha nytte for andre og eg har derfor laga meg ei oversikt heilt nederst på sida slik at det vert lettare å planlegge samplanting.

Blå valmuesøster.

Russeblåstjerne.

Italiaklokke.

Blå kuletistel.

Veronika.

Storkenebb. Denne i blått. Det latinske navnet finn du i lista under.

Liste over blå laukar og stauder som eg synest er fine

Navn Botanisk navn Blømetid Høgde
Kosakkveronika Veronica gentianoides 'Variegata' juni-juli 40 cm
Blåklokke Campanula rotundifolia juni-aug 15-30 cm
Forglemmegei Myosotis scorpioides juni-aug 20-40 cm
Agapanthus Agapanthus campanulatus juli-aug 50-70 cm
Klematis Clematis macropetala lagoon mai-juni 5-6 m
Iris Iris germanica juni- juli 0,7- 1 m
Perleblomst Muscari aucheri 'Blue Magic' april-mai 15 cm
Ridderspore Delphinium juli-sep 1,5 m
Alpeklematis Clematis Alpina Francis Rivis mai-juni 2,5-3 m
Klematis Clematis Mrs Cholmondele juni- sep 2 m
Blåveis Hepatica Nobilis april-mai 10-20 cm
Valmuesøster Meconopsis grandis mai-juni 1 m
Russeblåstjerne Scilla Sibirica mars-april 10 cm
Italiaklokke Campanula garganica juni-juli 10 cm
Kuletistel Echinops sphaerocephalus juni 1-2 m
Veronika Veronica austriaca mai-aug 10-35 cm
Storkenebb Geranium Mrs Kendall Clarke juni-juli 90 cm

Lista ser litt rotete ut når eg publiserer den, beklager det, eg får ikkje til å endre det.

Vil du sjå på muffinssamlinga mi?

2011-12-28T14:39:00.002+01:00

Eg har vist dokke muffins før, men no har eg auka samlinga. Det vert ikkje fleire enn dette trur eg. Synest dei vart veldig søte, men det gjenstår å forme botnen litt meir. Eg må finne ein måte å stive dei av på slik at dei står betre.

Kaker er vel ikkje det som fristar mest blant folk no i romjula, folk er kanskje mette av søtsaker? Desse muffinsane er iallefall kun til å nytast for auge.

No må eg finne meg noko anna handarbeid, men eg har ikkje heilt tanke om kva enno. Time vil sjåv.

Jul i stova

2011-12-26T13:18:00.000+01:00

Så er det 2.juledag og gjestane har reist heim. Vi har hatt ei koseleg julefeiring med fem voksne og to born. Mat har det vore nok av og ungane har kost seg med leikene dei har fått til jul.

Emil har vore sjuk og har ikkje vore pigg i det heile. Då Emil ville kose med mamma og trengte trøyst, hadde vi heldigvis to bestemødre som stelte i stand mat. Om morgonen tok farmor ungane og vaska opp. Kan ein be om meir luksus? Emil er betre idag og har for første gong på fleire dagar fått sove lenge nok om dagen.

Malin har hatt ei flott julefeiring. Ho var i ekstase då pakkane skulle opnast og var ikkje så opptatt av kva som var inni, men å få opne fleire. Ho fekk mykje ho ønska seg, og leikene har vorte utprøvd både av henne og Emil. Julenissen var også på besøk, det vil seie han landa på taket med eit tramp, og la igjen godteposar til henne og Emil. Malin har snakka mykje om dette sidan.

Eg har ikkje sendt julekort i år då det var mangel på tid. Eg har hatt eksamen og resultatet var overraskande bra. Eg takkar for alle flotte kort og helsingar vi har fått, og eg lovar å kome sterkare tilbake neste år. Eg vil derfor nytte høve til å ønskje alle ei god jul vidare og eit godt nytt år.

Den mørkaste dagen i året

2011-12-21T12:27:00.001+01:00

Dette er innlegg nr 500 og eg hadde tenkt å ha ei lita gåvetrekning i samband med dette. Det vert det altså ikkje, eg hadde ikkje heilt gløden akkurat no. Det kjem nok fleire stunder kor eg kan ha gåvetrekning. No er det jula som står på programmet og hovudet kvernar rundt alt eg må huske å handle. Det er likevel noko som skjer før julafta, og det er at sola snur! No har vi lysare dagar å sjå fram imot.

I eit forsøk på å fange nokre solglimt tok eg samstundes bilete av den nye krukka mi som eg kjøpte igår. Eg kjøpte to stykker. Synest dei var litt finare enn kvite, blanke IKEA-krukker til 12 kroner. Dei tova nissane er laga av ei dame her i bygda og som eg kjøpte på julemesse ifjor. Veldig fine og koselege.

Skjønnaste Emil. Ungane er heime idag, heilt uplanlagt, men eg veit ikkje om dokke er klar for ei snø og bilhistorie til? Kort fortalt så har vi to bilar. Den eine treng nytt batteri. Den andre manglar bremserør etter at hurtigkjettingen på eine sida slitna og øydela bremserøret som gjer at bilen ikkje kan bremse. Så her sitt vi utan transportmoglegheiter, iallefall fram til vi får nytt batteri på to-setaren. Det vert to turar til barnehagen imorgon, men det er no betre enn ingenting. Den andre bilen må på verkstad, men NAF kan ikkje hente bilen før snøen i bakken er forsvunne. Det er ikkje så lett å kome seg opp før det. Er det rart eg masar om vind og regn?

Sol og snø er utvilsamt vakkert. I skrivande stund har eg sola i augene så då har dokke beviset for at vi har sol heile året. Er ikkje det litt status å ha sol heile året? Sei ja, eg treng nokre gode grunnar for kvifor vi bur her om vinteren.

Ikkje noko vinnarbilete det her, men Malin synest det var fint med bilete av dissestativet og "stjerna" som lyste.

Heilt til slutt, eit bilete til alle som stressar fram mot jul. Mine skitne vindauge. Eg trur ikkje eg har vaska dei meir enn ein gong sidan vi flytta inn. Og kvifor skal eg vaske og herje i den mørkaste tida av året? Det er ikkje lenge om gongen vi har sol i vindauge, det meste av døgnet er svart. Det er om våren eg har behovet for å vaske. Den skarpe sola som skin lenge inn i stova, huda er guffen og bleik og du ser alle støvkorn i heile huset. Sjølvsagt kan du vaske både vinter og vår, men det er ikkje nødvendig.

Ønskjer alle lukke til med siste innspurt i julehandelen. Husk at butikken er berre stengt i to dagar og at du treng ikkje hamstre.

Medan vi ventar på jul

2011-12-18T20:02:00.003+01:00

Det er fem dagar til jul og eg merkar meg at huset byrjar å verte ryddig. Det er eit godt teikn. Eg har framleis til gode å bake, men så er det fem dagar igjen og alt kan skje. Presangane er nesten ferdig innkjøpt, berre gåve til ungane igjen. Huset er så smått pynta og då er vel alt greit. Ja for eg er ikkje ambisiøs og har ikkje tenkt å ha all verdens med pynt, frysaren og kjøleskapet fullt av heimelaga mat osv. Slik er det i år iallefall.

Adventskalenderen med sjokoladar inni er populær og Malin merkar seg at det nærmar seg slutten. Eg har min eigen kalender, kjøpt på Farmors Hus. Eg er heilt avhengig av voksduk og har tatt fram julevoksduken for anledninga. Den kvite duken får først kome fram på julafta.

Nøtter er både dekorativt og godt Det har visst vorte ein tradisjon å pynte med nøtter. Fordi eg er så glad i lyseblått, er det ei utfordring å pynte til jul. Jul er for meg raudt uansett kva moten er, men det såg ut til at dette fungerte ilag med den lyseblå sjenken som du så vidt kan skimte.

Det meste av julepynten har eg fått i julegåve gjennom åra. Det har aldri vore noko særleg populært i mine auge fordi eg såg på pynten som "kjerrringaktig". No har eg tydeligvis vorte kjerring fordi mesteparten av pynten sett eg pris på. Det har tydeligvis vore nokre tanter som har tenkt litt lenger fram enn meg. Forøvrig har eg ein tass på 2 år som ikkje klarar å halde fingrane vekke, akkurat som ifjor, men i år kan eg snakke til han i det minste. Om han høyrer etter då vel og merke...

Malin klar til nissefesten i barnehagen idag. Det er heilt fantastisk å ha ein fireåring i hus når det nærmar seg jul. Det er så kjekt å sjå kor ho gleder seg. Ho tell ned dagane, ho ønskar seg alt ho ser i leikekatalogane, ho syng og jallar på julesangar og ventar på både julenisse og bestemødre som skal kome på besøk. Ho har til og med skrive på til og frå-lappane sjølv. I barnehagen er det mykje snakk om jul og nesten kvar dag fortel ho frå barnehagen om noko som har med jul å gjere som dei har gjort eller lært. Eg har ikkje hatt den heilt store julestemninga sjølv etter at eg byrja å verte voksen, men no merkar eg at gleda er tilbake nettopp fordi eg har fått born som gjer jula meiningsfull.

Hekla muffins, heilt utan smør

2011-12-12T11:56:00.003+01:00

Eg er ikkje ein av dei som står i kø for å få meierismør frå Danmark. Eg er ikkje lei meg for at vi manglar smør i det heile tatt, det gjeld berre å finne alternativ. Eg laga muffins igår og bestemte meg for å gjere dei kalorifrie og heilt utan smør. Desse muffinsane er evigvarande og eit sukker for auge.

Eg kjøpte meg eit stettfat tidlegare i haust som eg har ønska meg lenge, og tanken var å ha vakre muffins til pynt på kjøkkenet. Fruktfat varer så kort, det går kanskje eit par dagar så er det ei frukt som har byrja rotneprosessen. Muffinsen er lyseblå sjølvsagt, eg kjem ikkje utanom det. Min første muffins er produsert etter oppskrift som du finn her. Eg har gjort oppskrifta litt om med glasur på toppen, men elles er det ganske likt. Garnet er bomullsgarnet Muskat frå Drops. Eg er ingen tilhengar av bomullsgarn, men ullgarn hadde ikkje vore fint. Eg er igang med å produsere fleire, forhåpentligvis litt finare, og eg vil sjølvsagt vise dokke resultatet.

Skiglad fireåring

2011-12-11T20:58:00.002+01:00

Malin har endeleg fått sine første ski. Prinsesseski sjølvsagt. Ho har prøvd litt ski i barnehagen, men her heime har det kun vore akebrett tidlegare. Vi kjøpte skia igår, midt i julerushen, og Malin gledde seg slik til å prøve dei. Sjølvom det er ein del av julegåva fekk vi klar beskjed av ho at vi måtte ikkje pakke dei inn. Ho skulle ha dei no.

Ho hadde faktisk litt teknikk på korleis skigåing skulle vere, og ho var ganske flink til å gjere dette nesten for første gong. Ho synest det var kjempekjekt, men Malin var tydeleg på at ho trengte meir trening.
"Pappa! Hjelp meg!" Trening gjer meister. Vi håpar ho får mykje skiglede framover.

Naturens terrorist

2011-12-10T22:13:00.003+01:00

Eg slit litt med å vere positiv for tida. Det er ein av grunnane til at bloggen står litt stille. Eg er ikkje sjuk eller noko, men vinteren er komen. Vinterdepresjon tenker du? Skulle ønske, men det er berre årstida som terroriserer oss. Dette er gammalt nytt, eg tyt på dette året rundt slik at eg er sikker på at ALLE får det med seg at vi har det mykje verre enn alle andre... Om det er det du trur eg gjer, ja kanskje det, men neida det er ikkje det som er tanken. Eg berre hatar vinteren og det er innlegget idag handlar om.

Før var vinteren fin. Kvit snø gjorde vinteren lysare. Snø var varsel om jul. Snømann, snølykter,majestetiske fjell i vinterdrakt... Julestemninga som alle på facebook tyt om når første snøfugget fell på bakken kjenner eg ikkje lenger. No kjenner eg berre forakt. Og kva har skjedd? Eg har flytta på ein topp. Ein stad som ingen skulle tru nokon kunne bu. Mamma sa til meg før vi bygde huset "Korleis skal det gå om vinteren, bakken er veldig bratt?". Espen hadde budd der i 20 år, aldri vore snø der, "det er vel ikkje noko problem?" Å så naiv ungdommen er....

Ei lita historie frå kvardagen: Eg skulle på seminar og julebord igår og skulle køyre bil nr 2. Den sto ved huset og veien ned var isete og farlig glatt. Vi avgjorde at Espen skulle køyre meg noko som resulterte i at både eg og Espen kom for seint til jobb (destinasjon Flesland). Vidare var avtalen at Espen og borna skulle hente meg idag tidleg. Bilete over viser kva problemer turen først byrja med. Espen satt bom fast og bilen spann seg djupt ned i gjørma så jorda spruta. Eg var ikkje tilstades, men bilete av trillebår og spade seier vel sitt. Då bilen endeleg kom seg laus var det likevel ikkje berre til å køyre. Kommunen gløymer visst at det bur folk her oppe og den delen som dei har ansvar for å måke og strø var rett og slett uframkomeleg. Strøbilen vart tilkalla og dukka opp 1,5 time seinare. Heile nabolaget måtte sitte å vente på dei og timane gjekk. Eg måtte sjølvsagt finne meg andre skyssmoglegheiter, men planen var likevel at Espen skulle kome til Åsane. Det viste seg at strøbilen sparer på grusen, vegen var framleis uframkomeleg etter at han hadde vore her, og han måtte tilkallast på nytt.... Espen og ungane kom til Åsane. Slitne, trøytte, svoltne... Med julerush ein laurdag i Åsane vart vel dagen så lite koseleg som den kunne verte, og vi reiste heim. Heim til is og tåke.
Og kva kan vi gjere med dette? Vegen har vorte forbetra, det fungerer slik som det skal. Vi har kjøpt snøfresar, den fungerte som den skulle. Første gongen. Allereie etter andre gongen ville ikkje den meir.... Festleg. Eg har ikkje fleire ord. Eg ønskar meg storm, eg ønsker meg regn. Eg ønsker meg firhjulstrekkar.

Om nokon synest eg er veldig negativ, javel, eg bryr meg ikkje. Dagen idag er ikkje tid for å blogge om vakker juleinnpakning, julekransar og adventslys. Eg er berre lei. Og når God Kveld Norge er det einaste som er sjå på tv, ja då er det vel berre å legge seg.

Søndag før jul ein gong

2011-12-04T16:01:00.003+01:00

Klokka er 16 og ute er det mørkt allereie. Helga er snart over og eg funderer på kor helga har vorte av. Eg sitt og førebur meg til eksamen som er om tre dagar. Det er ikkje så lett å få så mykje tid til førebuing som eg først hadde tenkt meg. Medan eg lagar bidragskalkyler, kontantstrømmar og vurderer om kostnaden aukar eller minkar resultatet, ligg resten av gjengen på sofaen. Den største snorkar, den mellomste har slokna og den minste ligg på sofaen og hermar etter lyden av den største.

Eg har tent adventslysa idag. Det skulle visst vere to. Eg har ikkje hatt tid til å tenne det første før, men det spelar inga rolle for lysa får ikkje stå så lenge før ungane vil blåse det ut likevel. Slik får det vere i år. Eg gleder meg veldig til 8.desember. Då er eksamen over og juleførebuingane kan ta til. Kanskje tørkar eg støv slik som ifjor, har ikkje heilt bestemt meg, men eg skal iallefall bytte ut blomane i vindauge. Mine stakkarlege pelargoniar har stått i vindauget alt for lenge og har nok behov for ein liten vinterdvale.

Dette blogginnlegget vert no avbrutt av den minste som vil teikne sjølvkostkalkyle og rekne nullpunktomsetning på sin måte. Ønskjer alle ein fin kveld.

Siste haustdag

2011-11-30T15:12:00.003+01:00

Det er siste dag i november og hausten er forbi. Det er framleis ikkje noko teikn til vinteren og det er eg veldig glad for. Ute bles og regnar det meir enn vanleg og innekos får eit nytt begrep. Sjølvsagt er det koseleg med vind som ular utanfor, men ungane ular dei og...

Sola viste seg så vidt idag og då var eg raskt framme med kamera. Det har hagla, regna, tordna, lynt og blest idag, og for å gjere vèret komplett så kom sola og. Kan ikkje vere lett å vere metrolog.
Malin har vore heime idag. Ho har stygg hoste og magen har ikkje vore på hennar side. Vi tok ein rask luftetur ut, men hosten var så stygg at vi gjekk fort inn igjen. Ein liten tur på dissa var det likevel tid til.
Malin lo slik fordi ho dissa skeivt. Det var visst veldig morosamt.
Imorgon er det 1.desember og vi skal byrje å opne adventskalender. Malin tell ned dagane til jul og ho kan berre ikkje vente. "Det e so lenge til!". Det er kjekt med ungar som ser fram til jul.

Strikkefrustrasjon

2011-11-27T14:09:00.004+01:00

I alle mine år som strikkar har eg kjøpt garn på impuls. Det har vore umogleg å "berre kike" når eg har vore innom ein garnbutikk og det har resultert i mange nøster som aldri har vorte brukt. Då eg skulle flytte i nytt hus tenkte eg at eg ikkje hadde bruk for eller plass til alt garnet, heller var ikkje garnet like moderne lenger, så eg kasta og ga vekk masse. Til slutt satt eg med ei lita samling som eg har hatt som prosjekt å strikke opp.

Eg har vore ganske så flink etter mitt syn. Eg har knapt kjøpt nytt garn det siste året, men no er det nok. Over ser dokke bilete av mitt første prosjekt kor eg mangle pittelitt garn til å verte ferdig. Sjølvsagt eit garn som hadde gått ut av produksjon og som ikkje fans i ein einaste butikk i heile Noreg (ja eg har undersøkt).
Så skulle eg strikke ein babytjukkegensar etter oppskrift frå eige hovud. Her manglar eg eit nøste. Panda Pt er framleis i produksjon, men eg må visst ta meg ein dagstur ein eller annan stad for å få tak i det. Eg var blant anna innom ein garnbutikk på Åsane senter og han hadde ikkje hørt om Pt eingong! Kva gir du meg?!
Og no, noko så enkelt som eit par sokkar med garn frå Rema 1000 av alle ting. Mangla som dokke ser litt her og. Aldri i verda om eg gidd å finne eit nøste til av dette garnet, eg vert berre sur. Så no vert det ikkje sokkar til mamma til jul, og eg skal ha som nyttårsforsett at eg skal frotse i garn i 2012. Kanskje ikkje like impulsivt som i gamledagar, men utan tanke på å vere fornuftig. Eg kjenner eg gler meg.

Emil 2 år

2011-11-24T18:25:00.003+01:00

Emil fylte 2 år igår og det var stas, iallefall for foreldre og storesøster. Emil sjølv skjønna ingenting. Om morgonen fekk Malin gi den første presangen. Ho var sprekkferdig av spenning sjølv om ho visste kva ho skulle gi. Byggmester Bob-verktøykasse vart vel tatt imot både av søster og bror. Han fekk og opne opp pakkar med klede, deriblant ein Mikke Mus-gensar som han raskt tok på seg. Før han reiste i barnehagen opna han også opp Duplo-bossbil som han likte godt.

I barnehagen vart han møtt med flagg og bursdagskort på plassen. Han fekk krone, kappe og bursdagsang slik som alle får når dei har bursdag.
Heime igjen opna han pakkar med Brio-tog. Gog!! Rett på golvet for å leike, han hadde knapt tid til å ete middag. Det var ei beskjeden feiring, men eg laga Banana Split for anledninga. Dessert på ein onsdag vart veldig populært tatt imot.
Emil er flink å leike seg sjølv. Om han ikkje forstår kva som skjedde så var han iallefall takknemleg for dagen og gåvene han hadde fått. Eg forsøkte å ta eit bilete av han medan han såg i kamera, men han var travelt opptatt igår og hadde ikkje tid... Spørs om vi må lage ei kake til helga slik at han (les Malin) får blåse ut lys og sjå i kamera.

Eit lite livsteikn

2011-11-21T07:31:00.004+01:00

Dagane er så korte og det er så mykje som skjer at blogging har vorte nedprioritert i det siste. Før så sa eg alltid at det er så travelt før jul, men no er det travelt både før påske, før sommarferien, etter sommarferien osv. Dagane går i eitt og det er ikkje rom for å stoppe opp. Eg skulle gjerne stanse tida ein liten time, men oldtida sine fysikarar tillot oss ikkje det då dei bestemte 60 minutt, 24 timar, 7 dagar og 365,25 dagar i året.

Midt i det travle har eg fått meg litt pynt i to stovevindauge. Emil er framleis ikkje over stadiet kor ting ikkje får vere i fred i glaskarmen så då passar det fint med "høgt oppe"-pynt. Amplane er frå IKEA, planta heiter "Pletter i luften", og det heile står godt til gardinene mine frå IKEA (lommeboka sin besteven).

Huset vårt i fugleperspektiv

2011-11-07T19:38:00.002+01:00

Det er så nydeleg vèr for tida, ein gløymer nesten at det er november. Vi har framleis til gode å ha frostnatt hjå oss, men no kjennes det ut som det er like før. Eg trur ikkje det er så lenge til vi får sjå ei ny årstid, så då passar det vel bra med litt seinhaustbileter frå Dansebakken.

Dansebakken heiter tomta og området rundt huset vårt. Det har faktisk vorte eit offisielt navn no sjølv om det eigentleg var eit navn som familien til Espen hadde funne på tilbake i tid. No vert ikkje navnet gløymt iallefall. Huset står litt aleine som dokke ser og solar seg i dei fine hauststrålane. Vi har godt selskap med masse skog, den veks litt for fort etter vår mening. Espen kan fortelle om ein barndom med trefritt område akkurat her. Er det rart eg ønskjer meg sauer?
Ei slik oversikt gir eit bilete av kor mykje arbeid som gjenstår hjå oss. Garasjesøknaden er framleis ikkje behandla og materiale til garasja ligg under presenningar litt overalt. Vi har fått litt plen til no, men mykje gjenstår. Skråningane rundt huset skal også beplantast, men det vert lenge til! Ellers så kan vi invitere dokke til maling av hus neste år, vi har berre eitt strøk til no.
Huset vårt er skilt ut frå slekstgarden til mor til Espen. Gardshuset er det kvite som ligg midt på mot venstre. I tillegg til vårt hus, er det fire andre hus som er bygd i familien. Om dokke legg merke til kor sola skin, så er vi ganske heldig. Vi har sol heile året og god utsikt. Diverre er bakken opp "litt" bratt, men så lenge det ikkje snør går det greit.

Eg såg vèrmeldingane idag. 10 dagar framover med sol! Pass berre på å beskytte plantene mot nattefrosten, den er nok like om hjørnet no.

Fargerike blomar i hagen 1.november

2011-11-01T19:54:00.007+01:00

I fjor kom første snøen 20.oktober og frosten beit tak i oss frå november. Det var ein kald seinhaust med kalde grader som diverre tok knekken på mange planter. Idag var det 14 grader kl 16. Det regnar mykje, men vi har i det minste ikkje hatt frostnatt enno. Og med fine temperaturar lever sommarblomstrane i hagen enno.

Spanske margeritter. Dei tåler ikkje frost så dette er eit bevis på kor mildt det er ute. Eg er ikkje så ivrig på å knipe visna blomar lenger, men det vesle som kjem er framleis like vakkert. Eg har og ei kasse med petunia og, men eg gidd ikkje knipe lenger så den er ikkje så flott no.
Klatrerosa New Dawn. Den har blomstra over tre månadar no. Den har klatra og kost seg gjennom hausten. Det regnar ein del, så dufta er ikkje så sterk og blada fell fort grunna det tunge regnet.
Gullpyntekorg. Den har blomstra sidan mai. Og den tåler all slags vèr og tåler å verte flytta fleire gongar.
Pyntejordbær. Har og stått i blomst sidan juli/august. Blomane er som sagt veldig våte, men dei lev i beste velgåande.
Pelargonia. Den tåler det utrulegaste. Den har drukna og tørka om kvarandre, og den krev svært lite stell. Greit å plukke av det visne sjølvsagt.
Buskmure/potentilla, Lovely Pink. Den er kjent for å bløme heile sommaren og hausten, og det har den jammen gjort og.

Gledelige glimt frå hagen, men eg trur dette er det siste hageinnlegget for 2011. Skulle desember overraske så veit ein jo aldri...

Hue i ein fei

2011-10-22T13:44:00.002+02:00

Dette er ei hue alle som har tatt i strikkepinnar kan lage. Eg held framleis på med restegarnprosjekt og julemesseproduksjon. Eg er usannsynlig lei av garnet mitt, men lageret nærmar seg botn. Det er lenge sidan eg kjøpte garn sist, eg kjenner eg er veldig klar for det, men samvitet held meg tilbake litt til.

Hue str 3-4 år, pinne nr 6 og dobbelt garn av ymse babyull. Oppskrifta har eg funne på Pickles, ei side eg sterkt anbefalar. Dette er hue nr 2 frå same mønster som eg har laga idag og igår. Eg har planar om å lage dusk på toppen, så kanskje eg viser meir når dei er ferdig.

Rillestrikka babyjakke

2011-10-21T07:56:00.002+02:00

Eg er i siget, og har fullført jakke nr 2 på same dag. Denne jakka har eg ikkje brukt så lang tid på som kåpa, den er betydeleg mindre og ganske enkel å strikke.

Eg skal gi vekk jakka til Osterøy Redd Barna sitt salgsbord på julemessa. Jakka er str 0-3 mnd og oppskrifta kjem frå Pt Baby 10-4. Garnet eg har brukt er Pt Panda. Eg har ein del restegarn og enkeltnøster som eg har som prosjekt å bruke opp før eg kjøp nytt. Eg har brukt to nøster blått og eitt nøste lys lime.
Heile jakka strikkar du i eitt med riller. Den er veldig kjekk å strikke og den skal nesten ikkje monterast. Knappane manglar, men dei skal sjølvsagt på før messa 19.november.

Strikka ullkåpe som enno er litt for stor...

2011-10-20T10:02:00.004+02:00

Det har tatt si tid å få ferdig denne kåpa. Eg trur det er eit år sidan eg byrja og motivasjonen har vore opp og ned med å fullføre. Eg fekk den ferdig rundt påske ein gong, men eg orka ikkje monteringa. Heldigvis har Espen ei tante som gjorde det for meg. Det var berre for meg å montere knappane. Og kor lang tid tok det å sy i seks knappar? Tre månadar...

Kåpa er framleis alt for stor, det er litt av grunnen til at eg ikkje har stressa med å verte ferdig. Eg er heime med Malin idag. Eg tok meg saman og bestemte meg for å sy i knappar og samstundes få tatt bileter i godt lys.
Kåpa er strikka med dobbelt garn Sisu frå Sandnes. Oppskrifta er henta frå hefte nr 1001 frå same leverandør.
Eg strikka i størrelse fire år. Malin er fire år, men Sandnes sine oppskrifter har ein tendens til å vere litt store. Skulle kanskje ha strikka i to år dersom eg ville ho skulle ha brukt den no.
Det som var mest vanskeleg var samanfoldinga bak. Elles var oppskrifta grei den etter kva eg huskar. Alltid kjekt med nokre detaljar i oppskrifta som eg ikkje har prøvd før.
"Mamma, e du ferdi no?" Kåpa ser ut som ein sekk på henne.
Eg har ikkje vaska den enno, men maskene vil nok legge seg litt finare når den får seg ein omgang med Milo og vatn.
Knappane har eg kjøpt på Stoff og Stil. Dei er ikkje heilt slik eg hadde tenkt meg, men det var det næraste eg fann. Knappar synest eg er vanskeleg å finne, det er sjeldan det vert slik ein har tenkt.

Så håpar eg Malin vert stor nok til å bruke kåpa og at ho faktisk vil bruke den og.

Magnettavle i ny drakt

2011-10-09T12:22:00.004+02:00

Lenge hadde eg tenkt å male sjølv ei magnettavle med tavlemaling, men så såg eg at IKEA hadde ei i tre. Med litt maling så vart tavla slik eg hadde tenkt, og tavla var ferdig i sommar. Likevel har det tatt si tid før den kom på veggen.

På kjøkkenet ved spisebordet har eg hengt opp tavla som forhåpentlegvis skal gjere kvardagen litt meir oversiktleg. Eg synest det er greit å ha ein plan tilgjengeleg for alle (som kan lese) over kva vi skal ha til middag og kva som skjer på ettermiddagen/kvelden. På den måten håpar eg vi unngår at begge har planar på same kveld.
Eg har malt tavla i lyseblå. Den fargen går igjen her i huset. Same farge har krakken som eg brukar på kjøkkenet og sjenken i stova. Lyseblått vert eg aldri lei av. Over ser dokke kva eg skal ha til middag komande veke, men sjølve retten veit eg ikkje enno. Det tek litt mykje plass på tavla, men så er eg så heldig at tavla er magnetisk så då kan oppskriftene hengast opp.
Inni tavla kor regningane skal plasserast har eg limt på eit mønsterark. Papiret er skjørt så det tåler ikkje så mykje, men det er ikkje verre enn at eg bytter det ut om det vert øydelagd. Tavla frå IKEA ser eigentleg slik ut. Eg er ikkje så begeistra for denne trefargen. Det er med to krokar som skal henge under tavla, men dei droppa eg. Tavla kostar 149 kroner, så det er ikkje dyrt om du ønskjer ei slik tavle.

Eit stort ønskje har gått i oppfylling

2011-10-08T20:45:00.002+02:00

Heilt sidan vi flytta inn har eg ønska meg hyller i boda på loftet. Det har vore utruleg frustrerande dei gongane eg har rydda i boda og straks etter er alt rotete igjen. Det hjelp ikkje med plastbokser når den du treng ligg nederst i stabelen.

Sjå på dette kaoset! Eg fekk ikkje igjen døra til slutt. Pappa og gjengen er på besøk denne helga, og han var ikkje sein med å kartlegge behova i huset. Idag har han kjøpt og montert hyller i boda! Å for ein herleg dag!
Han kjøpte sponplater som vi fekk kappa opp i riktig breidde og lengde, kjøpt vinklar og montert opp hyller i heile boda. I tillegg har han lagt golv og festa listene.
Det er så uendeleg deilig å ha hyller. Hyllene er tilpassa alle plastkassene mine slik at eg kan ta dei ut og inn enkelt utan at alt anna ramlar ned.
Under eine hylla har han montert knaggar for oppheng av klede utanfor sesongen, sekkar og anna.
Det gjeld å utnytte plassen... Sjølv rydda eg i alt som hadde vore inni boda, og jammen vart ikkje mykje fjerna. Klede som ungane har vokse ifrå er putta i plastsekkar, unødvendig papp og embalasje skal kastast, og kassene har vorte betre organisert.

I natt skal eg sove godt. Eg er så uendeleg nøgd med dagen. Pappa, du er ein knupp!

Kvitmalt ferie

2011-10-07T16:58:00.004+02:00

Eg har tatt ferie eit par dagar og har vore heilt for meg sjølv i nokre timar. Eg har verken tatt manikyr, ansiktsbehandling eller handla klede, men mala lister i stova/kjøkkenet. Då vi bygde huset skulle vi male listene i eigeninnsatsperioda, men grunna ein vinter utanom det vanlege fekk vi ikkje gjort det. Så er det noko med at lister ikkje er viktig å få malt med det første, og derfor vert nedprioritert.

Trelistene har vorte gulare og meir stygge etter mykje sollys, så det var på tide å få gjort det. Iallefall på stova kor vi oppheld oss. Heilt øverst i bilete ser dokke taklistene som framleis ikkje er mala.
Eg har mala listene langs golvet og rundt dørene, samt rundt vindauga ved sida av verandadøra.
Det vert meir gjennomført når listene er kvite. Vindaugskarmane malte eg ifjor. Fargen på veggen vert og meir synleg. Kvitt er ikkje lenger kvitt, men lysgrå.
Eg er ganske fornøgd med resultatet og startar helga med godt samvit.
Her er eit bilete av kjøkkenet og plassen kor vi et som deler stova og kjøkkenet. Då vi flytta inn var ingen lister malt, gardinene mangla og sponplatene var godt synleg over kjøkkenbenken. Det viser at eg har no gjort litt sidan vi flytta inn...

Løkplanting i deilig haustsol

2011-10-01T19:51:00.003+02:00

For nokre vakre dagar vi har hatt! Utruleg, men vi skriv 1.oktober idag. Vi går i sandalar og kortarma kjole, og gradene er rundt 20 om dagen. Og dette vèret må vi sjølvsagt utnytte, og eg har valgt å ommøblere bedet.

Eg har aldri vore heilt nøgd med det eine ferdige staudebedet eg har. Blått, gult og rosa ilag skal snart berre verte rosa og kvitt. Dei blå staudene har fått ny plass og dei gule er stua bort i eit hjørne til våren kjem. Så delte eg litt stauder og planta i tulipanløk og påskeliljer. Eg håpar berre eg ikkje har øydelagt alt saman. Frosten kan kome når som helst.
Kvite påsjeliljer og rosa tulipanar. Eg synest gule påskeliljer er veldig fint, men i min hage vert det berre kræsj. Eg har nokre på andre sida av huset, dersom dei kjem opp igjen vel og merke. Og så håpar eg vinteren er snill med plantene mine. Det vert dyrt om eg skal fornye kvart år.
Sjå det deilige haustvèret vi har! Vakre fargar og mystisk haustsol. Eg har forresten planta i tre syrintre langs tomtegrensa. Eg har venta i det lengste grunna garasjemateriale som ligg bak, men no måtte det berre vere og så får eg heller flytte trea dersom vi får godkjent søknad (vi har venta sidan mai!)

Kos dokke vidare i sola for dokke som har den. Det er meldt snø om ei veke, så slepp alt du har mens du kan :-)

Grøftekantar kan også vere vakre

2011-09-25T20:17:00.007+02:00

Espen har vorte så interessert i muring og steinlegging etter at vi flytta i eige hus. Ute på tunet er han i gang med å lage murkant, og i hagen har han byrja å grave for hagestove kor han skal lage peis i naturstein. Ikkje nok med dette så har han byrja å steinlegge grøftene nedover vegen. For mange er det ei kjent sak at i vinter hadde vi store problemer med vatn som danna seg til is heile den bratte vegen ned frå huset, og vi hadde ikkje tilkomst med bil på 3,5 mnd opp til huset.

Naboane og vi vart samde om at vi skulle få grøfta vegen på nytt før den nye vintersesongen kjem, og for nokre veker sidan kom det ei gravemaskin som fekk gjort dette. For å unngå at grøftene gror att og fyller seg med jord, legg vi stein ned i grøfta og langs kanten innvendes. I tillegg fyller vi med småstein inntil slik at det er stabilt. Bilete over ser dokke byrjinga av grøfta. Vatnet kjem gjennom eit rør frå andre sida av vegen kor vatnet kjem ut av fjell og jordmasser.
Grøfta langs vår veg møter ei røropning med vatn frå nabotomta som ilag renn ned over langs vegen. Dette "krysset" er det to naboar som har gjort.
Espen har brukt mange timar på dette arbeidet og ikkje minst har han brukt energi. Stein er ikkje eit lett materiale. Han er ikkje ferdig enno, men dersom dei vert fleire om arbeidet så går det kanskje fortare. Eg synest dette er eit kjempeflott arbeid og han fortjener masse skryt. Espen er veldig opptatt av at ting skal vere gjort skikkeleg, og det må eg seie det verkelig er med denne grøfta. Flinke Espen!
Eg skulle berre ut to minutt for å ta bileter, men ungane skreik og ville ut og det tok plutselig litt lengre tid. Eg heiv på Emil støvlar og jakke medan han berre fekk gå i strømpebukse. Han er veldig opptatt av banking, og kanskje får Espen hjelp av Emil om 14-15 år?
Malin hadde laga fiskestang i barnehagen denne dagen. Den måtte sjølvsagt prøvast. Ho var heilt overbevist at det var fisk her. Som dokke ser på bilete så står Malin på masse stein som er lagt ned. Det skal ikkje vere slik til slutt, men sluttresultatet får vi kome tilbake til.
Sjarmør, rampetroll og kosegut. Emil er så herlig sjølv om han finn på mykje rart.

Fram og tilbake er like langt

2011-09-19T22:04:00.005+02:00

Ikkje før eg kom heim frå Voss og Rallarvegtur så var det ut igjen på ny tur. Denne gongen mot austlege strøk. Først eit par dagar på Gardermoen og kurs med jobben, deretter tre fantastiske dagar i Fetsund. I Fetsund bur Rigmor, og Rigmor er som meg på veldig mange områder. Vi snakkar om hage, interiør, born, strikking, sying, scrapping, mat... ja det meste. Og då gå dagane fort sjølvsagt.

Det var nydelege haustdagar då eg var på tur. Bilete her er frå det gamle lensemuseumet i Fetsund og som er kjennemerket for bygda. Heile fredagen prioriterte vi interiørbutikkar, og sjølv om eg skulle ta fly heim fekk eg handla litt. Kva eg handla kan eg ta i eit anna innlegg, men eg har berre så lyst å anbefale dokke nokre av butikkane.

1. Hannes hjerterom på Kjeller utanfor Lillestrøm. Terningkast 6! For ein fantastisk butikk! Dama som eig butikken har innreda ein låve kor ho sel kle, sko og interiør. I tillegg har ho kafé og ho lagar ein del av kleda ho sel. Ta ein kikk på nettsida hennar, og dersom du har moglegheit så må du ta turen.

2. Linneas Hage i Nittedal. Ein kjempesøt butikk som har vore i drift i ganske mange år no og som er kjent for veldig mange.

3. Dorothea i Lørenskog. Litt mykje klede til å vere interiørbutikk, men absolutt ein fin stad å ta turen.

4. Zanz i Lillestrøm. Ein kjent butikk med sans for gamle ting. Veldig mykje flott, men diverre er prisane høge. Kanskje fordi den er så populær som den er...

Litt anna fekk også besøk av oss, men desse fire var dei som utmerka seg mest.

Etter ein slik dag så får eg utruleg lyst til å gjere litt i heimen. Til og med male ferdig listene! Og det må vel vere verdt heile turen i seg sjølv...

Dagane er travle så blogging vert det ikkje mest av framover, men har eg noko å fortelje så seier eg i frå :-)

Sykkeltur på Rallarvegen

2011-09-11T19:10:00.010+02:00

Vi har hatt ei kjempekjekk helg med Rallarvegen som det store høgdepunktet. Vi var tre par som tok turen frå Finse til Flåm med sykkel.

Vi reiste frå Voss, kor vi leigde hytte, kl 07 om morgonen. Bilane parkerte vi på Flåm før vi tok Flåmsbana til Myrdal kl 08.30. Vi hadde syklane i sykkelvogn og måtte sjølv flytte sykkelen då vi skifta tog på Myrdal. Frå Myrdal tok vi sykkeltog til Finse med ankomst 10.25. Vi var ikkje aleine. Toget var fullt av folk som hadde samme formål.
På toget fekk vi tid til å glede oss og følge med på vegen vi skulle sykle motsatt veg.
Øvre del av Flåm sett frå toget.
Véret var flott denne dagen. Med tanke på at det har regna masse den siste veka, kjente vi veldig på flaksen.
Ein smakebit på kva som venta oss nokre timar seinare.... Øverst ligg Myrdal stasjon.
Sidan Flåmsbana er eit turisttog måtte vi stoppe fem minutt for å ta bilete av Kjosfossen. Om sommaren brukar det å vere mogleg å sjå huldra her, men ho har nok gått i dvale for vinteren.
Vel oppe på Finse var vi mange som skulle sykle. Sikkert fleire hundre. Det var litt kaldt på stasjonen så vi hadde godt med klede.
Med Finse stasjon i bakgrunnen byrjar den 55 km lange turen mot Flåm. Vi er heldige med vèret og humøret er på topp. Dei ekstra varme kleda vi tok på oss på Finse var vi raske med å ta av.
Gutta boys.. eller den harde kjerne som dei nok likar å tru at dei er...
Banevoktarboligar var det mange av langs Rallarvegen. Det er ganske utruleg å tenke på at det ikkje er så mange år sidan folk budde her og hadde ansvar for vedlikehald av ei viss banestrekning. Idag har vi maskiner til å ordne det meste og det er berre eit fåtal igjen som vedlikeheld bana samanlikna med før i tida.
Nydeleg haustvèr og flott natur.
Det er ikkje veldig krevande å sykle Rallarvegen. Du må ha ein sykkel med litt breidde på dekka samt at du treng sykkelbukse, hanskar, hjelm og vindtette klede. Du treng ikkje vere i veldig god form. Balanse og kontroll på sykkelen er ei større utfordring enn kondisjon.
Aldri ein tur utan reparasjonar. Espen var turlaget sin Reodor Felgen.
Vegane var variert, men det var berre eit par stadar vi gjekk av sykkelen. Det har nok vorte prioritert å gjere vegane meir tilgjengeleg for sykkelturistar. Rallarane har nok ikkje tenkt på syklistar for over 100 år sidan når dei bygde vegen.
Eit bilete av meg er vel ikkje til å unngå. Eg er veldig kamerasky, men her har dokke beviset på at eg syklar Rallarvegen.
Meir vakker natur. Elvestryk og vatn var å sjå langs heile vegen.
Oj, enda eit bilete av meg! Du verden... Her hadde vi nistepausa vår.
Ein tunnell dukka opp under jernbana. Veldig mystisk og spennande.
Hausten viser seg frå si finaste side. Vakre byggverk såg vi langs heile strekninga.

Her er byrjinga av ei vegstrekning som var bratt og smal. Her måtte vi ha tunga beint i munnen. Vegen var ikkje sikra med gjerde og det var stup 20-40 meter rett ned i elva.

Vakker utsikt. I enden av utsikta ligg Vatnahalsen høgfjellshotell. Her deler vegen sin. Enten tek du vegen mot Myrdal og Upsete kor Rallarvegen stoppar, eller så tek du vegen ned mot Flåm.
Vi valgte vegen mot Flåm. Frå hotellet var vegen så bratt at vi sto på sykkelen heile vegen for å halde balansen. Bremsene fekk jobbe og konsentrasjonen var skjerpa. Vegane er ikkje sikra mot fall dersom du havnar utanfor vegen.
Vel nede måtte vi ha ei pause. Då vi såg oss tilbake var vegen opp ganske bratt. Litt stolte sjølvsagt over å ha komt oss ned. Herifrå var vegen til Flåm bortimot berre nedoverbakke og det gjekk fort dei siste 16,5 km. Det var utruleg deilig å sykle fort. Sykkelen trilla lett på asfalt og det gjorde godt når kroppen byrja å verte sliten.
Ein velfortjent klapp på skuldra til oss alle seks. Dette var ein kjempeflott tur som passar for alle med normal fysisk helse. Dersom du skal ha med born bør dei vere minst 12 år. Vi var veldig heldig med vèret og fekk veldig mykje naturoppleving av den grunn. Vi stoppa mykje og tok oss god tid. Tida vi brukte var 6 timar frå Finse stasjon til Flåm stasjon.

Vel tilbake til Voss hadde vi ein bedre middag før vi stupte i seng. Trøytte, men nøgde. Eg kan absolutt anbefale alle denne turen.

Travle haustdagar

2011-09-06T21:22:00.005+02:00

Det er ingen tvil om at hausten har kome. Det regnar og bles, kveldane er mørke og det er fullt opp på jobb og heime. Hausten er ei fin tid med alle sine fargar og rare temperaturar, men eg skulle ønske eg kunne skru ned tempoet to hakk av og til. Det vert ikkje så mykje blogging når kvardagen er så travel, men slik er det no.

Eg sitt å strikkar ein del for tida og kosar meg med det. Eg har ei periode no kor eg må rekke opp og prøve på nytt fleire gongar. Skikkelig irriterande, eg har tydeligvis ikkje hovudet på plass. Av slikt kjem ikkje resultata som perle på ei snor, men eg har som mål å verte ferdig med ganske mykje før siste helga i november. Då har Osterøy Redd Barna si årlege julemesse og vi som arrangerer den er avhengig av nokre gode hjelparar som kan produsere eitt og anna for salg. Eg har ein del planar til då, men vi treng hjelp. Bur du i nærleiken har du kanskje noko å bidra med?Elles så har eg byrja å studere pittelitt. Det er ikkje så omfattande og undervisninga er på kveldstid ein gong i veka. Eg kan ikkje forplikte meg oftare dersom skal eg få tid til det. Det er iallefall veldig kjekt, og gir ei god avveksling til det eg held på med til daglig.Eg er veldig glad for at borna mine ikkje har fritidsaktivitetar. Det er mange foreldre som har ein voldsom kabal på ettermiddagane som skal gå opp. Det kjem vel mi tid og, men foreløbig slepp eg unna. Det er vanskeleg å vite kor mykje borna skal kunne delta i fritidsaktivitetar utan at det går utover samvær med familie, skulearbeid og foreldra sin økonomi. Mine born er heldigvis (?) mest glad i barne-tv når dei kjem heim etter barnehagen. Eg veit ikkje om eg skal ha dårleg samvit over det, men dei har vel eit behov for å slappe av slik som oss etter ein lang dag på jobb. Eg har faktisk ikkje eigne bileter i dette innlegget. Rotete hus og ein stormfull uteplass er ikkje så bloggbart, iallfall ikkje for ofte. Bileta er henta frå ei fantastisk nettside som eg har vorte tipsa om. Marte Helgetun har eiga nettsida med salg av strikkeoppskrifter ho har laga sjølv. I tillegg sel ho garn. Plagga er heilt nydeleg og det er virkelig verdt å ta turen innom sida hennar som du finn på martehelgetun.no.

Dette var ein liten tysdagsprat frå meg. Til helga skal vi sykle Rallarvegen og då håpar eg at eg får dele mange flotte naturbileter med dokke. Kanskje strikketøyet får kome på trykk etterkvart og. Ha ein fin kveld vidare, med eller utan billett til Fotball-VM....

Hekla pulsvarmara

2011-09-03T15:54:00.002+02:00

Siste helga i november skal Osterøy Redd Barna ha julemesse. Då trengs det salgsobjekt og vi som er i styre bør naturlegnok stille opp med eit kvart. Eg er i gang allereie no. Tida går som regel alt for fort og ein rekk ikkje meir enn halvparten av det ein har planlagt. Igår hekla eg eit par pulsvarmara av alpakka og bambinoull.

Eg har brukt pinne nr 4.5. Dei er utruleg mjuke og god å ha på. Eg må nok strekke dei på eit slags vis, men korleis har eg ikkje funne ut av enno.Mønsteret var eg så heldig å finne på nettet, heilt gratis. Oppskrifta er meint for mindre pinnar, og det er sjølvsagt det finaste, men det vart ikkje så verst i denne størrelsen heller. Oppskrifta finn du her.

Årets bursdagsgåve

2011-08-28T20:40:00.005+02:00

Heilt sidan Malin var 1,5 år gammal har ho elska å disse. Ho kan sitte å disse i timesvis medan ho syng og trallar. Malin har ønska seg disse så lenge ho har kunna snakke og no hadde vi endeleg plass og moglegheit til å oppfylle ønskje.

Dissestativet er frå RKC og heiter Max. To disser, stige og sklie. Eg sa til Malin at no har vi leikeplass heime, men ifølge henne manglar det enno sandkasse for at leikeplassen er komplett. Sandkasse skal kome, men det må vente til garasja er ferdig og plenen er på plass.
Espen har brukt ganske mange timar på å montere stativet. Det tok litt lengre tid enn han først tenkte. Espen har støypt søyelesko oppi fire dekk. Beina skal festast til skoa og støypen skal hindre stativet å vippe. Vidare har han gravd fire hol kor beina skal stå nedi. Det var mykje arbeid med å justere slik at alt vart beint Litt saging måtte til då vi ikkje har så djup jord før vi møter pukk og fjell.
Fireåringen er kjempefornøgd med presangen og har vente "uendeleg" lenge med å få prøve dissa.
Vi har ei babydisse frå før som vi skal bytte ut med ein av dissene. Emil er framleis litt for liten til å klare å disse sjølv.
Stor stas for ungane, veldig kjekt å gi noko som dei kjem til å ha stor glede av.
Espen har vore kjempeflink. Litt ros må han få når han fortjener det. No ser hagen ut som eit moldvarpreir, men når Espen er sikker på at alle justeringane er gjort skal vi legge jorda på plass.

Sklia var kjempepopulær og Emil var raskt ute med å leike med livet. Vi må nok rekne med nokre timar med tilsyn på han enno. Forresten så står dissestativet midlertidig. Neste år skal det flyttast mot garasja. Vi må berre få jord og plen først. Planar har vi nok av altså...

Løytnantshjarte

2011-08-27T22:33:00.004+02:00

Det veks og trivs i hagen min sjølv om ikkje alle er like store. Ei av plantene som berre var ein liten kvast då eg kjøpte den i mai, men som no har vorte ganske stor, er løytnantshjarte. Ei utruleg vakker og romantisk staude som trivs både i skugge og sol.

Eg har ikkje så mange hjarter på planta i år, men tilstrekkeleg til at eg får studert den unike forma på blomen. Dicentra spectabilis heiter den på plantespråket og historia bak namnet er mange. Ei av dei kan du lese her.
Eg skal kjøpe meg fleire av desse. Tanken har vore å ha dei framfor tulipanane slik at dei visne tulipanblada ikkje viser så godt. No blømer denne ganske seint til å vere løytnantshjarte, men kanskje det har noko med at den er nyplanta? Har du denne i hagen er eg veldig interessert i å høyre dine erfaringar og eventuelt kva planter du har ved sida av.

4 års dagen vel gjennomført

2011-08-27T14:38:00.002+02:00

Det er utruleg kor mykje tid ein brukar på å førebu ein bursdag som varer i to timar. Malin hadde fireårsbursdag idag kor ho hadde fem jenter frå barnehagen på besøk. Bringebærmuffins, prinsessekake og smoothie vart trylla fram, men det var så vidt ungane åt eller drakk. Var det verdt det?

JA! Eg elskar å bake og stå på kjøkkenet. Å prøve nye ting er det kjekkaste. Eg laga denne prinsessekaka for første gong. Det meste var nytt for meg med denne kaka. Trekket er laga av marshmellowfondant. Ganske enkelt å lage. Marshmellow, delfiafett, vatn, konditorfarge og melis. Vidare laga eg ei rund sjokoladekake i ei lita form og ei kake i ei puddingform med hol i midten. Kake i puddingform var ikkje enkelt og eg har aldri gjort det før, men med sjokoladekrem kan alt lappast saman. Malin og jentene synest sjølvsagt kaka var kjempefin. Og til første gong å vere så var eg og nøgd.

Sidan det ikkje vart ei kake med tradisjonell form, fekk eg ikkje satt lys i sjokoladekaka. Derfor vart det lys i bringebærmuffinsen istaden. Malin synest det var like greit. Så lenge ho fekk lys og bursdagssang så var det godt nok. Alle oppskrifter er frå Leila Lindholm, og Malin var kjempefornøgd med selskapet sitt.

Malin 4 år

2011-08-25T21:24:00.003+02:00

Prinsessa vår fyller fire år idag. Ho har talt ned dagane i to veker no, og gleda seg slik som små born kan glede seg. Igår ville ho legge seg tidleg fordi ho skulle ha bursdag dagen etter. Det enda med at ho vakna kl 03 i natt og ville ha pakke. Hopping i senga og full i latter, heilt klar for den store dagen. Malin gjenfortalte galskapen i barnehagen og lo så ho hadde problemer med å verte forstått. I barnehagen har ho vore heilt elektrisk og det har nok vore stor stas for ho denne dagen. Nokre presangar har ho og fått, men feiringa skal skje på laurdag.

Det kjennes lenge sidan Malin kom til verda. Det er mykje som har skjedd sidan då. Tenk at denne jenta var 45 cm då ho var fødd. No har ho strekt seg og passert fleire av dei som før var større enn henne.
Litt posering sjølvsagt, ho er ikkje danseprinsesse for ingenting. Det vart ikkje så mange bileter idag, eg har vore i Oslo og kom først tilbake ikveld. Om vi har feira lite idag, skal vi få tatt det igjen i dagane som kjem. Følg med å sjå om du vil.

Grunnmuren til garasja er ferdig

2011-08-20T20:32:00.003+02:00

Ja så er vi i gang med garasjebygginga. Det vil seie det er Espen som er i gang, eg er berre deleigar. Heile ettermiddag og kveld igår arbeidde fire karar med grunnmuren til garasja og idag støypte dei ferdig. Fantastisk så fort det går når ein er fleire. I skrivande stund er Espen støl i ryggen og har hovudverk etter eit intenst døgn, men det har han jammen fortjent å vere.

Rett etter arbeidstid var dei gong med å setje opp kasser som skal halde sementen på plass. Det vart kjøpt inn sekkar med sement, sand og jern.
Før leggetid såg det slik ut. Sola skein og alt var på vår side.
Arbeidslaget i ettermiddag. Slitne og godt nøgde med innsatsen. Det er kjekt å ha familie i nærleiken som stiller opp. Karane vart premiert med heimelaga pizza og kald øl. Sjølv om vi berre er i byrjinga av prosessen er det likevel eit viktig steg vi har tatt.

Dokumentasjon av gravearbeid

2011-08-18T20:01:00.005+02:00

I påvente av garasjebygginga har Espen satt igang medt å grave ut der det skal vere hagestove. Planen er å lage ein mur rundt i naturstein og då må jorda gravast vekk for å unngå at det sig. Jorda legg vi mot parkeringsplassen då vi ikkje skal ha så stor parkering som idag.

Slik har det sett ut til no. Graset sådde vi ikkje lenger enn dit som vi skal ha stova. Ein gjer ikkje meir dobbeltarbeid enn ein må.

Ifølge Espen er det no klart til mur. All jord er tatt bort og det skal fyllast opp med stein. Muren veg mange tonn så underlaget må vere stødig som fjell. I hjørne nede til venstre skal peisen stå. Espen har visst alt klart i hovudet. Eg blandar meg ikkje så mykje inn, nokre prosjekt må vel han få og. Berre eg får bestemme plantene rundt...

Emil vil og hjelpe til. Måtte det fortsette i mange mange år til.
Gjett om eg er glad vi har vaskemaskin. Emil brukar 2 til 3 bukser om dagen, men han kosar seg og det er det viktigaste.

I gang med hekkplanting

2011-08-17T18:35:00.002+02:00

I vår hage vert nesten ingenting gjort som planlagt då ideane kjem undervegs. Etter hagedagen kokte hovudet mitt og eg fekk ikkje sove. Eg hadde så mange idear og klokka var sikkert ikkje 01.00 om natta før eg slokna. Ein av ideane var hekk rundt terrassen.

Buksbom rundt terrassen skal vere med å dempe den voldsomme plattingen. Med ein liten opning på kvar side håpar eg dette vert ein lun stad å vere. I tillegg skjermar det for innsyn. Ja for vi har så fryktelig mange naboar...
Hadde kjøpt 12 stykke. Og det gjenstår sikkert 25 igjen. Bankkortet brenn i lomma...

Deling og flytting av jordbærplanter

2011-08-16T07:26:00.003+02:00

Ifjor mai fekk eg ein spinkel, liten avleggar av ei prydjordbærplante. Etter eit år har den vesle planta spreidd seg og danna minst 40 avleggarar i tillegg til dei som eg har kasta undervegs i lukinga. Eigentleg har eg ikkje bruk for så mykje, men eg har ikkje hjarte til å kaste dei. August er tida for deling i følge dei lærde, så då var det berre til å lyde.

For å unngå at planta sprer seg yttarleg i bedet kjøpte eg to jordbærkrukker til 70% avslag på Plantasjen. I tillegg har to store krukker fått tildelt nokre planter og. Det kjem bær på desse, men eg har ikkje dekka dei til så fuglane har fått det meste. Veit ikkje heilt kor eg skal gjere av krukkene til vinteren, men i garasja kanskje?
Vakker ikkje sant?

1000 opne hagar- hage nr 2

2011-08-15T17:10:00.004+02:00

Etter at vi hadde besøkt hage nr 1 køyrde vi til denne hagen som hadde ein litt anna stil. Hagen er 100 år gammal og har tidlegare vore ein grønnsaks- og frukthage. Idag ber den preg av gamledagse stauder, bærbusker og busker med sterke tradisjonar på Vestlandet.

Hagen er i regi av to søstre som er vakse opp her. Mannen i bilete er ektemannen til ei av søstrene. Det var ein del besøkande denne dagen, og det er ikkje så rart når vèret var fint. Hageeigarane serverte saft, kaffi og kjeks til glede for alle som kom.
Hagen hadde mykje arendsspir (astilbe), bladlilje (hosta) og akeleie. Stemorsblomster og roser hadde dei ein del av og. Veldig vakkert og er det eg vil kalle ein bestemorhage.
Kven gledar seg vel ikkje til å kome heim når ein møter dette synet i trappa?
Mykje vakkert å kvile augene på.
Ein del steinarbeid i hagen. Alltid like imponerande. Likar godt sitjeplassar i stein.
Ei koseleg smie prega hagen. Dei hadde laga eit lite museum inni huset for den som ville sjå.
Damene var glad i fuchsia og hadde heile veggen full. Fuchsia likar ikkje vind og er derfor plassert i svalgangen mellom hovedhuset og uthuset. Utruleg vakre blomar og er reine kunstverket. Eg er ikkje noko fuchsiadame sjølv, men likar godt blomane fordi om.

Takkar for gjestfridomen og gleda eg har hatt av å få kome på besøk til hagane denne dagen. Eg håpar fleire opnar hagen sin neste år. Ein treng ikkje fem mål hage, luka bed og perfekte linjer for ta imot folk, det viktigaste er å vise hageglede.

1000 opne hagar- hage nr 1

2011-08-14T19:31:00.010+02:00

Det norske hageselskap har i år arrangert "1000 opne hagar" med mål om at fleire skal opne hagen sin for publikum. Dagen for arrangementet var idag, og her på Osterøy har vi hatt gleda av å ha to hagar tilgjengeleg for besøk. Den første hagen presenterar eg idag og imorgon får dokke innblikk i den andre hagen.

Ekteparet vi besøkte i den første hagen tok oss imot med smil og glede. Dama som eig denne hagen er ikkje kven som helst då ho jobbar på gartneriet og er leiar i hagelaget. Ei blid, open og skjønn dame som alltid har tid til deg og dine merkelege plantespørsmål.
Hagen hadde knapt ein plenflekk då trangen til å kjøpe nye planter har sannsynlegvis vore stor. Ikkje rart når ein jobbar på eit gartneri og ein får stadig inn nye planter som er spennande og vakre. Grusgangane var lagt i fine buer rundt heile huset og nedi hagen.
Hagen er i stadig utvikling og ho har prøva og feila akkurat slik som oss andre.
Ein variert hage med både vintergrøne busker og tre, stauder med og uten blomar og ulike bladfargar på plantene. Ho er og ganske glad i roser som duftar, akkurat slik som meg.
Med nokre år med tolmod får ein altså dette resultatet. Hagen var ikkje gjort på eitt år, og det er ei trøyst for ein utolmodig stakkar som meg.
Det strøymde på med folk som ville få med seg denne sjansen, og eg vil seie arrangementet har vore ein suksess. Folk fekk inspirasjon, idear og moglegheit for å få tips og råd. Eg håpar fleire vil ta seg ein tur i hagen etter dette og kanskje gjere noko nytt som ein ikkje har prøvd før.
Plantene hadde eit hav av fargar, fasongar og variantar. Inni mellom hadde ho laga sitjeplassar alt etter kor sola var på døgnet. Publikum fekk og forsyne seg med kaffi, brus og kaker. Ei skikkeleg vertinne vil eg påstå.
Er det rart hjarte bankar litt ekstra etter ei slik oppleving?
Eg boblar over av inspirasjon og hagelyst etter denne dagen. Eg vert så glad når det er mange hageglade samla. Det er så fantastisk å kunne vere i eit forum kor eg kan snakke fritt om hage utan at nokon vert lei. Ja for det kan verte litt for mykje til tider.
Hageigaren hadde veldig sans for mørkeraude/brune blad innimellom alt det grøne. Noko eg sjølv ikkje har tenkt over kan vere ei bra brytning til all skogen.
Legg merke til den kvite buska. Den duftar fantastisk og var ein av mine favorittar i hagen.
Før hagevandringa tok slutt fekk vi nok eit møte med ein sitjeplass med vakre blomar i skue.
Her er den kvite buska på nært hald. Veit du navnet på den?

Historia om det nye stovebordet vårt

2011-08-13T20:53:00.004+02:00

Det er ikkje noko særskilt med å få seg eit nytt stovebord, men historia bak kjøpet synest eg er morsom og ganske søt.

Eg har ei fantastisk svigermor som stiller opp for oss med å passe borna og vaske huset når ho kjem på besøk. Vi ser ho ikkje så ofte, men når ho er her så kosar vi oss masse. Ho er veldig flink til å gjere det fint i huset og det er som julafta heime hjå oss etter å ha sluppe ho laus ein dag. Ho er glad i å vaske og gjer det heilt frivillig. Veldig kjekt for oss som ikkje tørkar støv for ofte. Ho har dei siste besøka lagt godt merke til det gamle stovebordet vårt og synest det har vore heilt forferdelig at vi må ha noko slikt i stova.

Ikkje så rart at ho synest det kanskje. Eit billeg bord frå IKEA (lack) til kr 359,- som vart kjøpt for å ha noko å setje fjernkontrollane på. Heilt midlertidig sjølvsagt, men tida gjekk som det alltid brukar å gjere. Emil fekk tenner og bordet vart etterkvart innramma med tannmerker rundt heile bordet. Ting landa litt for hardt i bordet og Emil laga seg etterkvart matbod nedi hola då bordet ikkje akkurat er laga av massiv tre. Borna kunne knapt danse på bordet utan vi var redde for at dei skulle ramle igjennom. Ja for alle born dansar vel på bordet?

Forrige helg fekk svigermor nok. Ho skulle betale bordet berre vi reiste og kjøpte det. Avgårde med lånt bankkort drog Espen til Living og kjøpte nytt bord. Vi fekk det til halv pris og alle var nøgde. Ein seier born som syng er lukkelege born. Svigermora mi nynna for seg sjølv iallefall resten av helga.

Vi har no kasta ut bordet og det står på tunet, heilt midlertidig sjølvsagt, til nytte for små born som vil leike butikk. Bordet gjer seg og som lagringsplass i påvente av garasje. Kjekt å ha altså.

Telttur sa du?

2011-08-12T21:21:00.004+02:00

Heilt sidan ifjor har vi snakka om at Malin skulle få ligge i telt i hagen og heile denne veka har ho gledd seg då vi bestemte at det idag passa det fint. Barnehagen har vorte informert både to og tre gongar om denne hendinga og ho har tydelegvis gledd seg.

Sovepose og nattdrakt må ein ha. Det er kaldt om natta no. Puta, dokka og bamsen fekk og vere med.
Ho fryda seg. Dette var spennande!
God natt mamma!

Eg reiste på butikken og såg fram til å kome heim til stille hus. Då eg kom heim var det langt ifrå stille. Malin hadde avgjort at ho skulle sove inne og sto i trappa og venta på meg. Det vart nok litt overveldande og ho kjente seg nok tryggast i senga si. Espen hadde gleda seg slik, men kva hjelp vel det. Så om nokon har planar om camping er det ein ledig teltplass ut i hagen vår.

Epletreet vårt har fått seg kjæreste

2011-08-11T07:30:00.001+02:00

Som sagt tidlegare så fraus epletrea våre ihjel i vinter og vi måtte erstatte dei med nye. Eg fekk kjøpt eitt tre i vår, men som fleire av dokke veit så må eit epletre ha ein kjæreste innanfor 30 meter for å kunne bestøvast. I tillegg skal epletrea passe kvarandre med når på året paringsleiken skjer.

Aroma-treet vårt har fått denne flotte kjæresten ved navn Katinka. Litt krokbøygd i stamma, men ho reiser seg vel når ho ser den flotte makkeren sin.
Sjå kor ho kosar seg i solskinet. I bakgrunnen står Aroma som har vorte så stor og flott i sommar. Eg håpar dei vil trivast ilag og gi oss mange epleborn. Måtte vinteren ikkje verte så hard med dei.
Eigentleg har vi nok tre, men det er mest hassel. Vi har så mange nøtter tilgjengeleg på hausten at vi kunne ha starta nøttefabrikk. Hasseltre er ikkje like ranke og flotte som mange andre fordi dei skyt ut mange små stammer istaden for ei stor og flott. Fram med motorsaga!

Legg dokke merke til at vi har fint vèr? Det hjelp å klage.

Kunstige blomar

2011-08-10T20:31:00.004+02:00

Eg har lenge leitt etter potteplanter innandørs som ikkje er berre grønne eller er ein orkidé, og som ikkje treng å stå i vindauget. I vindaugskarmane mine har eg lyserosa pelargonia, Dronning Ingrid, men elles har det vore nakent. Og kva vert løysinga? Kunstige blomar sjølvsagt.

På IKEA fant eg denne buketten, virkelig søte og står så lenge eg orkar. Blomane står og skin i den nye mugga mi som eg kjøpte i Danmark. M'en står nok for Miljøgården, men her i familien har den ei anna tyding.
Denne pyntehylla som har lite sollys klarer ikkje å halde liv å planter. Eg har prøvd eføy, men det vart for varmt for den når hylla står litt høgt oppe nær vedovnen. Så då er igjen kunstige blomar geniale. Denne buketten kjøpte eg idag på Plantasjen og står i ei mugge frå Perfect Home. Bilete ved sida av er av Emil då han var til fotograf. Sølvkoppen som eg fekk til dåpsdagen skulle eg ha pussa for lenge sida. Latskap lenge leve...

Hausting av frø

2011-08-09T19:59:00.002+02:00

Mange planter sett frø utover seinsommaren og hausten. Frøa vert mørkare i fargen og tørrare. Eg har ikkje så mange planter enno då eg framleis er på spebornstadiet i hageverda, men eg har nokre som eg kan få fleire av.

Her har eg klipt ned visne riddersporar. Dei som eg har i hagen no er blå, men etterkomarar av heimeproduserte frø kan vere i andre fargar. Så det vert spennande.
Så tek eg ut frø frå belgen som krev litt tolmod. Ikkje alle er slik. Eg har til dømes blå akeleie kor frøstanden tørkar inni belgen. Dei dryss ut lettare enn desse.
Legg frøa på avispapir å la dei ettertørke eit par dagar.
Når frøa kjennes lette og tørre kan du pakke dei inn i kaffifilter og legge dei i ei boks. Ha boksa i kjøleskapet slik at frøa får det mørkt og kjøleg fram til våren.

Har du frø frå hagen som du har sådd? Eg vil gjerne høyre erfaring frå dette.

Sommaren som aldri kom

2011-08-07T20:16:00.004+02:00

Vi skriv 7.august idag og store delar av sommaren har passert. Vi har framleis ein god månad før hausten kjem for alvor, men dei lange dagane har vorte kortare og om morgonane kjenner vi lukta av haust. Det var så mykje vi skulle gjere ute i år. Vi hadde store planar for sommaren med garasjebygging, opparbeiding av plen og blomsterbed og maling av hus. Kva skjedde?

Materialet til garasja står enno under presenning og plast. Det har gått snart tre månadar sidan vi søkte om løyve, men kommunen let saka vente på seg. Noko av tida skuldast ferie, men sanninga ligg vel i at det ikkje føreligg saksbehandlingstid grunna byggjing i LNF-område, og kvifor forhaste seg då? Kommunen merkar nok ikkje presset som ligg på oss i forhold til tid før vinter, materiale som vert dårleg og så vidare..
Her skal garasja stå. På grunnen vi ikkje eig (sjå innlegg 19.mai). Eg har rydda siste rest av boss etter husbygginga idag og sortert ut trykkimpregnert plank. Betre seint enn aldri...
Skal dette vere sommar? Har du sett noko så deprimerande? Utemøblane vi hadde har vorte gamle og øydelagde og vi lev på det vi har, men kva er vitsen med kjøpe nye? To siste sommarane har ikkje vore varme og tørre, og det viser igjen i blomekrukkene. Hadde blomar her, men dei har rotna på rot medan eg var på ferie. Terrassa skal vi olje, men det vert aldri tørt lenge nok. Huset manglar andre malingsstrøk, men det må igjen verte sol og tørke.
Dette inngangspartiet må vel vere kandidat for det flottaste inngangspartiet i Noreg. Material under presenning, taksteinar, blomar som kvelast av regn og lagring av verktøy som manglar garasje/bod. Den kvite benken eg kjøpte i vår mister heilt sin sjarme opp i alt rotet.

Eit skikkeleg syteinnlegg dette her, men det må no vere lov av og til. Eg har allereie byrja å førebu meg til neste års hagesesong, for eg kan vel ikkje gi opp?

Ivrig på matlaging

2011-08-06T20:29:00.004+02:00

Det har vore ein produktiv dag på kjøkkenet. Svigermor er på besøk og har vaska og rydda nesten heile huset slik at eg har fått tid å gjere det eg likar mest; lage mat. Eg hadde ikkje planar om å lage noko som helst, men timane gjekk og plutselig vart det ein del likevel.

Knekkebrød er kjempelett å lage og krev ikkje lang tid. Dei er ikkje tilsatt kveitemjøl og er full i grovt mjøl, nøtter og frø. Dei smakar og mettar veldig godt. Oppskrifta finn du her. Bilete viser kun litt av det som vart laga, du får ganske mange når du brukar denne oppskrifta.
Vi venta besøk og eg tenkte at sveler er fin kaffimat. Eg som er sunnmøring sett veldig pris på sveler og no når eg har fått meg steiketakke så er det ei god anledning til å lage litt. Ungane elskar det, ja vi voksne og, og røra heldt til kaffimat i to dagar. Liknande oppskrift på sveler finn du her.

Så fekk eg laga brød. Eg følg inga oppskrift, men eg brukar ein kartong kefir, litt vatn og olje som tilsammen utgjer 1 liter. Eg blandar i ferskgjær når væska er temperert, hell i 1 liter grovmjøl, kli, gryn og frø (tek det eg har), og 1 liter kveitemjøl tilslutt. Deiga treng gjerne litt meir kveitemjøl etterkvart som den vert elta. Brøda steikast på vanleg måte. Kjempegodt og det luktar fantastisk i huset.
Heimelaga lasagne et ungane av masse og Espen er også veldig glad i det. Ein stor porsjon vart laga slik at vi har litt til i morgon og. Eg er veldig nøgd med dagens produksjon og ikkje minst at huset er reint og ryddig. Ungane har ikkje heile tida vore like nøgd med at eg står ved kjøkkenbenken time etter time så imorgon har kjøkkenet begrensa opningstid.

Ha ein fin laurdagskveld og vidare god helg.

Kaninvottar til små jentehender

2011-08-05T16:26:00.002+02:00

Hausten bankar snart på døra og borna treng nye vottar til kalde dagar. Eg har strikka vottar til Emil før i år og no var det Malin sin tur. På kveldane i Danmark kor vèret ikkje var på sitt beste og i bilen på veg heim fekk eg produsert eit par som Malin allereie har godkjent.

Søte kaniner med hjarte, det må vel passe ei lita jente på snart 4 år. Oppskrifta kjem frå Pt design sitt hefte nr 89.

Rabarbradessert med kanel

2011-08-04T22:10:00.000+02:00

Matauk har stått i sentrum idag med produksjon av solbærsaft, baking av brød, plukking av bringebær, klippfisk til middag og rabarbradessert med kanel. Eg har som sagt mamma på besøk og det er siste dag heime før eg skal på jobb imorgon, så då er det mykje som må utrettast.

Deilig kompott laga av rabarbra frå Lina sin hage. Dersom du beskjærer rabarbraen før midten av juni, kan du hauste meir på seinsommaren. Smart ikkje sant?
Emil og Malin likte det godt. Kompott med melk og sukker vart tatt imot med glede. Kan og nevne at solbærsafta, middagen, brøda og bringebæra falt i god jord blant dei små. Ein skikkeleg husmordag idag altså.

C-vitaminbombe på flaske

2011-08-04T14:50:00.004+02:00

Eg var så heldig å få plukke solbær hjå Lina som har ein eldre og meir etablert hage enn meg. Buskene hennar bugna av bær og på ein halvtime hadde vi plukka mange liter. Mamma er på besøk og har hjulpe meg å plukke og lage saft. Det er så mykje lettare når ein er to og ein får gjort utruleg mykje på kort tid.

Omlag 7 liter solbærsaft er produsert og satt i kjøleskapet. Solbær er svært rik på c-vitaminar og gjer godt når ein er forkjøla. Eg har ein tanke om at ungane får litt solbærsaft utover hausten for å unngå at dei vert sjuke. Må gjere det eg kan iallefall. Huset har lukta nostalgi i heile dag og eg tenker på mormor som var veldig flink til å safte og sylte rips, solbær og rabarbara.

Eg hev ei rosa sprunge

2011-08-02T16:51:00.002+02:00

Igår kveld skreiv eg på bloggen at det var kome knoppar på klatrerosa mi, og i morgontimane idag var rosa fullt utsprunge. Heilt utruleg kor fort det gjekk! Skal tru om den visnar like fort? Eg må nyte augneblinken og har vore ute i hagen nokre timar idag. Litt luking, vatning og gjødsling gjer samvitet godt.

New Dawn heiter denne og er i ein vakker lysrosa farge. Den er kjent for å dufte godt, men mi rose duftar ingenting. Litt snytt for dufta, men den er så vakker at det gjer ingenting.
Klematisen på nært hald som klatrar om kapp med rosa. Maria Cornelia heiter den og blømer heilt utruleg. Slikt gjer meg så glad når det ellers ser stusseleg ut i hagen vår.

Heim frå ferie og tilbake til ein forsømt hage

2011-08-01T22:29:00.004+02:00

Vi kom tilbake frå Danmark ved midnatt igår og har brukt dagen idag til å vaske klede, bade i bassenget, luke og klippe plen. Dagen har vore varm og fin og ungane har fått leikt med leikene sine og sett barne-tv igjen. Imorgon byrjar Emil i ny barnehage og Malin skal byrje i avdeling for store born.

Slik såg det ut då vi sto opp idag. Høgt gras overalt. Eg hadde luka alle bed før vi reiste, men eg måtte ta meg ei runde idag. Hagen har ikkje vorte slik som vi tenkte med gras som ikkje gror skikkeleg, busker som har vorte tatt av frosten og planter som mistrivs. Ripsbuskene mine er eit trist syn med gule blad sjølv om eg har gjødsla to gongar, og somme busker får ikkje blomar og veks dårleg. Eg gjødslar og vatnar, let dei få sole seg og fyller på med jord, men det hjelp visst ikkje.
Ei plante som trivast og som sto i blomst idag er klematisen eg kjøpte i vår. Den er har vorte høg og full i vakre, kvite blomar. Innimellom kjem det mange knoppar frå klatrerosa New Dawn og nokre har allereie visna. Det var eit kjekt syn og ga meg litt optimisme og håp.

Eg er takksam om nokon kan gi meg nokre gode råd mot planter som veks dårleg, får lite blomar og er gule/visne i blada. Kor ofte skal det gjødslast og kva anna gjer plantene godt? Det hjelp ikkje å snakke til dei, det har eg prøvd. Slik som med ungane så høyrer dei ikkje etter...

Økologisk draumeland

2011-07-28T21:04:00.005+02:00

Eg er fascinert av mat som er mest mogleg rein. Minst mogleg tilsetjingsstoff og mat som er produsert i Noreg. Gardsmat og økologisk mat er utruleg godt og ikkje minst verdiskapande. Diverre tillet ikkje lommeboka mi ein slik livsstil og eg må derfor som regel nøye meg med rein mat. Eg skulle gjerne støtta lokale produsentar, men kommunen har foreløbig ikkje tenkt å gi meg millionløn.

Her i Danmark er ting heilt annleis. Butikkane har godt utval i økologisk der blant anna Kvickly er ein supermarknad som verkeleg har forstått det. Der kan kunden velge mellom same type varer til ganske lik pris. I tillegg har dei lavprismerker slik som i Noreg. Økologisk skal ikkje vere dyrt og utvalget skal vere rikt. Eg la også merke til at det var mykje lokalprodusert mat og mat som var produsert i Danmark til prisar som ikkje var avskrekkande. Kva skal til for at vi får det slik i Noreg?

Historia til Kvickly starta for meir enn 25 år sidan kor dei plasserte organiske gulrøter i butikken. Dei var spent på om danskane ville ha desse gulrøtene som var skeive og full i jord, men det viste seg å vere ein suksess. Butikken fylte opp med fleire varer og idag har dei over 6000 økologiske produkt. Det skal vere mogleg å finne det alternativet du ønskjer og det skal vere lett å få auge på. Kvickly hevdar økologisk smakar best, er sunnast og er mest berekraftig for jordkloda.

Vi har ein kulturarv å ta vare på og bygdeutvikling er viktig del av dette. Dette er ikkje eit politisk innlegg, men ein omtanke for den tida bønder brukar på å skaffe oss mat på bordet og eit håp om at vi får det slik som Danmark. Eg ønskjer at maten ikkje skal reise langt for å mette magen og eg ønskjer at borna mine får mat som har minst mogleg framandstoff i seg. Vi tek vare på miljøet og vi tek vare på framtida; borna våre.

Freistande sølepytt

2011-07-28T09:21:00.006+02:00

Etter mange dagar med regn kom sola fram og ungane kunne igjen springe ute i shorts og t-skjorte. Vegane har vore dekka med vatn og det har tatt tid før dammane har forsvunne. Emil fant det freistande å springe ut i før vi voksne rakk å stoppe han.
På med hatten og støvlane. Emil likar å kle på seg sjølv.
Deilig sølevatn, støvlane vart fort fulle.
Då han likevel var skitten og det var for seint å gjere noko med det, lot eg han springe og kose seg.
Han flaksa og ropte og såg tilslutt ikkje ut.
Klar for å hoppe i dusjen.

Tur til BonBon-land

2011-07-27T19:38:00.005+02:00

Igår var vi på tur til BonBon-land som ligg på Sjælland 8 mil nord for Marielyst. Vi hadde store forventningar til dagen, men sto litt for mykje i kø til at dagen vart perfekt. Uansett, ungane koste seg og dagen gjekk utruleg fort.

Aldri eit leikeland utan sjørøverskute.
Emil fekk prøve karusellar han og, men det var så vidt vi kunne sjå han. Han koste seg og satt konsentrert i karusellen.
Malin og Espen sto kjempelenge i kø for å ta denne berg- og dalbana. Då ho endeleg fekk sette seg ombord flira ho og hadde det kjempekjekt. "Meir!" var det første ho sa etter at turen var slutt. Diverre kunne vi ikkje stå i kø ein til gong. Ho holdt på å sovne i køen første gongen, og Emil venta utolmodig på at ho skulle verte ferdig.
Desse syklane trengte vi ikkje å vente på, og Malin fekk dreisen på pedalane etterkvart.
Emil skulle prøve han og sjølvsagt, men korte bein og ingen evne til koordinering så enda det opp med at beina sette seg fast under hjula.
Nokre karusellar gjekk så vidt rundt og var meint for dei minste. Dei fleste ungane synest det gjekk for seint, men figurane var i det minste kjekke å klatre på.
Ein blekksprut som gjekk rundt i vatn fekk både Malin og Emil vere med ilag på. Kjempegøy! Emil heldt seg konsentrert i blikket.
El-bilar for dei minste. Ikkje lett å vite korleis du skal køyre.
Med litt rettleiing frå pappa kom Malin i mål og mottok sertifikatet som beviste at ho kunne køyre. Tenk om det var så enkelt for oss voksne og...
Emil fekk prøve han og. Han var heilt vill og storkoste seg bak rattet. Eg måtte både trykke på pedalen og styre rattet, men han kvalifiserte seg visst til sertifikat han og. Eg fekk ingenting...
Titt titt!
Rutsjebane eller sklie om du vil. Emil elskar å skli og repeterte denne sklia 20-30 gongar. Den var så kjekk fordi han kom seg opp og ned heilt sjølv. Dei andre måtte eg følgje han med i og eg vert sjølvsagt lei før han.

Malin såg eit prinsesseslott med hest og vogn utanfor. Dette biletet likar eg så godt. Skal tru kva ho tenkjer at ho ser framfor seg.

BonBon-land fekk ingen innertiar frå oss då dagen var slutt. Det slutta alt for tidleg, det var lange køar, og attraksjonane sto alt for tett. Det var lange køar for å kjøpe seg drikke, mat og is, og det var lite tilpassa for dei minste som alltid måtte stå og vente. Vi tek nok ikkje turen hit igjen, men ungane koste seg og hadde det gøy. Neste gong det er tivoli i Bergen så trur eg at vi må ta turen.

Ein kontrastfylt ferie

2011-07-24T21:12:00.009+02:00

Vi hadde nokre flotte dagar heilt fram til torsdag. Vi grilla kvar ettermiddag, ungane leika ute heile dagen og vi gjorde kjekke aktivitetar. På torsdag kom regnet og sterk vind som framleis er her. Med tanke på det som har skjedd i Oslo og Utøya på fredag, har dennne ferien vorte litt annleis enn ein først trudde.Morgenstund har gull i munn. Ungane har visst ikkje forstått at det er mogleg å sove lenge i ferien.El-bilar har dei ein del av i området. Ti kroner på automaten underheld ungane nokre minutt om ikkje anna.
Underhaldning for liten og underhaldning for stor.
Vi voksne har ein tendens til å planlegge store utflukter i kostbar regi, men ungane er eigentleg like nøgd med å få hoppe på ei trampoline, disse, klatre på eit stativ, grave litt i sanden og sykle.
Vi var på gokart-bana og Malin prøvde nok ein el-bil. Ti kroner i 15 minutt, eit kjempekupp!
Meg i gokart. Likte det ikkje for å seie det heilt kort.
Elias og Malin ventar på at fedrene skal gjere seg ferdig med å køyre gokart. Malin har på seg hue som vi måtte ha under hjelmen.
Espen i djup konsentrasjon. Etterpå var Espen blå på ryggen og vi alle var støle i armane. Vi vart vel minna på at vi har ein del musklar på kroppen som treng å brukast meir. Dei fleste koste seg på bana og samanlikna tidene sine med kvarandre. Eg eig ikkje konkurranseinstinkt og trakk meg tilbake heilt stille..
Igår var vi på krokodillefarm. Ikkje så stort anlegg, men det var kjekt å sjå på alle krokodillene dei hadde. Mange av krokodillene var utrydningstrua, blant anna denne, og det får ein litt til å tenke. I tillegg hadde dei nokre apekattar og nokre slangar. Fort inn, fort ut.
I håp om at vi fann eit kjøpesenter, køyrte vi rundt i Lolland-Falster og enda opp i Maribo. Danskar har ikkje noko forhold til kjøpesenter så turen var bomtur, men det som skjedde på denne turen var at vi punkterte. Så typisk oss. Heldigvis hadde vi superflaks opp i alt og traff på ei dame som tilbydde seg hjelp, Tilfeldigvis eigde ho eit dekkfirma som ho opna berre for oss. Alt ordna seg kjempefint tross alt. Om ikkje vi fekk kjøpt noko på eit kjøpesenter, så fekk vi svidd av pengar på eit flott, svart dekk.
Både idag og for to dagar sidan har vi vore på badeland. Ein svømmehall kor vi har gratis tilgang grunna hytta vi leier. Hallen har vannsklie og fleire basseng i ulike temperaturar. Malin og Emil har vorte kjempetøffe iløpet av turen og Malin har vore i sklia fleire gongar.
Malin storkosa seg og fekk etterkvart berre ringar rundt armane. Ho var svært overraska over at ho ikkje "datt ned".
Emil har vorte ein fisk i vatnet. Han sprellar og sparkar med beina og kjem seg rundt utan problem. Den minste sklia falt i god jord og han ville sjølvsagt ikkje gi seg då han først fekk prøve den.
Danmark er ikkje skapt for å ha dårleg vèr. Kva skal ein finne på? Eit lokalt veteranbilmuseum fekk besøk av oss. Bilen over er ein av desse som pappa har, berre eit år eldre. Citroën B11 1951-modell for å vere litt nerdete. Fort inn, fort ut her også.
Endå litt tid av dagen hadde vi og i ettermiddag tok vi turen til Danmark sitt sydligaste punkt. I full storm (kjentes det som) gjekk vi ut av bilen. Ungane var fascinert av det store havet.
Utsikt mot havet og Tyskland.
Ikkje badevèr denne dagen, men det var ei fin sandstrand her. Borene (bølgene) slår mot steinane og skapar stor kontrast til dei flotte badedagane.
Naturen har mange sider og eg føretrekk sol og vindstille, men eg må innrømme eg synest dette vèret har sin sjarme og.
Ungane, særskilt Emil, likte ikkje vèret. Han klarte ikkje stå på beina og var glad han kom att i bilen.
Det er sjølvsagt fyrtårn i nærleiken. Her bur det ei prinsesse, sa Malin.
Vi måtte bort å kikke på fyrtårnet. Det er visst Tornerose som bur her, og Malin var nesten litt flau av å stå nære eventyrslottet. Då vi køyrde frå staden sa Malin "Hadet prinsessa mi!"

Born har eit vakkert sinn og lev livet her og no. Dei gleder seg over dei små ting og har eit eventyrleg syn på det meste. Det får ein til å tenke at kanskje vi burde vere litt meir born av og til og glede oss over dei små ting. Vi bekymrar oss og tek litt ting for gitt. I ljos av det som har skjedd på Oslo/Utøya minner det oss om at vi må ta vare på våre nærmaste og glede oss over dagen vi har idag.

Deilig, vått og full i sand

2011-07-19T22:21:00.005+02:00

Endeleg kom badetemperaturane. Det har vore ein flott dag full i sol, solkrem, sand og glade born. Vi har vore på stranda og i bassenget. Badehanddukane har tørka og vorte våte om kvarandre og vi avslutta dagen med grilling.

Primadonna også i sjøen. Rosa badedrakt, rosa badering og rosa armringar. Sjølvsagt skulle ho ikkje verte våt på badedrakta så vitsen med alt det oppblåsbare har ho ikkje forstått.

Vi tok med masse bøtter og spader i håp om sandslottbygging ilag med borna, men som dokke ser måtte det litt hjelp til. Ungar er kun eit skalkeskjul for å bygge sandslott...

Emil sovna på veg til stranda og vogna vart installert med parasollar i alle retningar for at guten skulle få sove lenge. Men når eg har planar om å få solt meg eit par timar utan forstyrringar, ja så søv ikkje guten meir enn ein halvtime-tre kvarter...
Emil var like skeptisk til havet som igår. Han ropte på pappa når Espen nærma seg vatnet og ville helst ikkje ha nokon av oss ut i det våte element. Eg trur han likte godt den store sandkassa han hadde tilgjengeleg, men mykje av tida satt han mest på pleddet og åt potetskruar og kjeks.
Det var ikkje vanskeleg å få badedrakta til å verte våt då vi installerte oss i bassenget heime. Malin har vorte modig på desse to dagane og hopppar, svøm aleine og kosar seg. Temperaturen har vel sitt og seie kan eg tenke meg, det gjeld iallefall for meg.
Emil har vore skeptisk til no, men då han først var ut i bassenget var han heilt ifrå seg av begeistring. Han hylte av glede og plaska rundt seg med eit stort smil rundt munnen. Vi håpar på fleire dagar som dette for akkurat no er det deilig å vere norsk i Danmark.

Hit, men ikkje lenger

2011-07-19T21:47:00.003+02:00

Eg har i eit tidlegare innlegg vist til vesten eg har byrja å strikke i von om at eg kanskje kom til å fullføre den. Vesten er strikka av restegarn. Det betyr gjerne at ein må kjøpe meir restegarn fordi lageret er tomt for fargen. Og det har skjedd i dette tilfellet.

Eg har strikka heile baksida. Vesten liknar ikkje i det heile tatt den opprinnelege oppskrifta då eg som regel brukar å forandre den litt tilpassa mi late strikking og ønske om at det skal gå fort.
Framsida. Eg har byrja delinga med v-hals. Det er veldig dårlege bileter dette og viser ikkje fargane slik dei er, men eg er likevel ikkje sikker på om denne vesten vert fin. Eg skal iallefall fullføre vesten når eg har fått kjøpt meir garn og så får vi sjå om resultatet vert godkjent av underteikna og han som skal få den.

Må berre fortelle tilslutt at eg såg ei dame på stranda idag som strikka selbuvottar. Midt i solsteiken. Snakk om å vere strikkegal...

Endelig tid til leik og moro

2011-07-18T18:48:00.004+02:00

Etter å ha brukt store delar av dagen igår til organisering av syklar, kunne vi idag legge ut på syklane og ta fatt på dagen med ein gong. Vi har sykla langs stranda og inn i mellom gater med små feriehus, ete is, leika og bada. Grilling har vi gjort i ettermiddag og no har vi endeleg fått ungane i seng.

Ved turistinformasjonen og butikken ikkje så langt frå kor vi bur, er der ein leikeplass som ungane fekk utfolde seg på. Emil er kjempenøgd med å få klatre utan at nokon seier "nei Emil, gå ned".
Leikeplassar er geniale...
Ungane har venta lenge (synest dei) på å få prøve bassenget i hagen og alle unntatt dei to minste bada. Malin var kjempestolt av seg sjølv som svømte heilt aleine. Ho var veldig skeptisk til bassenget i byrjinga og klamra seg fast til Espen, men etterkvart slappa ho av og koste seg.
Thea har vorte så flink å svømme. Sju år og har hovudet under vatn. Ho tok nokre svømmetak og, men det begrensa seg kor mykje ho fekk utfolde seg i bassenget på 3 meter. Veslebroren Elias var like flink i vatnet og svømte visstnok rundt som ein torsk.

Vi håpar på at dagane skal fortsette som idag med sol på himmelen,. Sjølv om det bles frå alle kantar har vi det bra så lenge det ikkje regnar.

Det våte element

2011-07-17T21:25:00.007+02:00

Det vert eit fyldig reisebrev etterkvart ser det ut til. Det er fleire som følg med heime på kva sine håpefulle gjer på i Tuborg og pølse-land, og det er ein ganske kjekk måte å dokumentere smått og stort av hendingar.

Denne dagen har gått til koordinering av syklar, seter og vogner. Fram og tilbake fleire gongar på sykkelutleiebutikken, og dialog med fleire utleiestadar på ein gong. Vi kom oss ut til slutt, og tok den vesle turen ned til stranda.
Maren og Espen drista seg til å teste sjøtemperaturen. Det var ein del tang inne ved sjøkanten. Litt overraskande at det var litt vanskelig for borna å gå uti då stranda er kåra til Danmark si finaste strand i 2011.
Malin og Elias minner meg om leikande born i ein svensk dramafilm. Dei storkoste seg og ser nok fram til at det skal verte litt varmare.
Emil likte godt å trakke i sanden, men han vart redd då han kom for nære det store havet. Ikkje rart kanskje når han aldri har sett slikt før.Strand så langt auge kan sjå.
Snur du deg andre vegen strekk stranda seg like langt. Vakkert skue.
Skjønningane våre. Ettåringane kosar seg i sykkelvogna.
Det er ikkje det heilt store badevèret ute, men inne har vi boblebad kor vi putta ungane oppi. To frivillige voksne og fem ungar enda tilslutt opp i karet. Ingen tvil om kva Emil synest om boblebad...

Vi er i Danmark

2011-07-17T07:45:00.005+02:00

Ferien er igang og etter to lange dagar med køyring er vi endeleg i Marielyst. Marielyst ligg heilt syd-aust i Danmark på øya Falster. Dette er ein typisk feriestad med yrande liv, mykje turisme og aktivitetar om sommaren, og heilt stille om vinteren. Vi skal vere her i to veker ilag med to andre familiar.

Det var deilig å passere Øresundbrua og endeleg vite at vi har kome til Danmark. Vèret var nydeleg igår med sol og 25 grader.
Ein augneblink med smil og sjarme. Ikkje alle timane var like festlege for dei små, men dei klarte seg bra.
Malin var våken heile vegen igår, og var ganske lei på slutten, men her er ho iallefall i godt humør. Første dagen køyrde vi i 12 timar inkludert pause, så det er ikkje rart at dei små vert lei. Vi overnatta 8 mil inni Sverige før vi igår reiste i 7 timar.
I morgentimane idag er ungane godt igang med aktivitetar. Malin og Elias hadde seg ei kort teiknestund, men dei sitt ikkje stille så lenge...Elias har tatt med bilar som Emil fekk leike seg med.
Vi har stort og fint kjøkken med sitteplassar til 24 personar.
Danskane er ikkje så god på brødbaking om du spør meg. Loff til frokost er det einaste alternativet til mørkt rugbrød, men ungane er sjølvsagt veldig nøgd med det.
Det er litt rufsete vèr ute og uteplassen er mellombels tom. Igår kveld satt vi i bassenget og kosa oss med oransje måne i horisonten. Det er eit lite basseng som har delvis boblefunksjon, men vi voksne hadde god plass og temperaturen var 28 grader.
Før om dagen grilla vi og ungane koste seg med sandkasse, stor plen og dissestativ. Denne ferien lovar bra for både born og vaksne.

I strikkemodus

2011-07-11T21:13:00.003+02:00

Eg er veldig glad i å strikke, og denne bloggen var opprinneleg tenkt til å publisere produksjonen. Diverre finn eg mindre og mindre tid til strikkinga, og lidenskapen har vorte nedprioritert i takt med meir arbeid med ungane. Eg har og hatt eit prinsipp om at eg skal kun vise det som er ferdig, og då vert det sjeldant vist noko som helst.

Eg viser til tidlegare innlegg kor eg har ganske mange uferdige prosjekt, men dei får berre ligge ei stund til for no har eg som mål å strikke opp restegarn og garn eg har få nøster av. Eg er i gang med å strikke vest til Emil av deilig Dalegarn. Dersom eg viser uferdige prosjekt kan eg kanskje verte pressa til å verte ferdig har eg tenkt. Dersom eg tek med meg strikketøyet på bussen til og frå jobb kan eg kanskje verte ferdig snart. I tillegg er det ferie til helga og vi skal køyre ganske langt denne gongen. Du får følge med å sjå korleis dette går. Høyrer du ikkje om vesten på ei stund får du purre på meg.

Heimesydd sau

2011-07-10T21:45:00.003+02:00

Dette innlegget skulle eg ha skrive for fleire veker sidan, men gammalt nytt er forhåpentligvis godt nytt... Det er ikkje ofte eg tek fram symaskina, men av og til så må den fram sjølv ein ikkje har tid. Det er veldig kjekt når eg først er i gong, og denne gongen var det ekstra kjekt fordi eg sydde sau som Malin skulle vere i musikalen som barnehagen har hatt.

Malin ville ligge då eg skulle ta bilete, sauen ligg han og må du skjønne.
Så måtte vi ta bilete ut i graset, ja for sauen et gras.

For å seie noko om kostyme har eg sydd hjelmhue med påsydd øyrer. Så har eg tatt ein kvit genser og sydd på framside og bakside slik at det skulle vere lett å ta på seg kostyme. Eit par leggvarmarar og ein hale vart også laga.
Ta bilete av halen, mamma!
Og sauen likar å springe i graset sa Malin, så dette måtte eg og få med meg. Eg lokka ho ut for å ta bilete med den unnskuldninga at mormor og morfar ikkje har sett ho som sau. Så dette er ei ekstra helsing til dokke.

Det er kjekt med slike musikalar . Barnehagen har jobba mykje med prosjektet og det har vi merka godt her heime. Malin har sunge kvar ledige stund på alle sangane dei framførte. Musikalen heitte "Det tusslar og taslar" og omhandla jungeldyra som møter husdyra. Veldig flott førestelling og ungane var superskjønne alle saman.

Prinsesse Liverpool

2011-07-05T21:17:00.004+02:00

Det har vore varmt og godt idag. Malin har fulgt karane i slåtten og innsatsen skulle utførast i Liverpool-drakta som ho er veldig glad i. Det vart ein del prestekragar som vart tatt av ljåen og eg måtte plukke det eg kunne for å redde dei vakre blomane. Huff for ei mishandling av vakre blomar. Mannfolk tenkjer ikkje på slikt...

Eg laga krans og plukka ein vakker bukett. Kanskje ikkje akkurat romantikk og idyll som dukkar først opp i hovudet når ein ser dette bilete, heller meir komisk. Malin kallar seg sjølv for prinsesse Liverpool og då var vel siste ord sagt for denne gong... :-)

Medan vi ventar på ferie

2011-07-04T21:43:00.004+02:00

Det er framleis elleve dagar til ferie og dagane er fulle av alt som er nødvendig. Sommaren er her sjølv om vi ventar på sola og badetemperaturar, men kva gjer vel det når ein jobbar. Vi har nokre timar innimellom med flott vér og då slepp vi alt vi har i hendene og er ute.

Deilige moreller, søte jordbær og alt som er godt. Eg trur det er noko av det beste med sommaren. Butikkane bugnar av bær, grønnsaker og frukter frå Noreg. Det er lett å opne lommeboka og ete med godt samvit. Den prikkete skåla er forresten frå Søstrene Grene. Kr 23,50 var alt som skulle til. Butikken er lokalisert på Xhibition i Bergen for dei som lurte.
Vi er i gang med slåtten og Malin er ein av dei som hjelper til. Den vesle, turkise jenta med det lyse håret og den alt for store riva er arbeidshesten vår. Ho likar å vere med der det skjer. Det har vorte ein jobb for mannfolka dette sidan eg passar Emil, så det er godt at Malin kan representere oss litt.
Laurdag hadde vi koseleg besøk av Kjersti, Hjalti og Brynjar. Dei kom på den geniale ideen om å grille. Og når besøket er like glad i å lage mat som meg, så endar det opp med mykje godt på bordet. Vi koste oss i varmen med marinerte kyllingar, bratwurst, kotelettar, deilige salatar, dippar og kald Chablis i glaset. Heilt herleg altså.

Eg har vore utan internett ei lita veke etter at tordenvéret tok modemet vårt. No er eg tilbake og eg har innsett at eg er veldig avhengig av denne globale tilgangen til alt det rare som skjer rundt i Noreg. Så eit tips til alle er at dokke må huske å ta ut stikkontakta på modemet når det tordnar og lynar. Malin har sin versjon av kva som skjer når det tordnar.:

Malin syng Bæ, bæ lille lam og då ho har sunge "to par strømper" stoppar ho opp og seier; "Me må synga den når me har ei kald sky og ei varm sky. Når det seier Pang! så går strømmen og då må vi synga "to par strøm(per)" slik at strømmen kjem tilbake".

Glimt av sommar

2011-06-26T22:00:00.004+02:00

Desse junihelgane flyr avgårde i kjempefart. Vi har hatt besøk 3 av helgane denne månaden og det er mykje som skjer. Denne helga har vi vore heldige med vèret og har hatt anledning til å vere mykje ute.

Venner frå Trondheim har vi hatt på besøk sidan torsdag. Det er lenge sidan sist vi såg kvarandre, så dette var kjekt. Dei måtte sjølvsagt få sjå Ole Bull-huset, bygda si stoltheit, og vi fekk gått ein fin tur. Seinare på dagen vart det også tid for sykkeltur for dei to av oss som er spreke...
Vi har kost oss masse på verandaen og Emil er ein av dei som veit å utnytte vèret. Han utforskar det meste og likar særskilt godt alt som er Malin sitt. Sykkelen, huene og skoa hennar. Her fyller han luft i dekka, akkurat slik som pappa gjer.
Malin er alltid festpynta med kjolar og smykker. I handa held ho knekkebrød som eg har laga to gonger denne helga. Populære altså.

Eg har ikkje så mange bileter som illustrerer denne helga, har ikkje tid til det. Det er hektisk når det er folksomt i huset, men det er veldig kjekt. Dette var siste helga med overnattingsbesøk før ferien, men i august er det på'n igjen. Det har noko med at all familie og veldig mange vener bur langt vekke frå oss.

Tilslutt må eg fortelje at vi såg ein hoggorm i hagen idag. Den låg nedi graset i den delen av hagen vi ikkje brukar så mykje. Neste år skal vi leige ein jordfresar for å løsne jorda, rake stein og planere slik at vi får plen også der. Ikkje noko kjekt arbeid, men når ein ser ekle ormar i graset er det motivasjon nok. Huttetu.

Ønskjer alle ei ormefri veke.

På hagevandring

2011-06-21T21:53:00.005+02:00

Eg har vore så heldig at eg har fått besøke ein flott hage her i bygda. Vèret har vore upåklageleg idag så det passa fint. Eg har ikkje tatt mange bileter på rundturen, det er ikkje det eg har mest lyst til på ei slik vandring, men her er nokre få bileter som gir eit bilete av korleis det er der.

Hagen har fin utsikt og kveldsol. Tomta er stor og lun. I enden av tomta har dei som bur her bygd eit oransjeri, ei blanding av stove og drivhus, som er riktig så koseleg uansett vèr. Mange gamle stauder, roser og busker prega tomta i tillegg til ein del grønnsaker. Desse elskar hagen sin, det er sikkert.
Nokre flotte høner hadde dei hønsehuset, blant anna silkehøner. Hagen er på fleire nivå og arealet er nytta godt. Mange sjarmerande detaljar som dei har samla og bygd gjennom åra.
Ein vakker dam med ei lita elv som renn ned til ein større dam med ei lita fontene. Litt arbeid som har vorte nedlagt, men resultatet syner at det var verdt det.
Den skarpe kveldssola gjer at bileta er ikkje heilt optimale. Men eg kan seie at det har vore ei flott oppleving som ga mykje inspirasjon og motivasjon. Det er akkurat dette eg og Espen drøymer om. Vi manglar tid, vi manglar pengar, men vi skal få det til tilslutt.

Sommar sa du?

2011-06-19T18:01:00.003+02:00

Vi er snart i juli og eg ventar framleis på sommaren. Sommaren er visst her, men i ei våt og grå utgåve. Dei få sommarblomane eg har kjøpt rotnar nesten på rot av at det er så vått, så det vert ikkje fleire innkjøp kan du trygt seie. Grillen er tatt i bruk ein gong og male hus/olje terrasse let vente på seg. Vel, nok deprimerande prat, eg kan ikkje gjere noko med det uansett, eg er berre så frustrert.

I pinsa hadde Espen maraton med trillebåra. Det var nydeleg vèr og sjansen måtte ikkje gå ifrå oss. Han trilla jord der som dokke ser ikkje er gras, og sådde i. Mannen var sliten, men godt nøgd. Og det må eg seie meg einig i.

Epletreet vi planta ser dokke midt i biletet, vi må kjøpe eitt til. Treet har fått blomar så vi har håp om at dette kan overleve i motsetning til epletrea vi planta ifjor. Elles er det litt muring att så Espen har ikkje fylt i jord heilt inntil kanten enno.

Riddersporen har byrja å bløme. Studerer ein blomane så er det veldig vakre. Denne kjem til å verte høgare med åra og eg gleder meg til det.

Vekene er travle. Mykje jobb og vanlege plikter i heimen bidrar ikkje akkurat med så mykje blogging. Det får våge seg, no er iallefall helga over. Den har vore hektisk og innhaldsrik. Ønskjer alle ei fin, komande veke og så håpar eg at eg er litt flinkare med blogginga i veka som kjem.

Litt nytt på kjøkkenet

2011-06-07T20:36:00.004+02:00

Det er ikkje så ofte det kjem interiørinnlegg på denne bloggen, huset mitt er alt for rotete til det. Dessutan er det mange flotte interiørbloggarar i dette land som tek seg av den saken, men idag tenkte eg å vise dokke litt frå kjøkkenet.

Deilig med ryddig kjøkken, så synd det er så sjeldan mellom kvar gong.
Etter å ha tatt ned julegardinene vart vindauga ganske så nakne. Gardiner er så vanskelig å finne synest eg, men fant desse tilslutt som eg er nøgd med. Dei er kjøpt på Kid og eg slapp å sy ein einaste saum. Vart litt mørke bilete, men pytt pytt.
Basilikumen har vorte så stor, eg får ikkje ete den fort nok opp. Nokon som har gode oppskrifter med basilikum? Elles har eg timian, persille og eit par "babyurter" i glaset som skal vekse seg store.
Denne kjøpte eg for eit gåvekort eg fekk til bursdagen. Kremmerhuset er ein av nabobutikkane til jobben og det er ikkje få gongar eg er der. "Livet i hagen" som det står på kassa passar godt til meg. Kassa er kjøpt med tanke på å ha oljer, eddikar, honning o.l. i. Eg er så lei av at skuffene er klissete. Kjøpt i praktisk meining, men sjølvsagt skulle den vere fin og.
Gammalt sølvtøy og ei lita mugge frå Stavanger Flint som eg har redda frå å havne i ein container. Noregsglasa mine kjem til nytte overalt, kan du forstå kvifor dei har slutta å produsere desse praktiske og vakre glasa?
Ei kaffiboks også kjøpt på Kremmerhuset. Lufttett og fri for lys. Akkurat slik kaffien trivast.

Lyseblått er ein farge som går igjen her i huset. Ei boks til oppvaskpulveret har vore eit godt kjøp. Den er dekorativ og står høgt oppe, langt ifrå små barnehender, og står nært oppvaskmaskina når eg treng den. Sjølvsagt kjøpt på Kremmerhuset. Eg prøvar å kjøpe praktiske ting når eg først kjøper noko, og at det ser fint ut i tillegg, ja då må ein berre ha det.

Bollen er ikkje ny, men det er nytt at eg har ein bolle med frukt ståandes framme. Eg prøvar å verte flinkare å gi borna og oss sjølve moglegheit til å ete frukt, eg er ikkje så flink til det. Husk 6 om dagen (5 om dagen tel visst ikkje lenger). Sjølv om sommaren ventar på seg er det mykje godt i butikken. Ha ei god natt alle lesarar.

Glade barneføter i graset

2011-06-05T20:55:00.007+02:00

Idag har vi hatt ein lat søndag. Espen har bursdag og vi har ete kake, gele, sjokoladepudding, potetgull og drukke brus. Alt det gode ein har lov til å ete når ein fyller år altså. Det har vore eit deilig sommarvèr idag og vi har hatt nokre flotte timar i solskinet.

Malin kler fort av seg når det er varmt. Ho elskar å springe i graset og helst utan sko. Ho er så glad og lukkeleg som berre små born kan vere, og lev i nuet heile tida.
Heilt frå den dagen ho får joggesko om våren spring ho i graset. Ho har ei fast rute kor ho spring. Litt synging høyrer også med. Syngande born er lukkelege born var det nokon som sa til meg, og då er eg iallefall veldig heldig som har Malin.
Finaste jenta. Både rampete og snill kan ho vere, men ho er utan tvil aller mest snill og glad når ho får vere ute. Eg er også mest glad og snill når det er fint vèr, det er heilt sikkert!
Er det rart vi er glad i henne? Så skjønn og god lita prinsesse.
Emil likar å springe han og sjølvsagt, han skal alltid gjere det Malin gjer. Han har med å snuble når han spring og gir seg fort når det har vore nokre fall. Då likar han heller å verte trilla i trillebåra av mormor. Mormor og besten har vore på besøk denne langhelga og borna har leika frå morgon til kveld. Ei fin helg for oss alle.

Ønskjer alle ei fin ny veke. Håpar vi får litt sommar i år. Eg har kjøpt ny grill til Espen i anledning bursdagen hans, og eg kan ikkje vente med å prøve den.

Vaskebalje med ny funksjon

2011-06-03T20:59:00.001+02:00

Gammalt skrot som ingen vil ha har ofte mange minner. Synest det er kjekt å redde ting frå søppeldunken dersom den gjer seg betre hjå meg. Trur det vert satt pris på at vi "unge" likar gamle ting.

Denne balja har vore farmor si vaskebalje for mange, mange år sidan. Den låg på eit uteloft og gjorde inga nytte heilt til no. Syrintreet eg handla på impuls har eg planta ned i balja i påvente av å kunne plante det i hagen. Berre ventar på at materialet til garasja flyttar seg først. Tre spanske margaritter fekk plass oppi her og. Dei er visst Malin sine ifølge ho...

Deilig vèr ute, håper det varer for alt er gjennomvått og lite som minner om at vi har kome til juni og sommartid. God helg alle!

Rabarbarasaft

2011-05-29T17:15:00.002+02:00

Det er ikkje mykje å finne på ute når det regnar og bles. Derfor kan ein tillete seg å bake og lage saft. Dei siste dagane har eg baka knekkebrød, scones og eit par brødoppskrifter. Og idag vart det rabarbarasaft. Eg har ikkje allverdens med energi, det er ikkje derfor eg gjer det, men eg har eit ønskje om at borna skal få heimelaga mat. Mitt siste nye prosjekt altså...

Nydeleg farge på safta, det er sikkert. Oppskrifta kjem frå boka Piece of cake, men du finn mange som liknar på nettet. Rabarbaraen har eg vore så heldig og fått med Lina.
Med det samme viser eg desse flotte brøda som vart høge og luftige denne gongen. Oppskrifta har eg publisert før og er opprinnleg frå Nrk Matlyst/Bodil Nordjore. Veldig gode iallefall og kan absolutt anbefalast.

Eit lite spørsmål om jordbærplante

2011-05-28T22:43:00.003+02:00

Ifjor fekk eg ei prydjordbærplante med små bær vi kunne ete. Denne eine planta har formeira seg voldsomt med sine lange "armar" og no er det mange små jordbærplanter overalt i bedet. Vakre er dei, men eg har eit lite spørsmål.

Kor plasserer dokke denne planta? Burde eg ha hatt dei i ei stor plantekasse istaden for i eit vanlig bed? Håpar nokon kan gi meg eit godt råd :-)

Arbeid

2011-05-27T10:09:00.002+02:00

Overskrifta seier alt. Vi har masse arbeid framfor oss og særskilt for Espen som må ta dei tyngste taka. Eg står ikkje akkurat og berre ser på eg heller, men er det for tungt og stort så har eg ikkje så mykje å bidra med.

Jorda som vi har venta på i ein månad kom for to dagar sidan. Det enda opp med at vi måtte ringe til ein annan leverandør for han som først lova oss jord tok plutseleg ikkje telefonen meir... Jorda skal verte til plen der det ikkje er plen idag og blomebed. Det hastar med å få sådd i både plenfrø og blomefrø, så no vert det jobbing framover. Eg har litt problemer med nakken så eg får ta det roleg (skal iallefall prøve å ta det roleg).
Espen lagar tørrmur med naturstein frå tomta. Muren skiljer parkeringsplass og hage. Her skal det fyllast i jord på baksida av muren, eller var det jord oppå muren? Stadig endringar i planane, men eg har ikkje noko med den biten å gjere så eg ventar på resultatet.

Sola gløttar fram idag, ein fin start på fredagen altså. Det er ikkje meldt det finaste vèret denne helga heller, men det skal ikkje stoppe oss frå å få gjort noko. Eg har vore sjuk i to veker no og er overmoden for litt hagearbeid. God helg alle saman!

Nytt staudebed og meir busker i skråninga

2011-05-26T10:39:00.002+02:00

Det er ikkje så mykje som minner ein om sommar ute med vind, tåke og regn. Derfor er det litt stille i hagen, iallefall nesten. Vi var på Plantasjen og BoGrønt i helga som resulterte i nokre plantekjøp. Og plantene må sjølvsagt i jorda, sjå berre her.

Skråninga på baksida av huset eller langs vegen opp til huset om du vil, har byrja å ta form. Er litt i tvil om eg har planta for tett, men eg gjer eit forsøk. For å ta ein repetisjon så har eg planta ein kvit gyvel og to rosa buskmure (potentilla) i enden frå venstre. Eg har kjøpt to nye duftsjærsmin etter at dei gamle fraus ihjel. Dei har eg planta ved sida av buskmuren. Tilslutt har eg kjøpt buddeleie (sommerfuglbusk). Denne vert ganske høg, men eg hadde lyst på noko som var litt høgare innimellom buskene som er omlag 1 meter høge. Dessutan har eg saks om det vert for høgt. Planen er å kjøpe nokre spirea, både rosa og kvite, men då skal det verte fint vèr først.
Staudebedet eg har planlagt mot naboen (vest) vart plutseleg plassert under kjøkkenvindauga (sør). Den omtalte kamelliaen står midt opp i bedet no, men den skal flyttast. Eg trur ikkje den trivs så godt akkurat her. Vegen vert til medan ein går, det er tydeleg i denne hagen. Det vert aldri slik eg først hadde tenkt. Eg manglar eit par plante, men elles er dette bedet ferdig. Sjølvsagt har eg eit fargetema, kjem aldri utanom, og dette bedet er rosa, gult og blått. Skarpe fargar til ei forandring her altså.
Frå venstre bak har eg planta smågullkorg. Den har eg allereie delt og eg fekk den ifjor, så denne vil verte stor ganske raskt. Framme har vi blå akeleie og bak har eg planta silkepeon. Den vesle planta framme til høgre er ballblome og vil forhåpentligvis verte stor og flott etterkvart.
Frå venstre bak har vi blå ridderspore og framme planta eg den søte vesle soleiehoven. Det vil sannsynligvis berre verte dette bedet som har gule planter. Ved sida av riddersporen står kamelliaen som skal flyttast. Framme har eg planta løytnantshjerte og bak står det smågullkorg og silkepeon igjen. Eg manglar ei blå staude til enden av bedet. Nokre forslag? Den må ikkje vere for høg.

Det kjennes godt å ha komt igang, men både fordi vi har mangla jord og fordi eg har vore sjuk i to veker så heng vi litt etter. Heldigvis har det vore dårleg vèr. Aldri så gale at det ikkje er godt for noko...

Kyllingen Malin

2011-05-22T16:48:00.003+02:00

Malin og Emil har vore på besøk hjå Laurits idag og han har vore så heldig og fått tre små kyllingar i hønsehuset. Fordi eg synest kyllingen var så søt og at den faktisk heiter Malin, så fortjener den litt spalteplass i bloggen.

Malin vart fødd 17.mai og er oppattkalla etter ei jente som er fødd denne dagen. Vår Malin ville ikkje ha noko av at ein kylling heiter det samme som henne. Eg drøymer om ein hønsegard, men det er litt opp og fram før det skjer. Vi har Mikkel Rev utanfor huset av og til og skal vi ha ein hønsegard må vi gjere ein del sikkerheitstiltak først. Og så er det så mykje anna som viktigare å få gjort først... Har du høns og eventuelt gjort nokre tiltak for at glupske revar ikkje skal ta hønene?

Dommedag i hagen

2011-05-21T21:49:00.003+02:00

Så gjekk ikkje jorda under idag likevel. Vi unngjekk det store jordskjelvet, men det har likevel vore mykje vind og det har ikkje vore mogleg å vore ute før no ikveld. Ein dum dag altså... Då eg har vore sjuk og bortreist så har ikkje hagen hatt besøk av meg på lenge. Så ikveld tok eg meg ei lita inspeksjonsrunde og såg om det var liv i hagen. Og til mi store fortviling var det berre delvis liv i plantene.
Det har vore ein kald vinter og mange som eg kjenner fortel om planter dei har hatt i åresvis som har døydd av frost. Då er del vel ikkje anna enn å forvente at mine nye planter har gått same vegen. Frosten kom før snøen i haust som gjorde at det vart danna eit lag med frost oppå jorda som hindra at oksygen vart tilført røtene. Stakkars plantene mine, eg har mista så mange no at eg har snart ingen igjen. To epletre, to duftsjærsmin, to fagerbusker og ein lavendel. Det er ikkje billeg med tre og busker, men eg gir ikkje opp og skal kjøpe meg nye imorgon. Naturen kan eg ikkje råde over, men det er så utrulig vemodig likevel. Bilete over viser Malin som planta i duftsjærsminen ifjor vår, dei fyrste plantene vi fekk i jorda.

Heldigvis kan eg meddele at alle bærbuskene mine har overlevd og dei fleste staudene. Eg var på Plantasjen idag og kjøpte inn litt nytt, og no er vi straks klare til å lage staudebed. Meir om det seinare.

Landrøveri

2011-05-19T21:53:00.003+02:00

Vi skal snart gå i gang med garasjebyggjing og må i samband med dette sende inn søknad om tiltak utan ansvarsrett. Med litt rettleiing frå mamma og kommunen gjekk dette fint, MEN då eg skulle teikne inn garasja på kartet oppdaga eg at vi ikkje eig grunnen garasja skal stå på (!)
Kva skjedde?! Espen var tilstades under oppmålinga så vi veit kor grensemerka har stått, men kommunen sto på sitt. Vi burde ha kontrollmålt tomta då vi fekk målebrevet, men kven tenkjer på det då? Er målbandet meir til å stole på enn ein GPS? Tydelegvis. Så no må vi levere inn naboerklæring kor naboen bekreftar at vi kan byggje på deira grunn. Vidare må vi på sikt søkje om dispansasjon om frådeling til bustadformål (vi bur i LNF-område) for den skarve flekken kommunen bomma på. Og kva skal dei ha i gebyr når dette er gjort? 15.000 kr! Denne kommuna er så firkanta, vanskeleg og gebyrglade at eg får vondt i magen. Må legge til at tinglysingsgebyr og oppmålingsavgift kjem i tillegg til gebyret frå kommunen. Nokon som vil donere 20.000 kr?

For å forklare kor vi eig grensa ut i frå bilete så er grensa der det oransje flagget står til høgre for taksteinane. Garasja skal stå omlag der bilen står. I praksis eig vi nesten ingenting av parkeringsplassen. At ikkje kommuna kan sjå litt mellom sine eigne fingrar og faktisk la oss få dette området inn på kartet mot eit mindre gebyr. Skal det vere så vanskeleg?!

Sykkelhelg

2011-05-15T10:50:00.005+02:00

Det har vore stille nokre dagar på bloggen, men mykje har skjedd den siste veka. Eg har vore i Oslo i tre dagar med jobben og då eg kom heim vart eg sjuk. Det er så typisk at når eg endeleg får kvile og sove heile natta, så vert eg sjuk rett etterpå. Helga har likevel ikkje gitt rom for ro og kvile då Espen og tre andre har arrangert sykkelløp her på Osterøy. Osterøy Rundt gjekk av stabelen for første gong og 25 menn var deltakarar av ei krevande løype på 73 km.

På toppen av Røskelandsdalen og Espen er ved godt mot. Véret er bra og deltakarane er i strålande humør.
Min jobb denne dagen var å ta bilete under løpet fordelt på fleire stadar. I bilen måtte borna vere med og dei var stort sett snille heile vegen. Ein del ventetid vart løyst med kjeks og saft. Med paracet innabords og klinex i veska kom eg gjennom dagen. Eg fekk tatt bilete fleire stadar og med hjelp av tre andre fekk vi dekka løpet ganske bra. Malin sto med flagg og vinka sykkelistane forbi. Her står vi på toppen av Herlandssvingane, den mest krevande bakken i løpet.
Nesten alle fullførte løpet og det var stor stemning. Trass kramper og punkteringar var det ingen klager då dei kom i mål. Dei 25 som var med fekk seg fest på kvelden med lysbileteframvising, film, quiz og anna underhaldning. Stemninga var stor og arrangementet denne dagen har gitt grobotn for satsing neste år.

Jakta på ramslauk

2011-05-08T20:56:00.003+02:00

Det har vore planlagt i nokre veker at eg og Lina skulle på ramslaukjakt. Ramslauk veks vilt og smakar som ei blanding av kvitlauk og graslauk. Vi hadde lyst å prøve og lage noko ut av planta, og det fekk vi sjansen til idag.

Eg plukka ein pose med blad, men eg brukte berre ein brøkdel. Eg har ikkje laga meir enn eit glas med ramslaukpuré då eg ikkje veit kva eg skal bruke det til. Har og laga ein liten porsjon ramslauksmør. Oppskrifta eg nytta og eventuelt andre oppskrifter du kan bruke finn du her.
Slik ser planta ut. Minner om liljekonvall, men den har ei karakteristisk lukt slik at du ikkje tek feil og risikerer å forgifte deg sjølv og andre. Vi fant planta langs med ein traffikert veg og skråninga var så bratt at det var vanskelig å gå. Det freistar å finne ein annan stad neste år. Staden er ikkje hemmeleg om du vil plukke på Osterøy ;-)

Nokon som har erfaring med ramslauk? Vil gjerne høyre om det er nokon som har gode idear til bruk av lauken.

Lyst på svele?

2011-05-07T19:03:00.004+02:00

Endeleg kan eg stryke steiketakke frå ønskjelista mi, den har stått på lista nokre år. Pappa og gjengen ga meg steiketakke til 30 års dagen, og gjett om eg vart glad?!

Svele er ikkje lenger så enkelt å få tak i for min del. Det vert som regel på ferjene på veg heim til Sunnmøre. Så no er det kjekt at eg kan lage mine eigne akkurat når det passar.
Svele er best med sukker og smør synest eg, men brunost er også vanleg. Om du ikkje har takke kan du lage det på steikepanna og oppskrift på sveler finn du på nettet. God helg!

Den finaste moldvarpen eg har sett

2011-05-07T17:07:00.004+02:00

Eg og Emil har vore ute i hagen og gravd jord idag. Og ein av oss vart veldig skitten, gjett kven... Berre nokre bileter i farta. Eg må skryte av borna av og til og, ikkje berre desse blomane.

Emil sitt ned i holet vi grev i. Planen er å ha utegrill i dette området. Vi brukar jorda til å fylle inntil husveggen kor vi skal ha bed eller plen.
Emil har ein liten hammar som han er veldig glad i.
Skitten og søt.
Det var rett i badekaret etter at vi var ferdige å grave. Bleia var fylt med jord. Han kosar seg slik at eg kan ikkje hindre han i å verte skitten. Eg har trass alt vaskemaskin.

Men størst av alt er kjærleiken

2011-05-05T21:34:00.004+02:00

Kva passar vel betre enn å snakke om kjærleiken når eg har fått den vakraste buska av dei flottaste borna i verda? Eg har i tidlegare innlegg snakka om kjærleik ved første blikk då eg var på gartneriet og berre MÅTTE ha denne vakre skapningen. Eg hadde ikkje kjøpt den fordi den var litt dyr for å vere impulskjøp, men då bursdagen min kom dukka den opp på tunet. Espen hadde ikkje gløymt planta han heller, og eg vart berre så glad.

Dette er Kamellia framdyrka ved Gimle gartneri i Norheimsund. Den er meir tilpassa det norske klima sjølv om den ikkje tåler kaldare klimasone enn H3. Denne sorten heiter "Tom Knudsen". Den er ikkje så enkel å halde. Den tåler ikkje tørke og ikkje mykje fukt. Den skal ikkje ha leirhaldig jord og ikkje jord med mykje sand. Den skal ha full sol, dekkast til om vinteren og vernast for vind. Eg skal verne om den og ta vare på den så godt eg kan, for det er vel det ein gjer med sine kjære?
Sjå kor flott! Dette er ei busk og den kan verte 1,5 meter høg. Den blømer i mange månadar sa gartneriet, men på nettet står det mai-juni. Det er ei nokså ukjent plante så vi får sjå etterkvart. Eg har visst vorte eit hagenerd som kan omtale ei plante med så sterke ord. Når dette berre er byrjinga av hageeventyret mitt så tør eg ikkje tenke på kva som ventar...
Dei vakre perleblomstrane har sprunge ut og er så vakre der dei står. Om eg ikkje har så fryktelig forelska i desse blomane, er eg iallefall glad i dei.

Det fine med å fylle 30 er...

2011-05-02T19:40:00.004+02:00

... alle flotte gåvene og helsingane ein får. Heile helga har det strømma på med helsingar frå folk som har huska på dagen min, det er kjekt. Litt gåver har dryssa på meg og, og nokre av dei presenterer eg her.

Jobben ga meg denne flotte buketten. Store, fyldige roser i ein vakker, sart rosa. Passa perfekt inn i alt det lyseblå i stova. Fekk også eit vakkert armband og eit gåvekort på Kremmerhuset. Eg har så snille kollega, det er sikkert.
Etter tre dagar har dei andre blomane i buketten sprunge ut, er den ikkje vakker?
Gåvekort på Plantasjen er ikkje dumt. Ei venninne av meg har indirekte gitt meg desse tre buskene. To buskmure/potentilla "Lovely Pink" og ein kvit gyvel. Tusen takk Iselin. Desse er byrjinga på vår ganske så store skråning langs vegen til huset. Det tek nok si tid før den er fylt opp med busker, men som eg alltid seier; Det vert bra til slutt.
Gammalrosa petunia fekk plass i verandakassa i år. Kjekt å prøve noko nytt. Den er nokså vanleg i dei tusen verandakasser og krukker rundt omkring, men denne fargen trur ikkje eg har sett før. Eg har lyst til å ha noko som brer seg utover og blømer heile sommaren.
Så heilt til slutt viser eg dokke benken frå Plantasjen vi kjøpte idag. Den er ifrå ein venninnegjeng som var hjå meg på laurdag, indirekte gåve den også. Benken står ved inngangspartiet kor morgensola kjem inn. Ein fin stad å sitje om morgonen og høyre på fuglar som syng. Gåvekortet er ikkje brukt opp så eg kjem nok tilbake til kva meir eg har fått. Eg må få vist dokke dei flotte gåvene eg fekk frå familien, eg må berre få tatt bilete av det først.

Eg forstår ikkje kvifor vi kvir oss slik til å verte eldre, ja særleg når vi stig inn i eit nytt tiår. Det skjer ikkje noko over natta akkurat, eg er den same som før. Eg kunne ikkje tenke meg å vere verken 18, 23 eller 27 år igjen når eg tenker meg om. Alle aldrar har sin sjarm, også 30 får eg håpe.

Eg har bursdag idag!

2011-05-01T22:11:00.003+02:00

1.mai er for dei fleste ein fridag som diverre vart på ein søndag i år, men for meg så betyr det bursdagsfeiring. Det har vore ein flott dag med sol og varme grader, flagg, blautekake og mange, mange helsingar.

Slik ser eg ut. 30 år og like heil. Eg har førebudd meg på denne dagen i over eit år, og det gjekk fint. Alt er som før og hovudet og kroppen er intakt. Iallefall har det ikkje forverra seg over natta. Bilete er tatt frå festen igår. Meir om feiring, gåver og kloke tankar frå meg når skrotten har fått kvile.

Siste nytt frå hagen

2011-04-25T19:51:00.004+02:00

Etter ei veke med påskeferie var det rett ut i hagen. Det har ikkje skjedd så mykje på ei veke, men litt grønare har det vorte og fuglane syng for full hals i tretoppane.

Espen har byrja å spa jord frå der som utepeisen skal vere. Vi ventar på tilkøyrd jord, men tela har ikkje heilt sluppe taket og vi må gjere det på denne måten når vi ikkje klarar å vente. Vi ønskjer å ha plen/planter heilt inntil husveggen på begge sider og har byrja på høgresida idag.
Klematisen og rosa som eg kjøpte for eit par veker sidan vart planta i det nye bedet idag. Eg har laga ei midlertidig løysing på kanten. Det skal verte finare enn dette, men eg byrja å verte stressa for at plantene ikkje hadde kome i jorda enno. Nokre stemorsblomar fekk kome ned i og, eigentleg skal det vel vere ei høgare plante framfor klematisen. Synes eg har høyrd noko om at den likar skugge nederst på stamma.
Litt ros til Espen. Han har fullført terrassa 100 %, det var før påske. Endebord, topprekkverk og lister her og der. No er det ingen fare for at Emil og Malin sett foten fast lenger.
Eit lite smil i staudebedet. Soleiehov skal visst vere navnet. Ei av staudene eg fekk ifjor av ei snill dame her på øya. Staudebedet er midlertidig og det ser ikkje mykje vakkert ut. Planen er å spa opp det som har overlevd vinteren og lage eit finare bed.

Møkster- øy søkjer barnefamiliar

2011-04-20T18:43:00.002+02:00

Eg har veldig sansen for dei som busetter seg utanfor allfarveg og som satsar på verdiskapning i fråflytningstrua strok. Møkster er ei øy i Austevoll kommune, Hordaland fylke som satsar stort på å rekruttere barnefamiliar ut til seg ilag med dei 58 innbyggjarane som allereie bur der. Velforeningen Møkster Bu markedsdfører prosjektet "Øy søkjer familie" gjennom bloggen sin kor dei for tida har ein give away som du kan verte med på. Link til konkurransen finn du her.

Velforeninga Møkster Bu har som mål å skape trivsel, skape arbeidsplassar, betre båtrutene og auke folketalet.
Møkster har eigen butikk og skule, det er eit viktig grunnlag for at folk skal kunne bustje seg. Du får lese bloggen deira og gjere di meining om øya. Eg synest dette var eit flott prosjekt.
Jonsokfeiring (St.Hans)
Når sommaren er på sitt vakraste så må det vere heilt fantastisk å bu nært sjøen og ha tilgang til badeplassar og båtar rett utanfor stovedøra. Kanskje eg tek meg ein tur ein gong hit? Ønskjer iallefall innbyggjarane og velforeninga lykke til!

Nostalgiske hagebileter frå farmor sin gamle hage

2011-04-19T20:57:00.008+02:00

Vi har i vår familie snakka fleire gongar om at interesse for hage kan vere litt arveleg. Det kan iallfall stemme for mitt vedkomande. Farmor syntest det var veldig kjekt med hage slik som far min blant anna. Hagen til farmor var i si tid kjent for å vere flott og vakker, og eg har leita fram nokre bileter frå 80-talet som viser litt av det som har vorte barndomsminner for meg.

Før i tida kjøpte folk ikkje masse planter på hagesenter slik som ein gjer idag. Det var verken utval eller økonomi til det. Heldigvis var dei flinke til å gi kvarandre avleggarar, stiklingar, frø og anna, og det resulteterte i ein frodig og variert hage heile sommaren.
Eg kan ikkje seie eg veit kva alle plantane på bileta heiter som til dømes dei oransje, men det viktigaste er at ein synest det er vakkert.
Det er ikkje i tvil om at tomta ligg vakkert til med elv på begge kantar og utløp mot sjøen. Eg har tilbrakt mange somrar her som lita jente og det var heilt fantastisk å kome til farmor og farfar. Vi var alltid velkomne og vi fekk gjere det vi ville så lenge vi oppførte oss.
Eg lengtar etter å ha det frodig og fargerikt rundt meg. Eg gleder meg enormt til at ungane gøymer seg rundt buskene, plukkar bukettar og spring i graset. Kanskje om 5-6 år?
Til slutt eit artig bilete frå slik det ofte var. Bileta er så gamle at eg synest det går greit å publisere dei. Farmor og farfar hadde ofte besøk og var eit samlingspunkt for ein stor og sammensveisa familie. På varme dagar tok ein det ein hadde og la seg på bakken for litt kvile. I midten her ligg farfar med kleda på og håpar på litt brunfarge på leggane sine. Ei herleg og fin tid for ei lita jente.

Ro, ro, ro din båt

2011-04-18T22:27:00.003+02:00

Å gjere noko ein aldri har gjort før kan gjere ein både spent og forventningsfull, men også skeptisk og uroleg. Idag fekk Malin vere i båt for første gong, eller ein kano då om du vil, og Malin gledde seg. Ho visste ikkje heilt kva ho skulle gjere, men redningsvesten var kjekk å ta på seg. Ho vart litt betenkt når ho såg kanoen, men då ho kom ut i kanoen vart det berre glede.

Malin kjenner på stemninga og synest ho er tøff med redningsvest.
Først ut var Malin, eg og pappa. Det var lenge sidan sist eg hadde padla i kano, men har ein gong lært det så sitt det.
Espen, Malin og Jonas. Humøret var på topp hjå alle og det har vore ein flott aprildag.

Kamelia- ein forelskelse

2011-04-13T21:37:00.007+02:00

Det er ikkje så mykje som blømer når ein besøker gartneriet i midten av april. Stemorsblomar og påskeliljer er det ein ser mest av akkurat no. Eg må lese meg fram på lappane på plantene som står ute for å vite kva det er, men innimellom vintergrøne planter og nakne greiner skimta eg ei plante eg ikkje kan huske at eg har lest eller høyrt om før; Kamelia 'Camellia x willamsi 'inspiration'. Hjarte hoppa over eit slag og eg vart brått bergtatt av denne planta. Den hadde allereie byrja å bløme, den hadde vakre, grøne blad og eg kunne sjå store, flotte knoppar som snart spring ut. For ei vakker plante! Den vil eg ha! Diverre kostar forelskelsen 410 kr, og fornufta hindra meg å gjere eit av mange impulskjøp. Eg klarer ikkje slutte å tenke på den, eg må nok tenke ut ein fin stad å plante ho for denne SKAL eg ha! Det er heilt genialt med tidleg bløming, det er mangelvare på planter som blømer i april. Så er det store spørsmålet: Nokon som har erfaring med denne og kan gi nokre gode tips? Eg vil gjerne at forelskelsen skal føre til evig kjærleik.

Utandørsplanar for i år

2011-04-11T08:06:00.004+02:00

Det er lett for å ha høge ambisjonar for hagen og ein vil helst gjere alt på ein gong. Tid og pengar styrer eigentleg det heile, men noko skal vi få til og her er ein smakebit.

Espen skal gjere ferdig terrassa og vi skal legge plast (dei svarte rullane) inntil veggen og fylle på med jord. Klematis og roser skal plantast på kvar side av terrassa som skal klatre opp søylene. Det skal lagast bed inntil husveggen, eg har tenkt mest på rosebed på denne sida.
Jordpåfylling og bed her og. Denne sida av huset skal få eit bed fylt i oldemorsstauder eller gamledagse stauder om du vil. Grasfrø skal såast utanfor beda.
Jordpåfylling til murkanten. Espen skal gjere ferdig muren som skiljer tun og hage.
Igår reinska eg området utan gras. Eg har laga ein raud ring rundt ei fagerbusk som eg har planta. Eg tenke å lage bed bort til fagerbuska i år og fortsette vidare neste år. Det er 17 meter langt bed så eg har ikkje pengar til alt i år (ikkje tid heller). Har ikkje bestemt meg for planter her.
Garasja skal opp der firkanten er laga. I tillegg skal vi male 2.strøk på huset og vedlikehalde/jordfornye det vi byrja på i fjor. Så vi har nok å henge fingrane i, men jammen er det ikkje kjekt og.

Glade born og voksne

2011-04-10T20:22:00.004+02:00

Denne helga har vore den beste på lenge. Varme grader og delvis sol er noko vi har lengta etter i månadsvis. Vi har fått gjort mykje i hagen, men best av alt er at ungane har vore ute heile dagen. Dei har leika og kosa seg ute frå 08.45 idag.

Slik har det sett ut hjå oss idag. Framleis ikkje grønt, men snøen er i det minste vekke. No ventar vi på at kvitveisen skal kome.
Malin rakar stadig plenen.
Først idag var det kaldt ute og dressen måtte på. Etterkvart som dagen gjekk forsvann eitt og eitt plagg frå kroppen. Bak Malin ser dokke muren som Espen held på med for tida.
Emil må sjølvsagt gjere det same som Malin.
Dei har tydelegvis sett på kva Espen har gjort på for idag sto dei å banka på muren med kvar sin hammar. Pappa trengte litt hjelp meinte Malin.
Dei første blomane i år måtte kjøpast, eg har ikkje tid til å vente på at naturen skal gjere oppgåvene sine sjølve. Påskeliljer, perleblomster og stemor. Alt skal plantast ut i hagen når dei har avblomstra. Kjenner eg har brukt kroppen denne helga og det kjennes veldig bra!

Ein herleg vårdag

2011-04-09T17:09:00.005+02:00

Det har vore ein herleg laurdag idag. Vi har besøk av svigermor som har passa borna medan eg og Espen har jobba i hagen. Det var nokre etterlengta timar eg fekk for meg sjølv kor eg har klipt greiner, sortert ut til ved og kasta greiner/lauv ned i skogen. Espen har mura litt og klipt og kasta greiner. Svigermor har raka plenen i ein ledig augneblink. I det heile tatt så har det skjedd ein del her, men som ikkje er interessant å ta bilete av for andre enn oss sjølve.

Ungane har vore ute og kost seg. Emil har sove to gongar idag, det er krevande å vere arbeidskar, og Malin er vel på randen til å stupe til køys no når klokka er halv seks.

Malin ventar på sola og tar på seg dei nye solbrillene så fort ho har sjansen. Vi har ei lita diva her på Dansebakken. Smykker og solbriller uti hagen, men samstundes rotar ho i jorda og grisar seg til med vatn. I bakgrunnen kan dokke sjå epletrea som vi har flytta opp i lyset.

Eg og svigermor kom fram til at det er dyrt med våren. Mange planter, hagemøblar og anna fornying i hagen vert alltid kjøpt på denne tida. Eg er ikkje noko unntak og har kjøpt to klatreplanter idag. Den eine er den velduftande rosa "New Dawn" i lysrosa.

Den andre planta er klematisen "Maria Cornelia" som er kvit. Desse skal plantast saman og bløme om kvarandre i sommar. Desse bileta er lånt frå ein eller annan stad som dokke sikkert skjønnar. Eg synest investeringar i hagen er verdt kvar ei krone, det gir så mykje glede og energi tilbake. Eg gleder meg til å vise dokke vakre bileter frå hagen i månadane som kjem.

Det er lett å la seg lure når ein er våryr

2011-04-07T09:16:00.001+02:00

Eg har vore på Plantasjen og latt meg lure. Jamie Oliver veit å lokke pengar ut av vårkåte nordmenn med sin nye kolleksjon. Du kan kjøpe ei vanntett boks med jord og frø som du kan vatne og få friske urter til matlaging. 39 kr for ei boks eller 3 for 100 kr.

100 kr for tre pappkrus med jord og tre-fire frø er vel ikkje akkurat eit kupp. Ein heil pakke med frø kostar 17-18 kroner og pappkrus får du på kva som helst slags bensinstasjon. Men eg lot meg rive med i ein iver over at det er vår og kom heim med tre pappkrus med frø til basilikum, dill og persille. Det einaste aberet er at eg vart råka av vinden utanfor butikken og plastlokka fauk av. Så no veit eg ikkje kva som er kva. Pose for to krone skulle eg ikkje kjøpe, det er jo lureri!
I tillegg til urtene kjøpte eg ein pose med 10 løkar kvite Freesia og ei rot med Løyntantshjarte. Meir om utelivet ein annan dag.

Mor! Far! Sjå ut or glaset!

2011-04-06T09:02:00.004+02:00

Eg har ikkje tenkt å la borna mine hoppe på ski frå hustaket slik som foreldra til Sondre Norheim gjorde, men om vi ser ut av glaset så kan augene passere listene som no har vorte kvite. Dette er eit tidkrevande arbeid, men tre glas i stova er ferdig. Og jammen vart det ikkje fint og.

Maskering, grunning, pussing og sparkling, maling av to strøk. Godt at vi har vannbasert maling som tørkar fort.
Det er litt som i eit interiørprogram kor ein heng opp gardinene før malinga tørkar. Herdingstida er satt til eit døgn, men så lenge har eg ikkje tid til å vente. Det ser ut som at det har gått bra.
Slik ser det ut før maling. Pappa er aleine om å meine at det er finast slik. Førebels er vindaugskarmane tomme. Det har si naturlege forklaring i ein liten krabat som riv ned alt han får tak i, men om litt kjem nok mine lyserosa pelargonia i vindauget att, og nåde den som riv dei ned.